1 «Nabala na nu bea bɛngɛ boo osakaa bungedjani edhimeli. 2 Baobenganabini ta ndako dja miongɔɔnɔ dja Bayuda. Ehole eduake bato ibaowabini, balɛdjabi boo basaleaka Ndjambe. 3 Bakɔbi bea tina ɛ boo baidjeba noko na Tata, na mbai. 4 Endolo nabala na nu bea bɛngɛ boo, ehole ena ekaimea, ɔlɛdjɛbini boo nabalaka na nu.»

«Naibala na nu modjɔ mua donga ibange, tina ɛ boo nadaka na nu engbanga. 5 Hadɛdi, nakei mbuti na ona ɔlomani ko pɛpɛ omɔti ta ndanda ɛ boono ɔhɔdjakani boo: "Ɔkeke wɛ hɔɔ?" 6 Endolo milema ma boono milumi na ndjokwa ɛlɔkɛɛ boo nabali na nu bea. 7 Noko bea, nabali na nu sooti boo: enɔi na opele tina ɛ boono boo nakɛɛ; nga namiti kɛ, Mokɔmɛdjɛli adoetebi odii no. Endolo nga nakakɛ naolomealeani yo. 8 Ko ehole edoabi yo, ainedjabi bato ba ngondo ibunga la bobo diko la isumu, diko la odjoo ko diko la esambi ɛ Ndjambe. 9 Ta modjɔ ma isumu, edii tina ɛ boo: batadimeakani, 10 ta modjɔ ma odjoo, edii tina ɛ boo: nakeke mbuti na Tata ko oenɛteleanini; 11 ta modjɔ ma esambi, edii tina ɛ boo: kumu ɔ ngondo hee asambedjami ehele.»

12 «Nadii koko na midjɔ mike ma obala na nu, endolo otahɔnɔni omisipoa hadɛdi. 13 Ehole edoabi Mwembo ma sooti, aolɔndɔbini ta sooti esusu. Tina ɛ boo abaletebi ta kombe ɛ nde mɛɛnɛ, endolo abalabi misusu imaokayo ko aotɔndɔbini midjɔ imaduake. 14 Ainedjabi ekumu ɛ mbai, tina ɛ boo atombabi midjɔ imidongi odii mbai ko aotɔndɔbini mo. 15 Misusu imipeli Tata midii koko ma mbai. Ta tina hee nabali na nu boo Mwembo atombabi midjɔ misusu imidi odii mbai ko amiotɔndɔbini.»

16 «Edikai maa ehole mokɛkɛ oenɛteleanini, ko ngɔngɔ dja maa ehole mokɛkɛ oenɛleanini.» 17 Na bea bakina batingami ba nde basabaleana boo: «Ɛtingodjaka modjɔ mua yee? Abali na su boo: "Edikai maa ehole mokɛkɛ oenɛteleanini, ko ngɔngɔ dja maa ehole mokɛkɛ oenɛleanini", na koko boo: "Nakeke odii Tata". 18 Ɛtingodjaka "ehole ekɛkɛ" ena ɛbalaka yo yee? Lotasipoaka modjɔ mapalaka yo abale.» 19 Ɔdjeba yo boo bapalaka bamohɔdjae, Yesu abala na bu boo: «Nabali na nu: "Edikai maa ehole mokɛkɛ oenɛteleanini, ko ngɔngɔ dja maa ehole mokɛkɛ oenɛleanini." Ɔsahɔdjakani mahɔdja oko diko la modjɔ mua? 20 Edii bea, nabali na nu sooti boo: oyealeani ko odaleani ta kɔndɔ, endolo bato ba ngondo basepalea; odaleani na ndjokwa, endolo ndjokwa ɛ boono ehombanalea sepi. 21 Mwali akapala abote, adii na monɔngɔ tina ɛ boo ehole ɛ nde ɛ saya eimei; endolo mwana akabotama, abosai saya ɛ nde tina ɛ sepi ɛ mwana ona obotami ta ngondo. 22 Moda momɔti na nu, odiini na ndjokwa hadɛdi; endolo ehole eonɛleani mbai koko, milema ma boono misepalea, ko sepi ɛ boono, moto atahɔnɔ oyekatoa.»

23 «Ta busa bua, ohɔdjaetebinini noko modjɔ momɔti. Edii bea, nabali nanu sooti boo: Tata aopaleani losusu ilomosɛngɛlea no ta kombe ɛ mbai. 24 Mbunoko hadɛdi, opakita sɛngɛni noko modjɔ momɔti ta kombe ɛ mbai. Sɛngɛni ko odihaleani, bea sepi ɛ boono edalea na osusu.»

25 «Nabala na nu midjɔ misusu na mandjɛ. Ehole ɛduake nabaletebi na nu bea, endolo ta ehole ena naotɔndɔbini ohuu midjɔ imitingi na Tata. 26 Ta busa bua, osɛngɛbini ta kombe ɛ mbai; nabaliti na nu boo naongɔɔnɔbi Tata tina ɛ boono, 27 tina ɛ boo Tata yo mɛɛnɛ akaopaleni. Akaopaleni tina ɛ boo okapalenini ko okadhimeni boo nadonga odii Ndjambe. 28 Nadɔnga odii Tata ko nadoa ta ngondo. Hadɛdi nadongi ta ngondo ko nasɔmbi mbuti na Tata.» 29 Na bea batingami ba nde babala na nde boo: «Hokea hadɛdi, obali na su ohuu, okini mandjɛ. 30 Lodjebi hadɛdi boo okadjebe midjɔ misusu ko toombe boo moto aohɔdjae. Na tina hee lodhimi boo ɔdonga odii Ndjambe.» 31 Yesu abasɔmbɛdja boo: «Odhimini hadɛdi? 32 Ehole ɛdoake ko eimei ehele, onanganaleani, moto na moto asɔmbɔlea odii yo ko okinaleanini mbai buki. Endolo naditi mbai buki, tina ɛ boo Tata adii engbanga na mbai. 33 Nabala na nu midjɔ mia misusu bɛngɛ boo odaeni na ogoo ta tei ɛ mbai. Onɔngɔbini ta ngondo. Endolo pingani! Nalongi ngondo!»