1 Sɔɔ mɛɛnɛ ta busa ba eyenga, ɛdaka oko modidi, Malia ɔ Magadala akɛɛ ta ikila. Aenɛ boo mondeke madongedjama ta eingeli ɛ ikila. 2 Bea apeta ebango tina osaka na Simo Piɛlɛ ko na motingami ona ɔpalaka Yesu, abala na bu boo: «Badɔngedjai Kumu ta ikila, ko lotadjeba esika emoisi bo.» 3 Piɛlɛ na motingami ona okina baimana ko bakɛɛ ta ikila. 4 Bea papeta ibo basusu babae; endolo motingami ona okina anɔɔ Piɛlɛ na ebango ko aimea boso ta ikila. 5 Asunama tina ɛ oindja ko aenɛ biale ba bisendja ibakunda na bu Yesu bisambi ta kpɔtɔ, endolo aiwaingea. 6 Ɔimea Simo Piɛlɛ, ona ɔdoa ngɔngɔ dja nde, aingea ta ikila. Aenɛ biale ba bisendja bisambi ta kpɔtɔ 7 ko na yale ɛ esendja ena ɛhuaka molo ma Yesu; yale ena ɛ esendja ɛidaka na biale ba bisendja bikina esika emɔti, endolo ɛdaka ebulukamake esika ekina. 8 Na bea, motingami ona okina, ona ɔimeaka boso ta ikila, aingea koko. Aenɛ ko adhima. 9 Tina ɛ boo batingami baipakasipoa Makomi imadjebedjaka boo Yesu aboanaka opusoa ta ndanda ɛ bago. 10 Ngɔngɔ djia batingami bia babae basɔmbɔ odii bo.

11 Malia adaka aemi, o sokolu, mbuti na ikila, ko ayeaka. Ena ɔdaka yo ayea, asunama tina ɛ ohokea ta ikila; 12 aenɛ babwɛndi babae na bisendja bipu badii ta esika ɛsambea bo ndjemba ɛ Yesu, omɔti ta dɔngɔ la molo, okina ta dɔngɔ la mako. 13 Babwɛndi bamohɔdja boo: «Tina ɛyeaka na wɛ nda?» Abasɔmbɛdja boo: «Badongedjai Kumu ɔ mbai ko natadjebaka esika emoisi bo.» 14 Ngɔngɔ dja obala bea, ahombana ko aenɛ Yesu ona ɔdaka aemi ena, endolo aidjeba boo ɛdaka Yo. 15 Yesu amohɔdja boo: «Tina ɛyiaka na wɛ nda? Ɔhombaka wɛ nda?» Alɛdjaka boo ɛdaka mosali ɔ gue, ta tina hee abala na nde boo: «Kumu, ekada wɛ moto omotombi, tɔndɔni esika emoisi wɛ, ko nakɛlea amotomba.» 16 Yesu abala na nde boo: «Malia!» Malia ahombana odii yo ko abala na nde na kɔpɛ ɛ liebele boo: «Labuni!» – Etingodjai boo «Molehi». 17 Yesu abala na nde boo: «Pɛpɛ opeani, tina ɛ boo napakita sɔmbɔ odii Tata. Endolo kɛɛ atɔndɔe banainga boo nasɔmbi odii Tata ona odii Sangwanu koko, odii Ndjambe ɔ mbai ona odii Ndjambe ɔ boono koko.» 18 Bea Malia ɔ Magadala akɛɛ adjebedja batingami boo: «Mbai naeni Kumu!» Ko abatɔndɔ midjɔ imabala yo na nde.

19 Mɔkɔmɔkɔ ma busa bua ba eyenga, batingami badaka baboli ta otei ba ndako. Badipa bidipako na fungola, tina ɛ boo badaka na bɔɔ ba bakumu ba Bayuda. Yesu adoa ko aema ta ndanda ɛ bobo, abala na bu boo: «Yɛɛ ogoo badae na nu!» 20 Ngɔngɔ dja obala bea, abainedja mabɔ ma nde na mopandje ma nde. Batingami baluma na sepi ɔenɛ bo Kumu. 21 Yesu abala na bu koko boo: «Yɛɛ ogoo badae na nu! Oko moda imalomani Tata, mbai koko naolomini.» 22 Ngɔngɔ dja bibaeli bia, abahwea mohuli ko abala na bu boo: «Osɔni Mwembo Mosɛnɔke! 23 Odii ibia bayɛɛbino masumu ma bobo bayɛɛmɛbi; odii bia ibalonabino oyɛɛmɛ bayɛɛmetebi.»

24 Bea, omɔti ɔ batingami doomi na babae, Toma – ona ɔbeakabo Ipasa – aidaka na bu engbanga ehole ɛdoa Yesu. 25 Batingami bakina babala na nde boo: «Loeni Kumu.» Endolo Toma abasɔmbɛdja boo: «Namiti enɛ pola dja sɛtɛ ta mabɔ ma nde, namiti isa mosapi ma mbai ta pola dja sɛtɛ ko ebɔ ɛ mbai ta mopandje ma nde, nadhimetelea.» 26 Ngɔngɔ dja eyenga emɔti, batingami badaka baboli koko ta ndako, ko Toma adaka engbanga na bu. Bidipako bisusu badaka bidipi na fungola, endolo Yesu adoa ko aemaa ta ndanda ɛ bobo, abala na bu boo: «Ogoo badae na nu!» 27 Bea Yesu abala na Toma boo: «Isa mosapi ma wɛ haa ko hokea mabɔ ma mbai; linda ebɔ ɛ wɛ ko yeisa ta mopandje ma mbai. Kina oboma kitɛ ko dhima!» 28 Toma amosɔmbɛdja boo: «Kumu ɔ mbai ko Ndjambe ɔ mbai!» 29 Yesu abala na nde boo: «Odhimi oko ta tina ɛ boo oenini? Sepi odii bia ibadimi pɛpɛ oenɛni!»

30 Yesu akɔɔ koko, boso ba batingami ba nde, bimbete bike ba okamoa ibada pɛpɛ okomama ta mokanda muu 31 Endolo bii bakomama bɛngɛ ɔdhimeni boo Yesu adii Masia, Mwana ɔ Ndjambe, ko okamodhimeani, ɔdihebini mohelo ta kombe ɛ nde.