1 Ngɔngɔ dja bibaeli bia, Yesu akɛɛ engbanga na batingami ba nde ta dɔngɔ ikina la mokoko ma Sedolone. Gue ɛdaka ena ɛingea yo engbanga na batingami ba nde. 2 Bea Yudasi, ona ɔmokabalea, adjebaka opele mɛɛnɛ esika ena, tina ɛ boo Yesu na batingami ba nde badoaka ena mbala djike. 3 Yudasi, akɛɛ ta gue na elutulutu ɛ basoda na ba sindjili ba tepelo ibamopa bakumu ba banganga ba Ndjambe na Bafalusai; baimea ena na milodja, na miinda ko na bipeko ba bila. 4 Yesu adjebaka midjɔ misusu imikɔmɔlea na nde, asabatea mbuti na bu ko abahɔdja boo: «Ɔhombakeno nda?» 5 Bamosɔmbɛdja boo: «Yesu ɔ Nasaleta.» Yesu abala na bu boo: «Edii mbai.» Ko Yudasi, omokabi ɔ nde, adaka na bu engbanga. 6 Ehole ɛbala Yesu na bu boo: «Edii mbai», basɔmbɔ ngɔngɔ ko bakwa ta kpɔtɔ. 7 Yesu abahɔdja mbala ekina boo: «Ɔhombakeno nda?» Ko babala na nde boo: «Yesu ɔ Nasaleta.» 8 Yesu abasɔmbɛdja boo: «Nabali na nu ehele boo, edii mbai. Ekadaa boo ɔhombakanini, kinani bii bakina bakɛɛ.» 9 Ɛkɔɔmi bea tina ɛ okokedja ebaeli ena ɛbala yo: «Naibungedja noko omɔti ɔ bato ibapani wɛ.» 10 Simo Piɛlɛ adaka na mopata; amoihwa ta igbogbo, aboma mosali ɔ nganga monɛnɛ ɔ Ndjambe ko amokɛsɛ itoi la ebɔ ɛ bami. Kombe ɛ mosali ona Malakusu. 11 Endolo Yesu abala na Piɛlɛ boo: «Sɔmbɛdja mopata ma wɛ ta igbogbo. Olɛdji boo namwɛtelea kɔbɔ ɛ saya eepini Tata?»

12 Bea elutulutu ɛ basoda engbanga na kumu ɔ bobo na basindjili ba bakumu ba Bayuda bapea Yesu ko bamonanga mbɔti. 13 Bakɛɛ na nde boso mɛɛnɛ odii Ana. Moto hoo adaka okio ba Kaifa ona ɔdaka nganga monɛnɛ ta mbua ona. 14 Ena bea, edii Kaifa moto ona ɔleha Bayuda boo: «Edii opele boo moto omɔti agwɛ tina ɛ bato basusu.»

15 Simo Piɛlɛ na motingami okina bakimanaka Yesu. Motingami ona okina adjebamaka na nganga monɛnɛ ɔ Ndjambe, aingea yo nɔbɔ Yesu ta otei ba tiangando ɛ ndako ɛ nganga monɛnɛ ɔ Ndjambe. 16 Endolo Piɛlɛ adika o sokolu, mbuti na edipako. Na bea motingami ona okina, ɔɔdjebamaka na nganga monɛnɛ ɔ Ndjambe, aimana osokolu ko abala na mwali ona ɔbaneaka edipako, ko aingedja Piɛlɛ. 17 Mosali mwali ona ɔɔbaneaka edipako abala na Piɛlɛ boo: «Wɛ oditi koko, omɔti ɔ batingami ba moto onaho?» Piɛlɛ amosɔmbɛdja boo: «Pɛpɛ, editi mbai.» 18 Ɛdaka ehole ɛ piɔ; basali na basindjili ba tepelo bayodja mosa ko badaka baemi ena baoka. Piɛlɛ koko adaka aemi engbanga na bu ko aokaka mosa.

