1 Vandu voha va Isilaeli, kuhuma Dani mbaka ku Bel Sheba, pamonga na vala vevihuma ku mulima wa Gileadi, vandu voha vakonganike ku Mizipa, palongolo ya Bambu Chapanga. 2 Vachilongosi voha va makabila ga Isilaeli vatami palongolo ya msambi ya vandu va Chapanga. Voha vevavii penapo ndi vavii manjolinjoli laki mcheche na vavi na mapanga. 3 Vandu va likabila la Benjamini, vayuwini kuvya vandu vangi vala vakonganike ku Mizipa. Hinu Vaisilaeli vakamkota mgosi Mlawi yula. "Tijovela uhakau wenuwo wakitiki wuli.?"

4 Mlawi yula, mgosi wa avala mweakomiwi akavayangula, "Nene na mdala wangu tahikili Gibea, muji wa likabila la Bemjamini muni tigona kwenuko kilu yeniyo. 5 Nambu vandu va muji wa Gibea vakabwela kilu vayitindila nyumba yanagonili. Vagana kunikoma, vakamlimba avala wangu kwa makakala mbaka akafwa. 6 Nene nikatola higa yaki, nikadumulana hipandi hipandi na kupeleka chipandi chimonga chimonga mukila likabila la Isilaeli, muni vakitili lijambu la kuyomesa na la soni pa Isilaeli. 7 Hinu nyenye mwavoha ndi Mwavaizilaeli, mkotana na muwusa uhamula winu."

8 Voha kwa pamonga vakayima na kujova, "Kawaka yoyoha pagati yitu mweiwuya kulindanda laki amala kunyumba yaki. 9 Chenichi ndi chetikita kuyivala Gibea: Yati tikina gudugudu namuna chetikuvatova. 10 Yati tihagula vandu kumi mu kila vandu miya yimonga ya makabila goha ga Vaisilaeli, vandu elufu yimonga mukila vandu elufu yimonga, vandu elufu yimonga mukila vandu elufu kumi. Venavo yati vivya na lihengu la kuvaletela chakulya manjolinjoli vevivya na lihengu la kuutova muji wa Gibea pamulima wa Benjamini kwa uhakau wevakitili ku Isilaeli." 11 Hinu vagosi voha va Isilaeli vevakonganiki pamonga vayidakilini, voha vakavya chindu chimonga na kuvatova vandu va muji wa Gibea.

12 Hinu vandu va makabila ga Isilaeli vakatuma vandu vahamba kumulima woha wa likabila la Benjamini, vakavakotayi, "Mwihotola wuli kukita uhakahu ngati uwu? 13 Hinu muvahumisa vandu avo vahakau njwee vevavi mu Gibea, muni tihotola kuvakoma na kuwusa uhakau uwu pa Isilaeli." Nambu vandu va likabila la Benjamini vabelili kuvayuwanila valongo vavi Vaisilaeli. 14 Nambu vandu voha va likabila la Benjamini vakakonganeka kula Gibea kuhumila mumiji yavi, muni vakatovana na Vaisilaeli vayavi. 15 Vandu va likabila la Benjamini vavakemili manjolinjoli elufu ishilini na sita vavihotola kutovana, mewawa kwavili na manjolinjoli vakekesi miya saba kuhuma ku muji wa Gibea. 16 Pagati ya vandu venavo vevahaguliwi kwavili na vandu miya saba vevatumili chiwoko cha kumangeya, kila mmonga ahotwili kujugumila liganga kwa mbilanji na kulunga liyunju changali kubuda. 17 Vaisilaeli vavakemili manjolinjoli vangi laki mcheche kuhuma mu makabila gangi, vevihotola kutovana ngondo.

18 Vaisilaeli vahambili pandu pa kumfugamila Chapanga ku Beteli, Na kwenuko vakamukota Chapanga, "likakabila loki lelitumbula kuhamba kutovana na vandu va likabila la Benjamini?"

Bambu Chapanga akavayangula "likabila la Yuda lihamba hoti."

19 Hinu, manjolinjoli va Isilaeli vakahamba lukela, vakagona pandu pakupumulila papipi na muji wa Gibea. 20 Vaisilaeli vakahuma na kuyima kila mmonga pandu paki ndava ya kutovana na manjolinjoli ga likabila la Benjamini. 21 Manjolinjoli va likabila la Benjamini vakahuma kuvala ya muji wa Gibea vakavatova Vaisilaeli na ligono lenilo, vakavakoma vandu va Isilaeli elufu ishilini na zivili. 22 Hinu Vaisilaeli vakahamba kangi pandu pakumyupila Bambu Chapanga, vakamvembela Chapanga mbaka kimihi. Kangi vakamukota naha Chapanga, "Wu, yati tihamba kangi kutovana na valongo vitu, va likabila la Benjamini?" Bambu Chapanga akavayangula, "Muhamba mkatovana." 23 Hinu Vaisilaeli vakajikangamalisa, vakajitendekeha kangi kutovana na manjolinjoli ga likabila la Benjamini balapala pevajipangili pakutumbula. 24 Hinu ligono lelagelekili Vaisilaeli vavi papipi kutovana na vandu va likabila la Benjamini. 25 Ligono lenilo la pili vandu va likabila la Benjamini vahumili ku Gibea na kuvazangila Vaisilaeli, vavakomili Vaisilaeli elufu kumi na nane vahotwili kutovana bwina pangondo. 26 Manjolinjoli voha va Vaisilaeli vakahamba ku Beteli. Vatamili kwenuko palongolo ya Bambu Chapanga kuvembeneka na kujihinisa chakulya mbaka kimihi. Vamuwusili Bambu Chapanga luteta lwa kutinyiswa na teta za uteke. 27 Vaisilaeli vamuyupili Bambu Chapanga muni avajovela yati vikita kyani. Lukumbi lwenulo lisanduku la Lilaganu lavii ku Beteli kula. 28 Fineasi mwana wa Eliazali, mjukulu wa Aluni ndi mweavii mteta mwealiyangalila lisanduku lenilo. Vaisilaeli vamkotili Bambu, "Wu, tihamba kangi kutovana na valongo vitu va likabila la Benjamini?" Bambu Chapanga akavayangula, "Muhamba chilau yati nikuvakita muvahotola."

