1 Bea Pilato apa enɔli boo badoe na Yesu ko bamobome pimbo. 2 Basoda bayoa egbala ɛ ndjubɛ ko bayebakea ta molo ma Yesu; bamolwɛdja koko mokoto mokpetu. 3 Babatama na nde ko babala na nde boo: «Bwanda, kumu ɔ Bayuda!» Ko bamoboma bipataka. 4 Pilato aimani koko o sokolu ko abala na bu boo: «Naduake na nde haa, osokolu, bɛngɛ ɔdjebeni boo naeniti modjɔ mobe ta tei ɛ nde maomodumba na ikambo.» 5 Bea Yesu aimana ena alwali egbala ɛ ndjubɛ na mokoto mokpetu. Ko Pilato abala na bu boo: «Hokeani moto!» 6 Endolo ehole ɛenɛ bakumu ba banganga ba Ndjambe na basindjili Yesu, bagama boo: «Ta ekulusu! Ta ekulusu!» Pilato abala na bu boo: «Motombani ino mɛɛnɛ ko mobakani ta ekulusu, tina ɛ boo mbai nadihiti modjɔ maomodumba na ikambo.» 7 Bayuda bamosɔmbɛdja boo: «Iso lodii na mobeko, ko okimana na mobeko mua eboani boo agwɛ, tina ɛ boo asaimedjaka Mwana ɔ Ndjambe.» 8 Ehole ɛoka Pilato ebaeli ena, adaa na bɔɔ bonɛnɛ. 9 Aingia ta ndako ko abala na Yesu boo: «Ekomi ɛ wɛ nda?» Endolo Yesu aimosɔmbɛdja. 10 Bea Pilato abala na nde boo: «Oloni osɔmbɛdjani? Otadjebaka boo nadii na kpati ɛ otingoa ko nadii koko na kpati ɛ obaka ta ekulusu?» 11 Yesu amosɔmbɛdja boo: «Oditi noko na kpati emɔti diko la mbai dongedjaka oko ena eopi Ndjambe. Na tina hee, moto okabini odii wɛ isumu la nde inɔi la wɛ.» 12 Donga ehole ena, Pilato ahombaka ndjia ɛ otingoa Yesu. Endolo Bayuda babanga ogama boo: «Okatingoa moto ona, oditi modjebaneli ɔ Kaisala! Moto mosusu okasaimedjae kumu, adii moini ɔ Kaisala!» 13 Ehole ɛoka Pilato ebaeli ena, aimanedja Yesu osokolu; adaa ta kiti ɛ djudji ta ndjia ɛ ndeke ekabee bo ta liebele«Gabata*». 14 Ɛdaka busa ba mosalingo ma tɛkɛ ɛ Bayuda ɛ Pasika, mbuti na ndanda ɛ busa. Pilato abala na Bayuda boo: «Hokeani Kumu ɔ boono!» 15 Endolo bagama boo: «Agwɛ! Agwɛ! Mobaka ta ekulusu!» Pilato abala na bu boo: «Nabake kumu ɔ boono ta ekulusu?» Bakumu ba banganga ba Ndjambe basɔmbɛdja boo: «Pɛpɛ okina Kumu odii na su dongedja oko Kaisala.» 16 Bea Pilato abapa Yesu boo bamobake ta ekulusu. Bea bakɛɛ na Yesu.

17 Yesu alwa ekulusu ɛ nde yo mɛɛnɛ tina ɛ oimana ta ibonga ko akɛɛ ta esika ɛbeaka bo ta liebele«Gologota*.» 18 Edii ena esika ɛmobaka basoda ta ekulusu. Babaka koko bami babae ta bikulusu, omɔti ta dɔngɔ la ebɔ ɛ nde ɛ bami okina ta dɔngɔ la ebɔ ɛ bali, ko Yesu ndanda. 19 Pilato apa koko enɔli boo bakome ikomi ko baliise diko la ekulusu; ɛɛkomama ena boo: «Yesu ɔ Nasaleta, kumu ɔ Bayuda.» 20 Bayuda bike balanga ikomi dia, tina ɛ boo esika ɛbaka bo Yesu ta ekulusu ɛdaka mbuti na ibonga ko lakomama na kɔpɛ ɛ liebele, kɔpɛ ɛ Baloma ko na kɔpɛ ɛ gɛlɛke. 21 Bea bakumu ba banganga ba Ndjambe ba Bayuda babala na Pilato boo: «Oboaniti okina ikomi dii boo "kumu ɔ Bayuda", endolo koma boo: "Moto hoo abali boo: Nadii kumu ɔ Bayuda."» 22 Pilato asɔmbɛdja boo: «Midjɔ imikomi mbai midikamalea oko moda mua.»

