1 I ađahar o Avram, pe romnjaja hem sa okoleja so inole, dželo taro Egipat upre ano Negev. Oleja inele hem o Lot. 2 E Avrame ine baro barvalipe ani stoka, srebro hem zlato. 3 Taro Negev oto than ko than putujinđa sa đi ko Betel, đi ko okova than maškaro Betel hem o Aj kaj angleder ine lesoro šatori 4 hem kaj ćerđa ine o žrtveniko. Adari o Avram pokloninđa pe e GOSPODESE.

5 A hem o Lot, kova putujinđa e Avrameja, inole sitno hem krupno stoka hem šatorja. 6 Adaja phuv našti ine te izdržini sodujen dok inele zajedno, adalese so lengoro barvalipe inele baro, ađahar da našti ine te živinen zajedno. 7 Ovena ine bare kavge maškaro e Avramesere hem e Lotesere pastirija. Ano adava vreme ani adaja phuv živinde o Hanaanci hem o Perižanja.

8 Adalese o Avram phenđa e Lotese: "Familija injam. Nane šukar te ovel kavga maškara mande hem tute, maškaro mle hem kle pastirija. 9 Sai će i phuv ko raspolaganje. Odvojin tut mandar. Te tu dželjan levo, me ka džav desno. Te tu dželjan desno, me ka džav levo."

10 O Lot vazdinđa plo šero hem dikhlja dai sa i dolina oti len Jordan premalo Coar šukar natopime panjeja, sar o vrt e GOSPODESORO ili sar o Egipat. Akava inele angleder nego so o GOSPOD uništinđa i Sodoma hem i Gomora. 11 I o Lot izabirinđa pese sa i dolina oti len Jordan, pa lelja te džal premalo istok. Ađahar odvojinde pe jekh averestar: 12 O Avram živinđa ano Hanaan, dok o Lot živinđa maškaro dizja ani dolina hem vazdinđa pe šatorja sa đi ki Sodoma. 13 A o manuša ani Sodoma inele bišukar hem inele bare grešnici anglo GOSPOD.

14 Palo adava so o Lot odvojinđa pe, o GOSPOD phenđa e Avramese: "Dikh taro akava than ko sever hem jug, ko istok hem zapad. 15 Sa i phuv savi dikheja ka dav tuće hem te potomstvose zauvek. 16 Ka ćerav to potomstvo te ovel baro sar o prah e phuvjakoro, pa sar so našti te dženel pe o prah e phuvjakoro, naka šaj te dženel pe ni to potomstvo. 17 Dža hem nakh e phuvjaja uzduž hem popreko, adalese so tuće ka dav la."

18 Tegani o Avram čedinđa ple šatorja hem dželo te živini uzalo e Mamresere bare kašta ano Hevron hem adari ćerđa žrtveniko e GOSPODESE.