Maria

Odjebedjama ba obotama ba Yesu

26 Ta songe ɔ basamano ɔ deemi la Elisabɛti, Ndjambe aloma Obwɛndi Gabiɛlɛ ta ibonga imɔti la Galilai kombe ɛ lu Nasaleta, 27 odii mwana mwali ɔ pɛpɛ odjebana na baami ona oboanedjamaka boo abale moomi omɔti ɔ kombe ɛ Yosepu ɔ ibota la Davidi; kombe ɛ mwana mwali ona ɛdaka Malia. 28 Obwɛndi aingea odii yo ko abala na nde boo: «Sepa! Kumu ona oenɛmɛdjai bwela ba nde bonɛnɛ, adii na wɛ.»

30 Obwɛndi abala na nde boo: «Pɛpɛ obanga, Malia, tina ɛ boo, Ndjambe aoinedjai bwela ba nde. 31 Hokea: olwalea deemi, obotalea mwana moomi ona olalea wɛ kombe ɛ Yesu. 32 Adabi moto monɛnɛ ko abeamabi Mwana ɔ Ndjambe Oonɔi Diko, ko Kumu Ndjambe amopabi ngbɛndɛ ɛ taata nde Davidi, 33 ko ekumu ɛ nde diko la bato ba Isalaele edɛtebi na suka.»

Obotama ba Yesu Klisto

18 Hokea moda mabotama Yesu Klisto. Malia, nango, apandamaka na Yosepu boo amoosɛ; endolo boso baodjebana mwali na moomi, Malia alwa deemi na ndjia ɛ Mwembo Mosɛnɔke.

Yembo ɛ Malia

46 Na bea Malia abala boo:

«Molimo ma mbai kumedja

Kumu,

47 molema ma mbai molumi na sepi

Tina ɛ Ndjambe adii moheledja ɔ mbai;

48 tina ɛ boo aenɛ opele oindja mbai

mosali ɔ nde ɔ pɛpɛ gala,

Sooti, donga hadɛdi mbunoko bihole bisusu,

nabeamalea na bato basusu mwali ona odjongoami

49 tina ɛ boo Ndjambe Onɔi Ngulu akɔi tina ɛ

mbai midjɔ minɔi na onɛnɛ.

Kombe ɛ nde edii esɛnɔke,

50 aluma na bwela bihole bisusu ta tina ɛ bato ibakamosume.

51 Aenɛmedja ngulu ɛnde esusu, ananganedja bato ba

Malɛi ma molumba,

52 aatitedja bato ba ngulu nase dja ngbɛndɛ dja bobo

ko aihwedja bato ba pɛpɛ ngulu.

53 Alumedja bato ba ndja na leka,

ko ayanedja badiheli mabɔ bwase.

54 Adoa akɔmedja mobuli ɔ nde Isalɛlɛ:

Aibosa oinedja opele ba nde

55 Moda imabunedjaka yo bataatasu,

odii Abalayama na mbota dja nde bihole bisusu.»

4 Yosepu koko adonga ta Nasalɛta, ibonga la Galilai, tina ɛ okɛ ta Yuda, ta Bɛtɛlɛmɛ ta esika ɛbotama Davidi; tina ɛ boo Davidi adaka taata nde, 5 bɛngɛ boo asakomedjae engbanga na Malia ona ɔboanedjamaka boo amobale, ona ɔdaka na deemi. 6 Ta ehole ena ɛdaka bo ta Bɛtɛlɛmɛ, iswi la nde la obota lakoka. 7 Ko abota mwana ɔ nde moomi ɔ boso. Amodinga na bisendja ko amosambea ta esika ɛ eyakeli ɛ bingbɛndɛ, tina ɛ bo esika ɛtaka tina ɛ bobo ta ndako ɛ bakɛndɛli.

19 Malia abanea midjɔ mia misusu ta molema, ko amilɛdjanaka obuke.

34 Simeona abadjongoa ko abala na nango Malia boo: «Ndjambe ahɔɔ mwana hoo tina ɛ ɔdumba kaoko ongangodja bato banɛnɛ ba Isalɛlɛ. Adalea embete ɛ Ndjambe ena etakedjalea ookana odii bato, 35 ko malɛi imabombamaka ta milema ma bato banɛnɛ madjebamabi. Ko wɛ, Malia, ookalea saya oko elengɛɛ saya ɛ mopata okatobanemo molimo ma moto.»

48 Ta ehole ɛmoenɛ baboti ba nde, bakamoa obuke ko nango abala na nde boo: «Mwana ɔ mbai, tina elokɔi wɛ bea nda? Mbai nɔsɔ sangwao, losatungei obuke mɛɛnɛ ta ihombi la wɛ.» 49 Abasɔmbɛdja boo: «Tina ɛhombakanini na nu nda? Otadjebakani boo eboani na mbai oda ta ndako ɛ Tata?» 50 Endolo baisipoa tina ɛ midjɔ mabalaka yo na bu. 51 Yesu ayana koko na bu ta Nasalɛtɛ. Abasumaka. Nango abaneaka midjɔ mia misusu ta molema.

3 Ehole esia vino, nɛngɛ Yesu abala na nde boo: «Baditi na vino.» 4 Endolo Yesu amosɔmbɛdja boo: «Mama, modjɔ ma wɛ na mbai nda? Ehole ɛ mbai epakita imea.» 5 Nango abala na basali boo: «Kɔɔni midjɔ misusu mibalalea yo na nu.»

25 Nɛngɛ Yesu adaka aemi mbuti na ekulusu, ngɛnɛ ɛ nango, Malia mwali ɔ Kolopasi na Malia ɔ Magadala. 26 Yesu aenɛ nango ko, mbuti na nde, motingami ona ɔpalaka yo. Abala na nango boo: «Mama, hokea mwana ɔ wɛ.» 27 Ngɔngɔ djia abala na motingami boo: «Hokea ngwao.» Ko donga ehole ena, motingami ona amotombi ta ndako ɛ nde.

Nɛngɛmoto na bangɛnɛ ba Yesu

31 Nɛngɛ Yesu na bananango baimea; baema o sokolu ɛ ndako ko baloma moto amobea. 32 Bato bike badaka mbuti na nde ko bamotɔndɔ boo: «Hokamedja, ngwao na banangwao bali na bami badii o sokolu ko baohombaka.» 33 Yesu asɔmbɛdja boo: «Odii inga nda ko badii banainga banda?» 34 Bea ahokea bato ibadaka bamohiki ko abala boo: «Hokea inga na banainga badi haa. 35 Tina ɛ boo ona ɔkɔkɔ opala ba Ndjambe adii mwaninga, ngɛnɛ kaoko inga.»

55 Hoo titi mwana ɔ mosali ɔ mabaya? Malia titi nango? Djake, Yosepu, Simo nɔbɔ Yuda titi bana ba nango baami? 56 Ko bangɛnɛ basusu baditi nasu haa engbanga? Odihi yo kpati hee esusu hɔɔ?»