23 Ehole ɛbaka basoda Yesu ta ekulusu, batomba bisendja ba nde ko babikaana na mabondo manei, tu soda la nde ibondo. Batomba koko mokoto ma nde, imadaka pɛpɛ otongama, madaka oko esendja emɔti donga odiko mbunoko nase. 24 Basoda basabaleana boo: «Lotakala mokoto muu, endolo labome djonga tina ɛ odjeba moto ndani omotombalea.» Ɛkɔɔmɔ bea bɛngɛ boo Ikomi dii lakokedjame:

«Basakaanea bisendja ba mbai

ko baboma djonga tina ɛ mokoto ma mbai.»

Hokea moda makɔɔ basoda.

25 Nɛngɛ Yesu adaka aemi mbuti na ekulusu, ngɛnɛ ɛ nango, Malia mwali ɔ Kolopasi na Malia ɔ Magadala. 26 Yesu aenɛ nango ko, mbuti na nde, motingami ona ɔpalaka yo. Abala na nango boo: «Mama, hokea mwana ɔ wɛ.» 27 Ngɔngɔ djia abala na motingami boo: «Hokea ngwao.» Ko donga ehole ena, motingami ona amotombi ta ndako ɛ nde.

28 Ngɔngɔ djia, ena ɔdjeba Yesu boo midjɔ misusu mikoki, ta okokedja imakomama, abala boo: «Naoki posa ɛ madiba.» 29 Ɛdaka ena na kulutu ɛlumake na vino ɛ ngai. Basoda badubea imbusu ta vino ɛ ngai, balihangea ta sɔngɔ ɛ mokɛɛlɛ ma isope ko balihweedja mbunoko ta monɔkɔ ma Yesu. 30 Ɔsidja Yesu omwa vino ɛ ngai abala boo: «Misusu mikoki!» Bea, asunea molo ma nde ko agwa.

31 Ɛdaka iswi la mosalingo ma sabata ko boo sabata ena ɛdaka iswi inɛnɛ, bakumu ba Bayuda baipalaka boo ndjemba dja bato djadikae ta bikulusu ta busa ba sabata; bea bakɛɛ ahɔdja Pilato boo babuke mako ma bato ibabakama ta ekulusu ko babadongedjae. 32 Basoda bakɛɛ ko babuka mako ma moto ɔ boso ko ma moto ɔ babae ibabakama na Yesu engbanga. 33 Ɔimea bo odii Yesu, baenɛ boo asii ogwa; ta tina hee baibuka mako ma nde. 34 Endolo omɔti ɔ basoda aindea mopandje ma nde na ikɔngɔ, ko makia na madiba maimana ena ambuku. 35 Moto ona ɔpaka tati ɛ midjɔ mia misusu imanɔɔ amienɛ na miso ma nde, ko tati ɛ nde edii sooti, yo adjebi boo, abali sooti. Apa tati ena bɛngɛ boo ino koko ɔdhimeni. 36 Na tina hee, midjɔ mia misusu makɔɔmɔ tina ɛ okokedja Ikomi: «Babuketebi noko mokua ma nde momɔti.» 37 Ikomi likina libali koko boo: «Bahokeabi odii ona ɔindea bo.»

38 Ngɔngɔ djia, Yosepu, moto ɔ Alimate, ahɔdja Pilato enɔli boo atombe ndjemba ɛ Yesu. – Yosepu adaka motingami ɔ Yesu, endolo na mbombi tina ɛ boo abangaka bakumu ba Bayuda. – Ko Pilato amopa enɔli. Bea Yosepu akɛɛ ko atomba ndjemba ɛ Yesu. 39 Nikodɛmɛ, ona ɔkɛkɛ odii Yesu na bulu, adoa koko na kilo mbuti na tuku isato dja munɛ ma mile na aloesi idjasanganedja bo. 40 Ibo basusu babae batomba ndjemba ɛ Yesu ko bayedinga na biale ba bisendja bipu, ibasopea bo minɛ ma malasi, moda maa ekelana Bayuda opusea bato ba bobo. 41 Ta esika ɛbakabo Yesu ta ekulusu, gue emɔti ɛdaka ena, ko ta gue ena ikila iladaa bo pɛpɛ okunda moto boso ladaka. 42 Bapusea Yesu ena tina ɛ boo ɛdaka iswi la mosalingo ma sabata ɛ Bayuda ko tina ɛ boo ikila ladaka mbuti.