1 Sauli peakiliwiki kuhuma kukukomana na Vafilisiti, akajoviwa kuvya Daudi avii ku lugangatu lwa Engedi. 2 Penapo Sauli akavatola manjolinjoli vaki vakekesi elufu hidatu vevamanyi kutovana ngondo bwina pa Isilaeli, vakahamba kumulonda Daudi pamonga na vandu vaki ku Matalau ga Hipalama. 3 Sauli peahikili pa mbugu yimonga yeyivii papipi na chivaya cha mambelele, akayingila mu mbugu yeniyo kutunda. Daudi na vandu vaki vavii mugati neju ya mbugu yeniyo. 4 Vandu va Daudi vakamujovela, "Lenili ndi ligono lila Bambu Chapanga peajovili, ‘Yati nikukita uvahotola vamakoko vaku, na veve yati ukuvakitila chewigana wamwene.’" Ndi Daudi akamunyemelela Sauli cha kumgongo na kudumula lugwinyilu lwa nyula yaki. 5 Daudi akatumbula kuviniswa mu mtima muni adumwili lugwinyilu lwa nyula ya Sauli. 6 Daudi akavajovela vandu vaki, "Bambu Chapanga anidivalilayi nikotoka kumukitila lijambu ngati ili bambu wangu mweahaguliwi na kuyitaliwa mahuta muni avya nkosi, nikotoka kumlemasa hati padebe nkosi wangu, muni Bambu Chapanga amuyitalili mahuta avya nkosi!" 7 Kwa malovi genaga, Daudi avajovili vandu vaki chechikumkita akoto kumkoma Sauli. Penapo Sauli akahuma mu mbugu na kuhamba mu lugendu lwaki. 8 Badayi Daudi na mwene akahuma kuvala ya mbugu na kumukemela Sauli, "Veve bambu wangu nkosi!" Nkosi Sauli peang'anamwiki kumbele, Daudi akafugama na kugundama mbaka pahi cha utopesa wa nkosi. 9 Daudi akamujovela Sauli, "Ndava kyani ukugayuwanila malovi ga vandu vevakujovela kuvya nene nigana kukukoma? 10 Lelu ulolili wamwene Bambu Chapanga cheakakusopili mu mawoko gangu peukavili mu mbugu mula. Vandu vangu vanijovili nikukomayi, nambu nene nakulekili mumi. Nikajova, ‘Yati nikumkoma lepi bambu wangu, muni mwene ahaguliwi na Bambu Chapanga kwa kuyitaliwa mahuta avya nkosi.’ 11 Lola, dadi wangu, lingulila lugwinyilu lwa nyula yaku ulu mu mawoko gangu. Nadumwili lugwinyilu lwa kanzu yaku nambu nakukomili lepi. Hinu uhotola kumanya kuvya chakaka nene nikubudili lepi amala kukung'anamukila. Nene nikubudili lepi nambu veve ukunilonda muni unikoma. 12 Bambu Chapanga ndi atihamula lelu nene na veve, na mwene akuwuyisila gahakahu goha geunikitili nambu nene yati nikukitila lepi gahakahu. 13 Kumbukayi luhumu lwa vandu va kadeni, hijova naha ‘Kwa vandu vahakahu vikita gahakahu,’ Nambu nene yati nikukitila lepi gahakahu. 14 Hinu veve wankosi wa Isilaeli, ndi yani mweugana kumkamula? Ndi yani mweukumlandalila? Ndi libwa lelifwili! Ndi lumbapani! 15 Bambu Chapanga ndi avyayi muhamula witu pagati ya nene na veve. Mwene auwona uhakau weukunikitila na aniyunga." 16 Daudi peamalili kujova genago, Sauli akamkota Daudi, "Wu, lwenulu ndi lwami lwaku wamwana wangu Daudi?" Sauli akavemba kwa lwami luvaha. 17 Kangi akamujovela Daudi, "Veve ndi wamundu mweukita gegiganikiwa na Chapanga kuliku nene, unikitili gabwina nambu nene nikukitili gahakahu! 18 Lelu unilangisi chila cheuvi mbwina kwa nene. Wanikomili lepi pamonga kuvya Bambu Chapanga akuhotwisi unikoma. 19 Wu, mundu akamukamulayi likoko waki ndi ihotola kumuleka ahambayi yegwa? Ndava ya lila leunikitili lelu, Bambu Chapanga akuwuyasila gabwina! 20 Hinu nimanyi kuvya veve yati uvya nkosi wa Isilaeli, na yati ukuukita unkosi wa Isilaeli uvya ngangali. 21 Hinu unilapila kwa liina la Bambu Chapanga kuvya yati ukuchikoma lepi chiveleku changu, na yati ukita lepi liina langu likoto kukumbukwa pagati ya vandu va lukolo lwangu." 22 Daudi akalapa kugatimilisa gala geayupili Sauli.

Kangi Sauli akawuya ku nyumba yaki, na mwene Daudi pamonga na vandu vaki vakawuya kuhamba pandu pevajihihayi.