1 Endolo Yesu akɛɛ ta ngomba ɛ mele ma Olive. 2 Ngɔngɔ dja busa bokina sɔɔ, asɔmbɔ ta tepelo ko bato basusu babatama mbuti na nde. Adaa ko abanga obaleha. 3 Bato ba edjebeli ɛ mibeko na Bafalusai badoa na mwali ɔtɛmbɔlɔ bo. Bamoemea boso ba bato basusu 4 ko babala na Yesu boo: «Molehi, lokundumodjai mwali hoo akɔɔ bɔɔli. 5 Mose alopa enɔli ta mobeko boo laowoe bali ba moda muu na ndeke. Ko wɛ, ɔbali enao?» 6 Babalaka modjɔ mua tina ɛ omomeka, bɛngɛ boo bamopunde. Endolo Yesu asunama ko abanga okoma na mosapi ta kpɔtɔ. 7 Ena ɔdakabo oko bamohɔdja, Yesu asunoa ko abala na bu boo: «Yɛɛ omɔti ɔ bono odii pɛpɛ okɔ isumu amolɛ mondeke boso.» 8 Bea asunama naikina ko asɔmbɔ okoma ta kpɔtɔ. 9 Ehole ɛoka bo bibaeli bia, basasua omɔti na omɔti, obanga na basuku. Yesu adika yo buki nɔbɔ mwali, ona ɔdaka ena aemi boso ba nde. 10 Na bea Yesu asunoa ko abala na nde boo: «Mwali, odii bia ibaopundaki hɔɔ? Pɛpɛ moto odumbi na ikambo?» – 11 Amosɔmbɛdja boo: «Kumu, pɛpɛ moto.» Yesu abala na nde boo: «Mbai koko, naodumbiti na ikambo. Ohɔni oyana, endolo donga hadɛdi, pɛpɛ okɔ isumu.»]

12 Yesu abala na bu koko boo: «Mbai nadii ohuu ba ngondo. Ona ɔkimanakani adihabi ohuu ba mohelo ko adaletebi ta modidi.» 13 Bafalusai babala na nde boo: «Odii osapa tati tina ɛ wɛ mɛɛnɛ; tati ɛ wɛ editi sooti.» 14 Yesu abasɔmbɛdja boo: «Noko ekadaa boo napi tati tina ɛ mbai mɛɛnɛ, tati ɛ mbai edii sooti, tina ɛ boo nadjebaka esika ɛdonga mbai ko esika ɛkeke mbai. Endolo ino, otadjebakani dɔngɔ ladonga mbai ko lakeke mbai. 15 Ino okasambedjaeni na omoto; mbai tesambejae moto. 16 Endolo, ekadaa boo naimei osambedja, esambi ɛ mbai edii sooti, tina ɛ boo naditi mbai buki tina ɛ osambedja, endolo Tata ona ɔlomani adii na mbai engbanga. 17 Ɛkomama ta mobeko ma boono boo ekadaa boo tati epami na bato babae, tati ena edii sooti. 18 Napaka tati tina ɛ mbai mɛɛnɛ ko Tata ona ɔlomani adii opa koko tati tina ɛ mbai.» 19 Bafalusai bamohɔdja boo: «Odii Sangwao hɔɔ?» Yesu abasɔmbɛdja boo: «Otadjebakani na mbai na Tata. Okɔkino djebanini, eke odjebini koko Tata.» 20 Yesu abala na bu bibaeli bia ehole ɛlehaka yo ta tepelo, mbuti na esika ɛisaka bo bipeeli. Pɛpɛ moto ɔmopea, tina ɛ boo ehole ɛ nde eipaka imea.

21 Yesu abala na bu koko boo: «Mbai nakeke; ohombaleanini, endolo ogwaleani ta ndanda ɛ isumu la bono. Ohɔneteleani okɛ ta esika ekɛlea mbai.» 22 Bea Bayuda basabaleaka boo: «Ekɛɛlea yo asaowa yo mɛɛnɛ, tin'ɛ abalaka boo: "Esika ekɛɛlea mbai, ohɔneteleani okɛ oho"?» 23 Yesu abala na bu boo: «Ino odini bato ba nase, endolo mbai nadongi odiko. Ino odini bato ba ngondo hee, endolo mbai naditi moto ɔ ngondo hee. 24 Edii tina ɛbala mbai na nu boo ogwaleani ta ndanda ɛ masumu ma boono. Tina ɛ boo ogwaleani ta masumu ma boono omitidhimani boo mbai "nadii ona odii".» – 25 Bamohɔdja boo: «Wɛ odii nda?» Yesu abasɔmbɛdja boo: «Ona ɔbala mbai na nu donga ibange. 26 Nadii na midjɔ mike ma obala ko maosambɛdja diko la boono. Endolo nadjebedjaka ta ngondo oko mua imaoka mbai odii ona ɔlomani; ko yo, akabale sooti.»

27 Baidjeba boo abalaka na bu tina ɛ Sango. 28 Bea Yesu abala na bu boo: «Ehole eihwedjabino Mwana ɔ moto diko, odjebabini boo mbai "nadii ona odii"; odjebabini boo nitakɔkɔ modjɔ momɔti na opala ba mbai: nabalaka oko mua imalehani Tata. 29 Ona ɔlomani adii na mbai engbanga; aikinani mbai buki, tina ɛ boo ehole esusu nakakɔe midjɔ imikamosepedjae.» 30 Ehole ɛdaka Yesu abala bea, bato bike bamodhimea.

