1 Ađahar inele završime o nebo hem i phuv hem sa soi ano lende.

2 Đi o eftato dive o Devel završinđa sa ple delja, a ko eftato dive o Devel odmorinđa pe oto sa ple delja. 3 Tegani o Devel blagoslovinđa o eftato dive hem posvetinđa le, adalese so ko adava dive odmorinđa pe oto sa ple delja save stvorinđa.

4 Adavai o izveštaj e nebostar hem e phuvjatar kad inele stvorime.

Kad o GOSPOD o Devel stvorinđa i phuv hem o nebo,

5 pana na iklile ni divlja, a ni poljska biljke ki phuv, adalese so o GOSPOD o Devel pana na muklja bršim upri phuv hem na inele manuš te ćerel buti upro late, 6 nego andral oti phuv o pani uštela ine hem natopini i površina e phuvjakiri.

7 O GOSPOD o Devel oblikujinđa e manuše oto prah e phuvjakoro, hem ano nak phudinđa lese o dah e dživdipnasoro, hem o manuš ulo dživdo biće. 8 Tegani o GOSPOD o Devel zasadinđa o vrt ano Eden, ko istok, hem ano leste čhivđa e manuše kole oblikujinđa. 9 O GOSPOD o Devel ćerđa oti phuv te barjon svako vrsta oto kašta savei šukar zako dikhiba hem šukar zako hajba, a ano maškar e vrtesoro inele o kaš e dživdipnasoro hem o kaš e pendžaripnasoro, savo dela te džanel pe soi šukar, a soi bišukar.

10 Taro Eden ikljola ine i len savi natopini ine o vrt, a adathar razdvojini pe ine ko štar avera glavna lenja. 11 I prvo vičini pe Pišon hem thavdela maškari sa i phuv Havila, ani savi isi zlato. 12 O zlato adala phuvjakoroi but šukar, a ano late isi hem mirisna smole hem draga bara oniks. 13 I dujto len vičini pe Gihon hem thavdela maškari sa i phuv Kuš. 14 I trito len vičini pe Tigar hem thavdela istočno oti Asirija. I štartoi len Eufrat.

15 O GOSPOD o Devel lelja e manuše hem čhivđa le ano edensko vrt, te ćerel buti ano leste hem te brinini olestar.

16 O GOSPOD o Devel naredinđa e manušese: "Oto svako kaš ano vrt šaj slobodno te ha, 17 ali oto kaš e pendžaripnasoro, savo dela te džanel pe soi šukar, a soi bišukar ma te ha! Adalese so, ko adava dive kad olestar ka ha, sigurno ka mere."

18 Tegani o GOSPOD o Devel phenđa: "Nane šukar zako manuš te ovel korkoro. Ka ćerav lese pomoćnica koja ka priličini lese."

19 O GOSPOD o Devel oti phuv oblikujinđa sa e životinjen hem sa e čirikljen, pa anđa len anglo manuš, te dikhel save anava o manuš ka del len. Hem sar god o manuš vičinđa nesave dživde biće – ađahar ulo lesoro anav. 20 Ađahar o manuš dinđa anava sa e stokenđe, e čirikljenđe hem sa e divljone životinjenđe.

Ali zako Adam na arakhlja pe pomoćnica koja priličini lese. 21 Adalese o GOSPOD o Devel muklja zoralo sojba upro manuš. Kad o manuš zasuća, o Devel ikalđa lestar jekh rebro hem adava than pherđa maseja. 22 Oto rebro savo ikalđa e manušestar, o GOSPOD o Devel ćerđa e đuvlja hem anđa la anglo manuš.

23 A o manuš phenđa:

"Ače, napokon kokalo mle kokalendar

hem telo mle telostar!

Nek vičini pe ‘đuvli’,

adalese so lelja pe e manušestar."

24 Adalese o manuš ka ačhaj pe dade hem pe daja hem ka ovel jekh pe romnjaja, hem on duj ka oven jekh telo.

25 A soduj inele nange, hem o manuš hem lesiri romni, ali na lađandile.