1 Kad o Jakov dodžanđa da ano Egipat isi điv, phenđa ple čhavenđe: "Sose samo bešena hem dikhena jekh ano avereste?"

2 Onda phenđa: "Šunđum da ano Egipat isi điv. Džan adari hem činen le amenđe, te šaj preživina, a na te mera oto bokhalipe."

3 Tegani e Josifesere deš phralja džele ano Egipat te činen điv. 4 Ali e Venijamine, e Josifesere phrale, o Jakov na bičhalđa olesere phraljencar adalese so darandilo te na arakhi le nesavo bišukaripe. 5 Ađahar e Izraelesere čhave arakhle pe maškaro okolende kola džele te činen điv, adalese so hem ano Hanaan inele bokhalipe.

6 O Josif, kova inele upravitelji ano Egipat, biknela ine o điv sa e narodose ani phuv.

Lesere phralja ale anglo leste hem pokloninde pe lese mujeja đi phuv. 7 Kad o Josif dikhlja ple phraljen, pendžarđa len, ali premalo lende inele sar abanđija hem vaćerđa olencar oštro.

I pučlja len: "Kotar injen?"

A on phende lese: "Amen injam oto Hanaan. Aljam te čina hajbnase."

8 Iako o Josif pendžarđa ple phraljen, on ole na pendžarde. 9 Tegani o Josif setinđa pe ple sunendar save dikhlja olendar,

pa phenđa lenđe: "Tumen injen špijunja! Aljen te dikhen kaj o bizorale thana akala phuvjakere!"

10 A on phende: "Na, gospodarona! Amen, te sluge, aljam te čina hajbnase. 11 Sare amen injam čhave jekhe manušesere. Amen, te sluge, injam poštena manuša, a na špijunja."

12 A ov phenđa lenđe: "Na! Tumen aljen te dikhen kaj o bizorale thana akala phuvjakere!"

13 A on phende: "Amen, te sluge, injamle dešu duj phralja, čhave jekhe manušesere taro Hanaan. O najtikneder ačhilo amare dadeja, a jekh phral amendar mulo."

14 O Josif phenđa: "Ađahari sar so phenđum tumenđe: tumen injen špijunja! 15 Ađahar ka proverinav tumen: Hava sovli e faraonesere dživdipnaja, naka džan akatar ako tumaro najtikneder phral na avela akari. 16 Bičhalen jekhe tumendar te anel tumare phrale. A tumen avera ka ačhon ano phandlipe hem ka oven pučle te proverini pe da li vaćerena čačipe ili na. Te na vaćerena o čačipe, hava sovli e faraonesere dživdipnaja, tumen injen špijunja!"

17 I čhivđa sarijen olen ko phandlipe ko trin dive.

18 O trito dive o Josif phenđa lenđe: "Me injum manuš kova darala oto Devel. Adalese ćeren akava so phenava hem ka ačhoven dživde. 19 Te injen poštena manuša, nek ačhol jekh tumendar ano phandlipe, a avera nek legaren o điv tumare čherutnenđe kolai ano bokhalipe. 20 Tegani anen maje tumare najtiknedere phrale, hem ađahar te potvrdini pe o čačikanipe oto tumare lafija hem te na meren."

Hem on složinde pe adaleja.

21 Tegani on phende jekh averese: "Čače injam kriva zbog amaro phral. Dikhljam lesiri patnja dok molinđa amen zaki milost, ali amen na šunđam le. Adalese hem arakhlja amen akaja nevolja."

22 A o Ruvim phenđa: "Zar na phenđum tumenđe te na grešinen protiv o čhavoro. Ali tumen na mangljen te šunen man. Ače, akana rodela pe te položina računi zako lesoro rat."

23 Na džande da o Josif razumini len, adalese so oleja vaćerde prekalo tumači. 24 Tegani o Josif cidinđa pe olendar hem runđa. Kad irinđa pe, palem vaćerđa olencar. Tegani izdvojinđa e Simeone hem naredinđa te phanden le anglo lende.

25 Tegani o Josif naredinđa te pheren lengere džaci điveja, svakonese ano džako te čhiven lesere pare hem te den len sa so valjani lenđe zako drom. Ađahar hem inele ćerdo. 26 On čhivde o điv upro pumare hera hem džele.

27 Kad ačhile ko than kaj valjande te nakhaven i rat, jekh oto phralja phravđa plo džako te del ple herese te hal hem otojekhvar dikhlja ple pare ano džako.

28 Tegani ov phenđa ple phraljenđe: "Mle parei irime! Ače, akatei ano mlo ano džako!"

A oti dar lengoro vilo ačhilo. Pa tresindoj, phende jekh averese: "So ćerđa amenđe akava o Devel?"

29 Kad resle koro plo dad o Jakov ano Hanaan, vaćerde lese sa so inele.

30 Phende: "O manuš kovai gospodari oti okoja phuv amencar oštro vaćerđa hem optužinđa amen da injam špijunja. 31 Ali amen phenđam lese: ‘Amen injam poštena manuša, na injam špijunja. 32 Amen injamle dešu duj phralja, čhave oto jekh dad. Jekh phral amendar mulo, a o najtiknederi akana amare dadeja ano Hanaan.’ 33 Tegani o gospodari e phuvjakoro phenđa: ‘Ađahar ka džanav da injen poštena manuša: Nek ačhol jekh tumendar ano phandlipe, a avera nek legaren o điv tumare čherutnenđe kolai ano bokhalipe, pa džan. 34 Onda anen maje tumare najtiknedere phrale, hem ka džanav da na injen špijunja, nego poštena manuša. Tegani ka irinav tumenđe tumare phrale hem ka šaj slobodno te kretinen tumen ani phuv.’"

35 Sar čučarena ine pumare džaci, svako arakhlja pli kesa e parencar. Kad dikhle on hem lengoro dad o kese e parencar, darandile.

36 Lengoro dad o Jakov phenđa lenđe: "Zbog tumende ka ačhovav bizo čhave. Nane više o Josif, nane ni o Simeon, a akana mangena te legaren hem e Venijamine. Sa irinđa pe protiv mande!"

37 Tegani o Ruvim phenđa ple dadese: "Mudar mle duje čhaven te na irinđum le tuće palal. Muk le maje ko vasta, hem me ka anav le tuće palal."

38 A o Jakov phenđa: "Mlo čhavo naka džal tumencar, adalese soi lesoro phral mulo hem samo pana ov ačhilo. Ako desini pe lese nesavo bišukaripe ko drom kaj džana, ka ćeren man ko purane berša rovavne ano Šeol te džav."