1 I Sara živinđa šelu bišu efta berš. 2 Muli ano Kirjat Arbi (adavai ano Hevron) ani phuv Hanaan, a o Avraam đerdinđa koro late te žalini la hem te rovel la.

3 Kad uštino taro than kaj inele pašljardi lesiri pokojno romni, dželo koro Hetitija hem phenđa: 4 "Me injum abanđija kole nane phuv hem kova živini maškara tumende. Biknen maje than akate zako paruniba, te šaj parunav mla pokojnona romnja."

5 O Hetitija phende lese: 6 "Šun amen, gospodarona. Tu injan moćno princo maškar amende. Parun te pokojnona romnja ano amaro najšukar grobo. Niko amendar naka branini će plo grobo te parune te romnja ano leste."

7 Ko adava o Avraam uštino hem pokloninđa pe e narodose adala phuvjakere, e Hetitenđe, 8 pa phenđa lenđe: "Te mangena akate te muken maje te parunav mla romnja, onda šunen man hem zamolinen e Efrone, e Coharesere čhave, 9 te biknel maje i pećina Mahpela, savi pripadini olese, savi nalazini pe ko kraj oto lesoro polje. Nek biknel la maje pali pherdi cena, te ovel maje than zako paruniba maškara tumende."

10 A o Efron bešela ine adari maškaro Hetitija. Tegani o Efron, o Hetiti, phenđa e Avraamese anglo sa o Hetitija kola ale angli kapija lesere dizjakiri: 11 "Na, gospodarona. Šun man: Dava tut o polje hem dava tut i pećina savi ano leste – dava tut adava anglo mlo narodo. Parun te pokojnona romnja."

12 O Avraam palem pokloninđa pe e narodose adala phuvjakere, 13 pa phenđa e Efronese anglo adava narodo: "Molinava tut te šune man. Ka platinav će kobor o polje vredini. Prihvatin okova so dava tut, te šaj adari te parunav mla romnja."

14 A o Efron phenđa e Avraamese: 15 "Šun man gospodarona. Adaja phuv vredini štar kilja srebro, a adava nane but ni tuće ni maje. Parun te romnja."

16 O Avraam složinđa pe e Efroneja hem merinđa lese o srebro kobor akava phenđa anglo avera Hetitija: štar kilja srebro ađahar sar so računinena len o trgovci.

17 Ađahar e Efronesoro polje ani Mahpela paše uzalo Mamre – hem o polje hem i pećina ano leste hem sa o kašta so ine ano polje 18 ulo e Avraamesoro anglo sa o Hetitija kola ale angli kapija e dizjakiri. 19 Palo adava o Avraam parunđa pla romnja e Sara ani pećina ko polje Mahpela paše uzalo Mamre, (adavai ano Hevron), ani phuv Hanaan.

20 Ađahar adava polje hem i pećina oto Hetitija ule e Avraamesere sar than zako paruniba.