1 Kad i Rahilja dikhlja so našti te bijani čhaven e Jakovese, uli ljubomorno upri pli phen, pa phenđa e Jakovese: "De man čhaven, ili ka merav!"

2 A o Jakov holjanđa upri Rahilja hem phenđa: "Pa me li injum o Devel. Ovi adava kova na dinđa tut te bijane čhaven."

3 Tegani oj phenđa: "Ače mli sluškinja i Bilha – sov olaja, te šaj oj te bijani maje hem prekalo late te dobinav čhaven."

4 Ađahar i Rahilja dinđa pla sluškinja e Bilha e Jakovese te ovel lesiri romni. Ov suća e Bilhaja, 5 pa i Bilha ačhili khamni hem bijanđa lese čhave.

6 Tegani i Rahilja phenđa: "O Devel presudinđa ani mli korist. Šunđa mli molitva hem dinđa man čhave." Adalese dinđa le anav Dan.*

7 E Rahiljakiri sluškinja i Bilha palem ačhili khamni hem bijanđa e Jakovese dujtone čhave.

8 Tegani i Rahilja phenđa: "Bari inele mli borba mla phenjaja, ali pobedinđum." Adalese dinđa le anav Neftalim.*

9 Kad i Lija dikhlja so našti više te bijani, lelja pla sluškinja e Zilpa hem dinđa la e Jakovese te ovel lesiri romni. 10 E Lijakiri sluškinja i Zilpa bijanđa e Jakovese čhave.

11 Tegani i Lija phenđa: "But bahtali injum!" Adalese dinđa le anav Gad.*

12 E Lijakiri sluškinja i Zilpa bijanđa e Jakovese hem dujtone čhave.

13 Tegani i Lija phenđa: "Čače injum bahtali! O đuvlja ka vičinen man bahtali." Adalese dinđa le anav Asir.*

14 Jekhvar, ano vreme kad čedela pe o điv, o Ruvim dželo ano polje hem arakhlja mandragore*, pa anđa len pe dajaće e Lijaće.

I Rahilja phenđa e Lijaće: "Molinava tut de man hari te čhavesere mandragore."

15 A i Lija phenđa laće: "Hari li će so leljan mle rome, nego mangeja te le hem mle čhavesere mandragore?"

I Rahilja phenđa: "Šukari. Nek sovel erat o Jakov tuja ani zamena zako te čhavesere mandragore."

16 Kad o Jakov irinđa pe raćate taro polje, i Lija iklili anglo leste hem phenđa: "Ka sove mancar akaja rat, adalese so dobinđum tut ani zamena zako mandragore mle čhavesere." Hem ađahar o Jakov adaja rat suća olaja.

17 O Devel uslišinđa e Lijakiri molitva, pa oj ačhili khamni hem bijanđa e Jakovese hem pandžtone čhave.

18 Tegani oj phenđa: "O Devel nagradinđa man so dinđum mla sluškinja mle romese." Adalese dinđa le anav Isahar.*

19 I Lija palem ačhili khamni hem bijanđa e Jakovese šoftone čhave, 20 pa phenđa: "O Devel dinđa man but šužo daro. Akana mlo rom ka poštujini man, adalese so bijanđum lese šoftone čhave." Adalese dinđa le anav Zavulon.*

21 Palo adava i Lija bijanđa hem čhaja hem dinđa la anav Dina.

22 Tegani o Devel setinđa pe oti Rahilja, uslišinđa lakiri molitva hem ćerđa la te ovel plodno. 23 Oj ačhili khamni hem bijanđa čhave, pa phenđa: "O Devel cidinđa mli lađ." 24 Dinđa le anav Josif, * vaćerindoj: "Nek del man o GOSPOD pana jekhe čhave."

25 Kad i Rahilja bijanđa e Josife, o Jakov phenđa e Lavanese: "Muk man te irinav man adari kaj bijandiljum. 26 De man mle romnjen hem mle čhaven, kolenđe služinđum će, pa te džav. Adalese so, tu korkoro džane kobor ćerđum buti tuće."

27 Ko adava o Lavan phenđa: "Te arakhljum milost angla tute, molinava tut ma dža! Prekalo dikhljariba dodžanđum da o GOSPOD zbog tute blagoslovinđa man." 28 Hem pana phenđa: "Odredin i plata savi rodeja mandar, pa me ka dav tut."

29 O Jakov phenđa: "Džane sar služinđum će hem kobor ti stoka barili adalese so me brininđum olatar. 30 Okova hari so ine tut angleder me so aljum akana but barilo hem o GOSPOD blagoslovinđa tut prekalo sa so ćerđum. Zar nane o vreme te ćerav buti hem zako mlo čher?"

31 O Lavan pučlja: "So te dav tut?"

O Jakov phenđa: "Ma de man ništa. Samo ćer maje akava, pa ka ačhovav te dav te stokaće čar te hal hem ka arakhav len: 32 Muk man avdive te nakhav maškaro sa to stado hem te izdvojinav svakona pegavona hem šarima bakrija hem svakone kale bakrore, hem svakona šarima hem pegavona buznja. Adava ka ovel mli plata. 33 Od akana mlo poštenje ka svedočini zako maje kad god ka proverine mli plata: te ano mlo stado aračhola nesavi buzni savi nane šarime ili pegavo, ili bakroro savo nane kalo, nek smatrini pe dai čorde."

34 O Lavan phenđa: "Šukari. Nek ovel sar so pheneja." 35 Ko adava isto dive o Lavan izdvojinđa sa e jarconen saven ine pruge ili šare hem svakona pegavona hem šarima buznja – sa adalen saven ine hari parno upra peste – hem svakone kale bakrore, pa dinđa len ple čhavenđe. 36 Tegani e stadoja phirindoj dželo trin dive dur oto Jakov. A o Jakov ačhilo te arakhi o ostatak oto stado e Lavanesoro.

37 O Jakov lelja sveža granke taro kašta topola, badem hem platan, pa ano lende urezinđa parne pruge ađahar so randlja i kora sar te dičhol o parno kaš oti granka. 38 O randle granke čhivđa ano kopane, te oven anglo stado kad ka avel te pijel. O stado avela ine te pijel hem adathe parini pe ine. 39 A adalese so o stado parini pe ine anglo granke, bijandile prugasta, pegava ili šarime terne životinje.

40 O Jakov e terne životinjen odvojinđa, a averen irinđa ađahar te dikhen ano prugasta hem ano kale životinje save inele e Lavanesere. Ađahar o Jakov pese dobinđa odvojime stado hem na mešinđa le e Lavanesere stadoja. 41 Kad bi o po zorale životinje oto stado parinena pe, o Jakov čhivela ine o granke ano kopane anglo životinje, sar te šaj o životinje te parinen pe anglo granke. 42 A anglo bizorale životinje o Jakov na čhivela ine o granke. Ađahar o bizorale životinje pripadinde e Lavanese, a o zorale e Jakovese. 43 Ađahar o Jakov zorale barvalilo, stekninđa bute sitnona stoka, sluškinjen hem slugen, kamilen hem heren.