1 A ani phuv inele bokhalipe sar ano okova vreme e Avraamesoro, pa o Isaak dželo ano Gerar koro Avimeleh, o caro e Filistejconengoro.

2 O GOSPOD mothovđa pe e Isaakese hem phenđa: "Ma dža tele ano Egipat, nego le živin ani phuv ani savi me ka phenav će. 3 Ov nesavo vreme ani akaja phuv, a me ka ovav tuja hem ka blagoslovinav tut. Adalese so, tuće hem te potomkonenđe ka dav sa akala phuvja hem ka potvrdinav o obećanje savo dinđum te dadese e Avraamese. 4 Ka umnožinav to potomstvo sar o čerenja ko nebo hem ka dav len sa akala phuvja. Sa o narodija ki phuv ka oven blagoslovime prekalo to potomstvo 5 adalese so o Avraam ine maje poslušno hem ićerđa pe ko sa so phenđum lese, ko mle naredbe, odredbe hem zakonja."

6 Ađahar o Isaak ačhilo ano Gerar.

7 Kad o manuša kola živinde adari pučle le zaki lesiri romni, ov phenđa lenđe: "Oj mli phen", adalese so darandilo te phenel: "Oj mli romni." Mislinđa: "Akava narodo šaj te mudari man zbog i Reveka, adalese soi šuži."

8 Kad o Isaak već but vreme inele ano Gerar, o Avimeleh, o caro e Filistejconengoro, dikhlja taro prozori, a kad adari – o Isaak milujini pla romnja e Reveka!

9 O Avimeleh vičinđa e Isaake hem phenđa: "Znači, oj ti romni! Sose phenđan: ‘Oj mli phen?’ "

O Isaak phenđa: "Adalese so mislinđum da zbog olate šaj te ovav mudardo."

10 Ko adava o Avimeleh phenđa: "So ćerđan amenđe adava? Neko oto manuša šaj ine te sovel te romnjaja, pa ađahar ka čhive ine krivica upro amende!"

11 Onda o Avimeleh naredinđa sa e narodose: "Ko ka ćerel nešto bišukar akale manušese ili lesere romnjaće, ka ovel mudardo."

12 O Isaak sejinđa ko njive ani adaja phuv, hem ano isto berš čedinđa o bijandipe šel puti više, adalese so o GOSPOD blagoslovinđa le. 13 Ađahar ov barvalilo hem lesoro barvalipe sa po više barilo, sa đikote na ulo but barvalo. 14 Inole edobor sitno hem krupno stoka hem edobor sluge da sa o Filistejci inele ljubomorna. 15 Adalese o Filistejci phuvjaja pherde sa o bunarija save handle o sluge lesere dadesere e Avraamesere.

16 Tegani o Avimeleh phenđa e Isaakese: "Dža amendar, adalese so uljan po zoralo amendar."

17 I o Isaak dželo adathar hem vazdinđa po šatori ani dolina e Geraresiri, pa adari živinđa. 18 Ov palem handlja o bunarija save inele handle ano vreme lesere dadesoro e Avraamesoro, a saven o Filistejci palo e Avraamesoro meriba phuvjaja pherde, hem dinđa len ista anava sar so dinđa len hem lesoro dad.

19 Kad e Isaakesere sluge handle ani dolina, arakhle bunari e dživde panjeja, 20 o gerarska pastirija dolinde pe ki kavga e Isaakesere pastirencar, vaćerindoj: "Adavai amaro pani!"

Adalese o Isaak adava bunari vičinđa Esek,* adalese so zbog adava bunari ćerde kavga oleja. 21 Tegani handle aver bunari, ali hem zako olese inele kavga. Adalese o Isaak vičinđa le Sitnah.* 22 O Isaak dželo adathar, pa handlja pana jekh bunari, i niko na ćerđa kavga zako olese. O Isaak vičinđa le Rehovot,* vaćerindoj: "O GOSPOD dinđa amen akana baro than te množina amen ki phuv."

23 Adathar o Isaak dželo ani Beer Ševa.

24 Adaja rat o GOSPOD mothovđa pe lese hem phenđa: "Me injum o Devel te dadesoro e Avraamesoro. Ma dara, adalese so me injum tuja. Ka blagoslovinav tut hem ka umnožinav te potomkonen zbog mlo sluga o Avraam."

25 O Isaak adari ćerđa žrtveniko hem pokloninđa pe e GOSPODESE. Adari vazdinđa po šatori, a lesere sluge lelje te hanen bunari.

26 Taro Gerar o Avimeleh ple savetnikoja e Ahuzateja hem e Piholeja, e zapovednikoja lesere vojskakere, alo koro Isaak.

27 O Isaak pučlja le: "Sose aljen kora mande kad mrzinena man hem kad phenđen maje te džav tumendar?"

28 On phende lese: "Dikhljam dai o GOSPOD čače tuja, pa mislinđam da amen maškar amende valjani te ha sovli. Ana te phanda savez tuja 29 da naka ćere amenđe bišukaripe, sar so hem ni amen tuće na ćerđam bišukaripe, nego tuja uvek injamle šukar hem mukljam tut te dža ano mir. A akana o GOSPOD blagoslovinđa tut."

30 Tegani o Isaak pripreminđa lenđe gozba, pa hale hem pile. 31 Sabale uštine rano hem jekh averese hale sovli. O Isaak onda ispratinđa len, hem on džele olestar ano mir.

32 Adava dive e Isaakesere sluge ale hem javinde lese oto bunari savo handle. Phende lese: "Arakhljam pani!" 33 Adava bunari vičinđa Šiva. Adalese hem avdive adaja diz vičini pe Beer Ševa.

34 Kad e Isave ine saranda berš, ženinđa pe e Juditaja koja inele čhaj e Beerijasiri e Hetitesiri hem e Bosmataja koja inele čhaj e Elonesiri e Hetitesiri. 35 On duj džene ćerde bare muke e Isaakese hem e Revekaće.