1 Badayi Naomi akamjovela Lutu, mkamwana waki, "Yikunigana kukulondela mgosi muni uvya na nyumba yaku wamwene. 2 Hinu mwenuyu Boazi, mwewahengili lihengu na vasikana vaki, wu, wa lukolo lwitu lepi? Hinu yuwanila, chimihi ichi yati ibula shayili pa luvanja lwa kubulila. 3 Hinu samba, unyala mahuta geginungalila na uwala nyula zezikunyambisa, kangi uhamba pandu peibululia, nambu yangalila ukoto kumanyikana kwaki mbaka peimala kulya na kunywa. 4 Mewa upamanyayi pandu peihamba kugona, akatitila muhambila chinunu gubukula shuka na ugona pa magendelu gaki. Mwene yati akukujovela cha kukita."

5 Lutu akamuyangula, "Yati nikita goha geunijovili."

6 Hinu Lutu akahamba pa luvanja lwa kubulila mabenu, akakita gala geajoviwi na nayala waki. 7 Boazi peamalili kulya na kunywa, akasangaluka mu mtima. Hinu akahamba papipi na likinja la shayili, akagona. Lutu akahamba chinunu akagubukula shuka na kugona pa magendelu gaki. 8 Ndi kilu ng'ong'ololo, Boazi akakenyemuswa na akang'anamuka, akamuwona mdala agonili mu magendelu gaki. 9 Akakota, "Wayani veve?"

Akamuyangula, "Nene ndi Lutu, mtumisi waku. Uganikiwa unigegayi, ndava muni veve ndi mlongo wangu wa papipi mweuganikiwa kunigombola."

10 Boazi akajova, "Bambu Chapanga akumotisa msikana wangu. Ulangisi uganu weuvi wa usadikika neju kuliku wewaulangisi pa kutumbula. Uvahambili lepi vasongolo vangangu amala vevavi na vindu vyamahele. 11 Hinu msikana wangu, kotoka kuyogopa. Yati nikukitila chindu chochoa chewiyupa. Ndava muni muji woha pamonga na vandu vangu vakumanyili kuvya veve ndi wamdala mbwina. 12 Ndi chakaka kuvya nene ndi mlongo wa papipi mweniganikiwa kukugombola, nambu avi mundu yungi mweiganikiwa kukugombola, mwenuyo ndi mlongo wa papipi neju kuliku nene. 13 Hinu veve utama apa kilu yoha, na chilau lukela yati timanya ngati yati akukugombola amala lepi. Ngati akakugombolayi ndi chabwina. Akabelai kwa liina la Bambu Chapanga mweavi mumi, nene yati nikukugombola. Gona mbaka lukela."

14 Hinu Lutu agonili balapala pa magendelu gaki mbaka lukela, nambu ayumwiki lukela neju muni akotoka kuwonekana, ndava muni Boazi aganili lepi mundu amanyayi kuvya Lutu avi pandu pa kubulila mabenu. 15 Kangi Boazi akamjovela, "Tandika nyula yaku pahi." Lutu akitili chenicho. Boazi akamsopela shayili dumula sita, akamgegesa, mwene akawuya ku bomani. 16 Peahikili ku bomani, nayala waki akamkota, "Msikana wangu, yavii wuli kwenuko?"

Lutu akamdandaulila gala goha Boazi geamkitili.

17 Kangi akajova, "Kotoka kuwuya kwa nayala waku mawoko gawaka, hinu anipelili dumula sita zenizi za shayili."

18 Naomi akajova, "Hinu mkamwana wangu guna nuu mbaka pewimanya gegihumalila. Ndava muni Boazi yati ilekela lepi penapo, nambu yati itimilisa goha lelu."