1 O Josif našti ine više te uzdržini pe anglo ple sluge, pa vičinđa: "Nek ikljon sare avri!" Ađahar niko na inele e Josifeja kad mothovđa ple phraljenđe koi ov. 2 Ali edobor glasno runđa da šunde le hem o Egipćanja, pa zako adava dodžanđa celo palata e faraonesiri.

3 O Josif phenđa ple phraljenđe: "Me injum o Josif! Pana li dživdo mlo dad?"

Ali lesere phralja edobor darandile da našti ine te odgovorinen lese.

4 Tegani o Josif phenđa: "Aven po paše."

Kad ale po paše, phenđa: "Me injum tumaro phral o Josif, okova kole tumen bikninđen ano Egipat. 5 Ali ma oven uznemirime hem ma krivinen tumen so bikninđen man akate, adalese so o Devel bičhalđa man angla tumende te sačuvinen pe o dživdipa e manušengere. 6 Već duj berš o bokhalipe vladini ani phuv, a pana pandž berš naka ovel ni haniba ni žetva. 7 O Devel bičhalđa man angla tumende, te šaj prekalo baro izbavljenje te spasinav tumare dživdipa hem te ovel tumen potomstvo ki phuv. 8 Adalese, na bičhalđen man tumen akate, nego o Devel. Ov čhivđa man te ovav e faraonesoro najbaro službeniko, te ovav gospodari upro celo čher e faraonesoro hem vladari upro celo Egipat.

9 A akana siđaren palal koro mlo dad hem phenen lese: ‘To čhavo o Josif phenela ađahar: O Devel čhivđa man te ovav gospodari upro celo Egipat. Ava kora mande bizo te misline tut.

10 Šaj te živine ano gošensko krajo hem ka ove maje paše – tu, te čhave hem te unuci, ti sitno hem ti krupno stoka hem sa so isi tut. 11 Me adari ka brininav man tutar, adalese so avena pana pandž berša oto bokhalipe. Ađahar naka ačhove čororo ni tu, ni te čherutne, niti sa soi klo.’

12 Ače, dikhen tumare jaćhencar, sar so dikhela hem mlo phral o Venijamin, da me čače injum o Josif. 13 Vaćeren mle dadese oti čast savi maje mothovdi ano Egipat hem oto sa so dikhljen. Hem sig anen mle dade akari!"

14 Tegani zagrlinđa ple phrale e Venijamine hem runđa, hem o Venijamin runđa ani lesiri angali. 15 Tegani rundoj zagrlinđa hem čumudinđa sa ple phraljen. Palo adava lesere phralja vaćerde oleja.

16 Kad dodžanđa pe ani palata e faraonesiri da ale e Josifesere phralja, o faraon hem lesere službenici inele radosna.

17 O faraon phenđa e Josifese: "Phen te phraljenđe: ‘Ćeren ađahar: Natovarinen tumare životinjen e hajbnaja, pa ki sig džan ano Hanaan. 18 Tegani anen tumare dade hem tumara porodica mande, a me ka dav tumen najšukar phuv ano Egipat, pa ka uživinen ano obilje akala phuvjakoro.’

19 A naredini pe će hem akava te phene lenđe: ‘Ćeren ađahar: Len tumenđe nekobor kočije taro Egipat tumare čhavorenđe hem romnjenđe, pa len tumare dade hem aven akate. 20 Ma te žalinen zako tumare stvarija so ka ačhaven, adalese so okova soi najšukar ano celo Egipat ka ovel tumaro.’ "

21 I o čhave e Izraelesere ćerde ađahar. O Josif dinđa len kočije, sar so o faraon naredinđa, hem hajba zako drom. 22 Svakonese olendar dinđa neve šeja, a e Venijaminese dinđa trišel srebrnjaci hem pandž neve šeja. 23 A akava bičhalđa ple dadese: deš hera natovarime okova najšukar so isi ano Egipat hem deš hernja natovarime điveja, marencar hem namirnicencar zako lesoro drom.

24 Ađahar bičhalđa ple phraljen hem ko pođiba phenđa lenđe: "Ma te svađinen tumen odrumal!"

25 Ađahar on pođinde taro Egipat hem resle koro plo dad o Jakov ano Hanaan.

26 Tegani phende lese: "O Josif dživdo! Hem vladini upro celo Egipat!" O Jakov šokirinđa pe kad šunđa hem na verujinđa lenđe. 27 Ali, kad vaćerde lese sa so o Josif phenđa lenđe hem kad dikhlja o kočije save o Josif bičhalđa te legaren le, lengoro dad o Jakov dživdilo.

28 Tegani o Izrael phenđa: "Dovoljno maje samo adava soi mlo čhavo o Josif dživdo! Ka džav te dikhav le angleder nego so te merav."