19 Na bea nganga monɛnɛ ɔ Ndjambe ahɔdja Yesu diko la batingami ba nde ko diko la bileho ba nde. 20 Yesu amosɔmbɛdja boo: «Nabala ohuu odii bato basusu; nalehaka maswi masusu ta ndako dja miongɔɔnɔ dja Bayuda ko ta tepelo, ta bisika bikasakane Bayuda basusu; naibala modjɔ momɔti ta mbombi. 21 Ɔhɔdjakani tina nda? Hɔdja odii bia ibaoka midjɔ imabala mbai na bu: ibo badjebaka opele, midjɔ mabala mbai.» 22 Ehole ɛbala Yesu bea, omɔti ɔ basindjili ibadaka ena aboma Yesu epataka ko abala na nde boo: «Moda masɔmbɛdjaka wɛ nganga monɛnɛ ɔ Ndjambe imua?» 23 Yesu amosɔmbɛdja boo: «Nga nakabala obe, inedjani obe bua; endolo ekadaa boo modjɔ mobali mbai modii sooti, tina ebomini na wɛ nda?» 24 Ana amoloma anangi na mbɔti, odii Kaifa nganga monɛnɛ ɔ Ndjambe.

25 Ta ehole ena, Simo Piɛlɛ, adaka aemi ena aoka mosa. Bamohɔdja boo: «Wɛ oditi, koko, omɔti ɔ batingami ba moto hoo?» Endolo Piɛlɛ amoingana abala boo: «Pɛpɛ, editi mbai.» 26 Omɔti ɔ basali ba nganga monɛnɛ ɔ Ndjambe, ɔdaka bwela ba moto ona ɔlena Piɛlɛ itoi, abala na nde boo: «Edii sooti wɛ ona oeni mbai nɔnɔ nde ta gue?» 27 Endolo Piɛlɛ amoingana mbala ekina. Oko ta ehole ena kɔkɔ akɔkɔlɔ.

28 Sɔɔ mɛɛnɛ, badonga odii Kaifa ko bakɛɛ na Yesu ta ndako ɛ gupunɛlɛ ɔ baloma. Bakumu ba Bayuda balona oingia ta ndako ɛ Pilato tina ɛ basakaimea mbindo ko bɛngɛ bayake mia ma Pasika. 29 Ta tina hee gupunɛlɛ Pilato akɛɛ abatanea o sokolu. Abahɔdja boo: «Modjɔ mapundakano moto hoo nda?» 30 Bamosɔmbɛdja boo: «Okɔki yo daa pɛpɛ oda moto mobe, eke lodoiti amokaba odii wɛ.» 31 Pilato abala na bu boo: «Motombani ino mɛɛnɛ ko mosambedjani okimana na mobeko ma boono.» Bamosɔmbɛdja boo: «Bayuda babala na nde boo loditi na enɔli ɛopa moto etumbu ɛ ogwa». 32 Na bea bakokedja ebaeli ɛbala Yesu tina ɛ oinedja mondumba ma ogwa ba nde. 33 Bea Pilato aingea ta ndako; abea Yesu ko amohɔdja boo: «Odii kumu ɔ Bayuda?» 34 Yesu amosɔmbɛdja boo: «Modjɔ mua modongi odii wɛ mɛɛnɛ kaoko bato bakina babali na wɛ tina ɛ mbai?» 35 Pilato amosɔmbɛdja boo: «Edii mbai Moyuda? Edii denga la wɛ mɛɛnɛ na bakumu ba banganga ba Ndjambe ibo bato badoi aokaba odii mbai; modjɔ mokɔi wɛ nda?» 36 Yesu asɔmbɛdja boo: «Okumu ba mbai boditi ba ngondo hee; okɔki bo daa ba ngondo hee, basali ba mbai bakɔki ona bila bɛngɛ boo nadae pɛpɛ okabama odii bakumu ba Bayuda. Endolo, okumu ba mbai boditi ba ngondo hee.» 37 Bea Pilato abala na nde boo: «Bea odii kumu?» Yesu amosɔmbɛdja boo: «Wɛ moto obali boo: nadii kumu. Nabotama ko nadoa ta ngondo bɛngɛ napɛ tati diko la sooti. Moto na moto ona odii ta sooti akaoke bibaeli ba mbai.» 38 Pilato amohɔdja boo: «Edii sooti yee?»

Ngɔngɔ dja obala bea, Pilato akɛɛ naikina osokolu odii Bayuda. Abala na bu boo: «Mbai nadihiti noko modjɔ momɔti maodumba moto hoo na ikambo. 39 Endolo okimana na okimana na moda maekelanano, nakaotingoeni moto ɔ bɔlɔkɔ omɔti engi tɛkɛ ɛ Bayuda ɛ Pasika. Ɔpalakani boo naotingoeni kumu ɔ Bayuda?» 40 Basɔmbedja na ogama boo: «Ngasa, yo pɛpɛ! Endolo Balaba!» Ena bea, Balaba adaka moibi ko moowoli ɔ bato.