Maria

O anđeo phenela e Marijaće so ka bijani e Isuse

26 Kad i Jelisaveta inele šofto masek khamni, o Devel bičhalđa ple anđeo e Gavrilo ki diz Nazaret ani regija Galileja. 27 Adari valjanđa te legari o lafi e Marijaće koja pana inele čhaj. Oj inele mangli e muršese palo anav Josif, kova inele oto pleme e carosoro e Davidesoro.

28 Kad alo o anđeo, phenđa e Marijaće: "Radujin tut! O Gospodi tuja! Ovi but milostivno premala tute!"

30 A o anđeo phenđa laće: "Ma dara, Marije! O Devel mothovđa će pli milost! 31 Ače, ka ačhove khamni hem ka bijane čhave, i ka de le anav Isus. 32 Ov ka ovel baro hem ka vičini pe Čhavo e Najbare Devlesoro. O Devel o Gospod ka del le o presto lesere pradadesoro e Davidesoro. 33 Ka carujini upro pleme e Jakovesoro zauvek; zako lesoro carstvo naka ovel kraj."

O Josif prihvatini e Isuse sar ple čhave

18 Ače sar inele kad bijandilo o Isus o Hrist: Lesiri daj i Marija inele mangli e Josifese. Ali angleder so te len pe, dodžanđa da ačhili khamni oto Sveto Duho.

I Marija hvalini e Devle

46 Tegani i Marija phenđa:

"Mli duša barjari e Gospode;

47 Mloi duho radosno ano Devel, ano mlo Spasitelj,

48 so ulo milostivno upri poniznost ple sluškinjakiri.

I ače, od akana sa o generacije ka phenen da injum blagoslovime đuvli,

49 adalese so bare šukaripa ćerđa maje o Zoralo Devel

kasoroi anav sveto!

50 Ovi milostivno e manušenđe tari generacija ki generacija

kola darana olestar.

51 Ple zorale vasteja ćerđa bare buća;

rasfrdinđa e manušen kolai barikane ano pumare vile.

52 Peravđa e vladaren taro lengoro prestolje,

a vazdinđa e poniznonen.

53 Čaljarđa e bokhalen šukaripnaja,

a čučen muklja e barvalen.

54 Pomožinđa e Izraelconenđe, ple slugenđe.

Na bisterđa te ovel milostivno

55 e Avraamese hem lesere potomkonenđe zauvek,

sar so dinđa plo lafi amare pradadenđe."

4 Ađahar da o Josif, adalese so inele potomko e carosoro e Davidesoro, dželo tari diz Nazaret oti regija Galileja ko gav Vitlejem oti regija Judeja, kote o David bijandilo. 5 Dželo adari sar te prijavini pe zako popis pe verenicaja e Marijaja koja inele khamni. 6 I sar on inele ano Vitlejem, alo e Marijakoro vreme te bijani. 7 I bijanđa ple prvone čhave. Paćarđa le hem pašljarđa le ano jasle adalese so ki gostionica na inele than olenđe.

19 A i Marija sa adava garavđa pese ano vilo hem razmislinđa adalestar.

34 Tegani o Simeon blagoslovinđa len hem phenđa e Marijaće, e Isusesere dajaće: "Dikh, akavai čhavoro birime te ćerel buten te peren hem te ušten ano Izrael. Ovi odredime te ovel e Devlesoro znako, ali but džene ka odbacinen le. 35 Adava ka ovel sar te mothoven pe bute manušengere garavde mislija. A o mači ka posaj ti duša."

48 I kad dikhlja le lesoro dad hem lesiri daj, inele iznenadime. Lesiri daj phenđa lese: "Mlo čhavo, vaćer sose adava ćerđan amenđe? To dad hem me but darandiljam hem rodinđam tut!"

49 A o Isus pučlja len: "Sose rodinđen man? Na džanđen li so valjani te ovav ano čher mle Dadesoro?"

50 A i Marija hem o Josif na halile so o Isus manglja te phenel lenđe adaleja.

51 I palo adava, o Isus irinđa pe olencar ko Nazaret hem ine lenđe poslušno. A lesiri daj garavđa pese ano vilo sa adava so ulo.

3 Kad na ačhili više mol ko bijav, e Isusese phenđa lesiri daj: "Nane len više mol."

4 O Isus phenđa laće: "So isi man adaleja, đuvlije? Mlo vreme pana na alo."

5 Lesiri daj phenđa e slugenđe: "Ćeren sa so vaćeri tumenđe!"

25 A uzalo e Isusesoro krsto terđovena ine e Isusesiri daj, lakiri phen, i Marija e Klopesiri romni hem i Marija Magdalena.

26 Kad o Isus dikhlja pla daja hem uzalo late e učeniko kole but volinđa, phenđa laće: "Đuvlije, ače tuće čhavo."

27 A e učenikose phenđa: "Ače tuće daj."

Hem otegani o učeniko lelja la peste.

E Isusesiri čačikani porodica

31 Tegani e Isusesiri daj hem lesere phralja resle adari. Sar terđovena ine avri, bičhalde nekas koro leste te vičini le.

32 A uzalo leste bešena ine but džene, i phende lese: "Eče, ti daj hem te phralja terđovena avri hem mangena te dikhen tut."

33 A o Isus pučlja len: "Koi mli daj hem mle phralja?"

34 Tegani dikhlja nakoro manuša kola bešena ine ko krugo uzalo leste hem phenđa: "Ače, akalai mli daj hem mle phralja. 35 Adalese so, svako kova ćerela i volja e Devlesiri, ovi mlo phral, hem mli phen, hem mli daj."

55 Nane li akava e kaštarutnesoro čhavo? Nane li lesiri daj i Marija, a lesere phralja o Jakov, o Josif, o Simon hem o Juda? 56 Hem nane li sa lesere phenja akate amencar? Kotar lese onda sa adava?"

14 Sare on bizo ačhojba sar jekh molinde pe e đuvljencar hem e Marijaja, e Isusesere dajaja, hem lesere phraljencar.