31 Bea Yesu abala na Bayuda ibamodhimea boo: «Ekadaa boo onɛngɛdjaini ta tei ɛ ebaeli ɛ mbai, odiini sooti mɛɛnɛ batingami ba mbai; 32 na bea odjebaleani sooti ko sooti eoimedjaleani basɔmi.» 33 Bamosɔmbɛdja boo: «Lodii mbota ɛ Abalayama ko laida noko osinɛɛ babuli ba moto. Moda ndani ohɔni obala nasu boo: "Oimeleani basɔmi"?» 34 Yesu abasɔmbɛdja boo: «Edii bea, nabalaka na nu sooti: moto mosusu ona odii okɔ isumu adii mobuli ɔ isumu. 35 Mobuli tadikame seko ta ibota, endolo mwana ɔ ibota akadikame seko. 36 Ekadaa boo Mwana aodongedjaini ta ibuli, odabini sooti basɔmi. 37 Nadjebi boo odiini mbota ɛ Abalayama. Endolo ɔhombakani boo ɔowonini, tina ɛ boo todhimeni bibaeli ba mbai. 38 Mbai, nabalaka midjɔ imainedjani Tata, endolo ino, ɔkɔkɔni midjɔ imabala sangwanu na nu.» 39 Bamosɔmbɛdja boo: «Sangwasu, edii Abalayama.» – Yesu abala na bu boo: «Ekadaa boo odakini bana ba Abalayama, okɔki kɔɔni misala ma Abalayama. 40 Endolo hadɛdi, noko nabali na nu sooti ɛikoa mbai odii Ndjambe, ɔhombakani boo ɔwonini. Abalayama aikɔ moda mua! 41 Ino, ɔkɔkɔni misala moda momɔti na sangwanu.» Ibo bamosɔmbɛdja boo: «Iso loditi bana ba bɔɔli. Lodii na Sɛngɛmoto omɔti, Ndjambe.» 42 Yesu abala na bu boo: «Ekadaa sooti boo Ndjambe adii Sangwanu, okɔkipalanini, tina ɛ boo nadonga odii Ndjambe ko nadii haa tina ɛ nde. Naidoa na opala ba mbai mɛɛnɛ, endolo edii yo moto ɔlomani. 43 Tina ndani otasipoakani mii imabalaka mbai? Tina ɛ boo otakini esipoli ɛ ooka bibaeli ba mbai. 44 Sangwanu edii djabulu ko okapale okɔɔni oko midjɔ imikapale yo. Adii moowoi donga ibange. Aemiti ta sooti tina ɛ boo sooti editi ta tei ɛ nde. Aekelana na epulu ko epulu ena ekadonge ta molema ma nde, tina ɛ boo adii moto ɔ epulu ko sɛngɛ epulu. 45 Endolo mbai nabalaka sooti ko ta tina ena otadhimeakanini. 46 Ona ohɔni ta ndanda ɛ boono oinedja boo nakɔɔ isumu nda? Ko ekadaa boo nabalaka sooti, tina eloni no odhimeani nda? 47 Ona odii ɔ Ndjambe akaoke bibaeli ba Ndjambe. Endolo ino oditini bato ba Ndjambe ko na tina ena tookeni.»

48 Bayuda basɔmbɛdja Yesu boo: «Oeni modjɔ imabalaka so odii moto ɔ Samalia ko mwembo mobe modii ta tei ɛ wɛ?» 49 Yesu asɔmbɛdja boo: «Naditi na mwembo mobe, endolo nakakumedjae Tata ko ino, ɔsɛtɔdjakanini. 50 Te hombe ekumu tina ɛ mbai mɛɛnɛ. Edii na moto omɔti ɔyehombaka tina ɛ mbai ko ona ɔsambedjaka. 51 Edii bea, nabali na nu sooti boo: Ona osumaka bibaeli ba mbai agwɛtebi.»

52 Bea Bayuda babala boo: «Hadɛdi lodjebi boo mwembo mobe modii ta tei ɛ wɛ! Abalayama agwa, batɛli bagwa, ko wɛ, obalaka boo: "Ona ɔsumaka bibaeli ba mbai atagwa noko osinɛɛ." 53 Wɛ ɔlɛdjaka boo onoi sangwasu Abalayama? Yo agwa, batɛli bagwa koko. Ɔsatombaka elengɛɛ nda?» 54 Yesu asɔmbɛdja boo: «Ekadaa boo nasakumedjaka mbai mɛɛnɛ, ekumu ɛ mbai editi na tina. Ona okakumedjaeni edii Tata. Ino, okabaleni na nde boo: "Adii Ndjambe ɔ booso", 55 noko bea tomodjebeni. Mbai namodjebaka. Nakabala boo temodjebe, naimei moto ɔ epulu elengɛɛ ino. Endolo mbai namodjebaka ko nakasume bibaeli ba nde. 56 Sangwanu Abalayama, adaa na sepi ena olɛdjaka yo boo aenɛlea iswi la mbai; alienɛ ko aluma na sepi.» 57 Bayuda babala na Yesu boo: «Edii yee, wɛ opakita kokedja noko bianga tuku itano ko odii obala boo oenɛ Abalayama?» 58 Yesu abasɔmbɛdja boo: «Edii bea, nabali na nu sooti: boso ba boo Abalayama abotame, "nadii".» 59 Na bea batuta ndeke bɛngɛ bamolɛ. Endolo Yesu asabomba ko aimwana ta tepelo.