29 Hinu, Vaisilaeli vakavavika manjolinjoli vavi cha kujihiha kuutindila muji wa Gibea. 30 Vaisilaeli vakahamba kutovana na vandu va likabila la Benjamini muligono la datu. Vakayima kila mundu pandu paki kuutindila muji wa Gibea ngati chavalongolili kukita pakutumbula. 31 Kangi manjolinjoli va likabila la Benjamini pavahumili kuvala kutovana na Vaisilaeli, na pavavili mukutovana na Vaisilaeli vakahuma kuvala ya muji wavi. Vavakomili Vaisilaeli vayavi munjila zezihamba miji ya Beteli na Gibea, vavakomili Vaisilaeli selasini. 32 Vandu va likabila la Benjamini vakajova, "Tivatovili ngati chatalongoli kuvatova." Nambu Vaisilaeli vakajovelana, "Tete titila muni tivahuta kutali na muji mbaka kunjila yivaha."

33 Hinu manjolinjoli goha ga Isilaeli gakawuka pandu penapo na kujitendekeha kangi ku Baali Tamali. Vala vevajifiyili vakawuka kanyata pandu pavi pevajihihili ku upandi wa kwalitipama lilanga wa muji wa Gibea. 34 Manjolinjoli vakekesi vevahaguliwi kuhuma makabila goha ga Isilaeli vavatovili vandu va muji wa Gibea. Ngondo ya ligono lenilo yavi yivaha. Nambu vandu va likabila la Benjamini vamanyili lepi kuvya kukomiwa kwavi kuvi papipi. 35 Bambu Chapanga avakitili Vaisilaeli vavahotola vandu va likabila la Benjamini. Vaisilaeli vavakomili vandu va likabila la Benjamini elufu ishilini na muhanu na miya yimonga ligono lenilo. Manjolinjoli venavo voha vevakomiwi ndi vevavi na uhotola wa kuhengela vindu vya ngondo. 36 Hinu vandu va likabila la Benjamini vakalola kuvya vahotwili lepi.

Vaisilaeli vakawuya mumbele ngati vakuvatila manjolinjoli va likabila la Benjamini, muni vavaleka vala vevajifiyili papipi na ku Gibea vavatova Vabenjamini. 37 Vandu vala vevajifiyili vakakita kanyata kuyingila mu Gibea na kuvakoma kwa upanga vandu voha vevavili mwenumo. 38 Vayidakilini na Vaisilaeli vangi vevajifiyili vala kuvya peviwona lyohi livaha likwela kunani kuhuma kumuji wenuwo, 39 kangi vauzangila muji wenuwo. Lukumbi lwenulo vandu va likabila la Benjamini vamali kuvakoma vandu selasini va Isilaeli na kujovelana, "Tivatovili ngati pakutumbula." 40 Nambu ulangisu wa lyohi pawatumbwili kuhumila pamuji, vandu va likabila la Benjamini pavalolili mumbele yavi, vakakenyemuka kulola lyohi kunani na muji wavi uyaka motu. 41 Ndi Vaisilaeli vakang'anamuka, vandu va likabila la Benjamini vakavagaya muni hinu valolili kuvya kukomiwa kwavi kuvi papipi. 42 Hinu vakang'anamuka, kuvatila Vaisilaeli kuhamba kulukongolo, nambu ngondo yikavakolela, vakajikolela vavi pagati ya manjolinjoli ga Isilaeli na manjolinjoli ga Vaisilaeli vevahuma kumuji vakavatova na kuvakoma. 43 Vaisilaeli vakavatindila vandu va likabila la Benjamini, vakavavingisana kuhuma ku Noha mbaka kwelihumila lilanga mwa muji wa Gibea vakavakoma vandu vamahele neju. 44 Ligono lenilo vakomiwi manjolinjoli vakekesi elufu kumi na nane va likabila la Benjamini. 45 Vandu vangi va likabila la Benjamini vang'anamwiki, vatilili kuhamba kulukongolo mbaka litalawu la Limoni. Vangi elufu muhanu vakomiwi kujila yikulu pavatilayi. Vaisilaeli vayendalili kuvavingisana vandu va likabila la Benjamini mbaka kumuji wa Gidomu na kwenuko vakavakoma vandu elufu zivili va likabila la Benjamini. 46 Vandu voha va likabila la Benjamini vevakomiwi ligono lenilo vavi elufu ishilini na muhanu, manjolinjoli vakekesi vevahotola kutovana ngondo bwina.

47 Nambu manjolinjoli miya sita va likabila la Benjamini vahotwili kutilalila kulukongolo mbaka kulitalawu la Limoni, na vakatama kwenuko kwa miyehi mcheche. 48 Vaisilaeli vakavang'anamukila vandu vevasigalili va likabila la Benjamini, vakavakoma voha, vagosi na vadala na vana na mifuya yavi. Na miji yoha yavahikolili kwenuko vakahitinyisa motu.