1 Ađahar o Izrael lelja te džal ko drom sa okoleja so inole. Kad reslo đi i Beer Ševa, prinosinđa žrtva ple dadesere, e Isaakesere Devlese.

2 O Devel prekali rat alo ani vizija e Izraelese hem vičinđa le: "Jakove! Jakove!"

A ov phenđa lese: "Akate injum!"

3 O Devel phenđa lese: "Me injum o Devel, o Devel te dadesoro. Ma dara te dža ano Egipat, adalese so adari tutar ka ćerav bare narodo. 4 Ka džav tuja ano Egipat hem me ka irinav tut palem akari palal. A tu kad ka mere, o Josif ple vasteja ka phandel te jaćha."

5 Palo adava o Jakov dželo tari Beer Ševa. Lesere čhave ole, zajedno pumare romnjencar hem e čhavorencar, vozinde ano kočije save o faraon bičhalđa lenđe palo lende. 6 Pumencar legarde sa pumara stoka hem legarde pumencar sa o barvalipe so stekninde ano Hanaan, pa o Jakov hem sa lesoro potomstvo džele ano Egipat. 7 Ov ano Egipat legarđa ple čhaven hem ple unukonen, ple čhajen hem ple unuken – celo plo potomstvo.

8 Akavai o anava e Izraelconengoro – e Jakovesoro hem lesere potomkonengoro – kola džele ano Egipat:

O Ruvim, e Jakovesoro prvobijando čhavo. 9 E Ruvimesere čhavei:

o Hanoh, o Palu, o Esrom hem o Karmi.

10 E Simeonesere čhavei:

o Jemuel, o Jamin, o Ohad, o Jahin, o Cohar hem o Saul o čhavo jekha Hanaankakoro.

11 E Levijesere čhavei:

o Geršon, o Kehat hem o Merari.

12 E Judasere čhavei:

o Er, o Onan, o Sala, o Fares hem o Zara. O Er hem o Onan mule ano Hanaan.

E Faresesere čhavei: o Esrom hem o Hamul.

13 E Isaharesere čhavei:

o Tola, o Pua, o Jašuv hem o Šimron.

14 E Zavulonesere čhavei:

o Sered, o Elon hem o Jahleel.

15 Adalai o čhave kolen i Lija bijanđa e Jakovese ano Padan Aram. Oj bijanđa lese hem čhaja e Dina. Ukupno oto lesere potomci inele trijandu trin džene.

16 E Gadesere čhavei:

o Cifjon, o Hagi, o Šuni, o Ecbon, o Eri, o Arodi hem o Areli.

17 E Asiresere čhavei:

o Jimna, o Jišva, o Jišvi hem o Berija. Lengiri phen inele i Serah.

E Berijasere čhavei: O Hever hem o Malkijel.

18 Adalai o čhave kolen i Zilpa bijanđa e Jakovese, i sluškinja kola o Lavan dinđa pla čhajaće e Lijaće. Oj bijanđa e Jakovese dešu šove čhaven.

19 Akalai o čhave e Jakovesere romnjakere e Rahiljakere:

O Josif hem o Venijamin.

20 E Josifese ano Egipat i Osnata, i čhaj e Potiferesiri, e sveštenikosiri ano Onu, bijanđa e Manasija hem e Efreme.

21 E Venijaminesere čhavei:

o Bela, o Beher, o Ašbel, o Gera, o Neman, o Ehi, o Roš, o Mupim, o Hupim hem o Ard.

22 Adalai e Rahiljakere čhave kola bijandile e Jakovese – ukupno dešu štar.

23 E Danesoro čhavo:

o Hušim.

24 E Neftalimesere čhavei:

o Jahceel, o Guni, o Jecer hem o Šilem.

25 Adalai o čhave kolen i Bilha bijanđa e Jakovese, i sluškinja kola o Lavan dinđa pla čhajaće e Rahiljaće. Oj bijanđa e Jakovese efta čhaven.

26 Sare okola kola džele e Jakoveja ano Egipat – lesere bijande potomci, bizo te računini pe lesere borja – ukupno inele šovardešu šov džene. 27 Zajedno e Josifesere duje čhavencar kola bijandile ano Egipat, ukupno inele eftavardeš džene e Jakovese ani porodica kola džele ano Egipat.

28 A o Jakov bičhalđa e Juda angleder koro Josif te mothoj lese o drom đi o Gošen. Kad resle ano gošensko krajo, 29 O Josif naredinđa te pripreminen lese o kočije, pa dželo ano Gošen te resel pe ple dadeja e Izraeleja. Kad terdino anglo plo dad, zorale zagrlinđa le hem rundoj ačhilo lese ani angali.

30 O Izrael phenđa e Josifese: "Akana šaj te merav, adalese so dikhljum to muj, hem džanav da injan pana dživdo."

31 Tegani o Josif phenđa ple phraljenđe hem ple dadesere čherutnenđe: "Džava te vaćerav e faraoneja. Ka phenav lese: ‘Ale maje me phralja hem o čherutne mle dadesere, kola živinde ano Hanaan. 32 Adalai manuša pastirija. On arakhena stoka hem pumencar ande pumari sitno hem i krupno stoka hem sa so isi len.’ 33 Kad ka vičini tumen o faraon hem kad ka pučel: ‘Savi buti ćerena?’ 34 tumen phenen: ‘Amen, te sluge, arakhaja stoka pana taro amaro ternipe, sar so adava ćerde hem amare pradada.’ Ađahar ka šaj te živinen ano gošensko krajo, adalese soi zako Egipćanja sa o pastirija odvratna."