1 O Devel na bisterđa upro Noje hem upro sa o divlja životinje hem i stoka save inele oleja ani barka, pa ćerđa i barval te phudel upri phuv, hem o pani lelja te cidel pe. 2 Phandlile o izvorija tali phuv hem o brane e nebosere, i o bršim ačhilo te perel taro nebo. 3 O pani hari po hari cidela pe ine tari phuv, a palo šelu pinda dive edobor pelo tele 4 da ko dešu eftato dive oto eftato masek i barka ačhili ki planina Ararat. 5 O pani stalno cidela pe ine natele đi ko dešto masek, a ko prvo dive oto dešto masek lelje te dičhon o naj uče thana e planinengere.

6 Palo saranda dive, o Noje phravđa o prozori savo ćerđa ki barka 7 hem muklja avri e gavrane. O gavran odletini ine hem irini pe sa đikote sa o pani na cidinđa pe tari phuv. 8 Tegani o Noje muklja hem e golubica, te dikhel da li o pani cidinđa pe tari površina e phuvjakiri. 9 Ali i golubica na arakhlja than ko savo te mukel pe, adalese so o pani pana učharđa sa i površina e phuvjakiri, pa irinđa pe koro Noje ani barka. Ov pružinđa plo vas, dolinđa e golubica hem anđa la ani barka. 10 O Noje adžićerđa pana efta dive, i palem muklja e golubica tari barka. 11 I golubica irinđa pe angli rat, i dikh, ano muj ine laće tek čhindo listo oti maslina. Palo adava o Noje džanđa da o pani cidinđa pe tari phuv. 12 Tegani ov adžićerđa pana efta dive, i palem muklja e golubica, ali oj više na irinđa pe koro leste.

13 Kad e Noje ine šovšelu jekh berš, ko prvo dive oto prvo masek, o pani cidinđa pe tari phuv. O Noje phravđa jekh deo e krovesoro oti barka, dikhlja okolo, i eče, i površina e phuvjakiri šuki. 14 Đi ko bišu eftato dive oto dujto masek i phuv inele skroz šuki.

15 Tegani o Devel phenđa e Nojese: 16 "Ikljov tari barka, tu, ti romni, te čhave hem lengere romnja. 17 Tuja ikal hem sa e dživde bićen savei tuja: e čirikljen, e životinjen hem sa okolen so lazinena phuvjaja. Nek i phuv pherđol olencar, nek oven plodna hem nek množinen pe ki phuv."

18 I o Noje iklilo zajedno pla romnjaja, ple čhavencar hem lengere romnjencar. 19 Sa o životinje, sa okola so lazinena phuvjaja hem sa o čiriklja – sa so džala phuvjaja – iklile tari barka, vrsta pali vrsta.

20 Tegani o Noje vazdinđa žrtveniko e GOSPODESE, i lelja oto sa o čista životinje hem oto sa o čista čiriklja hem adathe žrtvujinđa len sar žrtve paljenice.

21 O GOSPOD mirišinđa adava prijatno miris, i phenđa ana peste: "Nikad više naka prokletinav i phuv zbog o manuš, iakoi lesere mislija pana taro tikoripe bišukar, hem nikad više naka uništinav sa e dživde bićen sar so ćerđum.

22 Sa đikote ka ovel i phuv, ka ovel

sejiba hem čediba,

šil hem tatipe, linaj hem jevend,

dive hem rat."