1 O Jakov vazdinđa plo šero hem dikhlja e Isave sar avela štar šele manušencar, pa podelinđa e čhavoren maškari Lija, i Rahilja hem o duj sluškinje. 2 Anglal čhivđa e sluškinjen hem lengere čhaven, palo lende e Lija hem lakere čhaven, a e Rahilja hem e Josife palal. 3 Ov korkoro dželo anglo lende hem efta puti pokloninđa pe mujeja đi phuv sar avela ine paše nakoro plo phral.

4 O Isav prastandilo nakoro leste hem zagrlinđa le, čhivđa ple vasta upro leste hem čumudinđa le, pa soduj džene runde.

5 Tegani o Isav vazdinđa plo šero hem dikhlja e romnjen hem e čhaven, pa pučlja: "Kolai akala tuja?"

O Jakov phenđa: "O čhave kolen o Devel milosrdno dinđa maje, te slugase."

6 Tegani o sluškinje hem lengere čhave ale po paše hem pokloninde pe. 7 Palo lende ale paše hem i Lija hem lakere čhave hem pokloninde pe, a ko kraj ale paše hem i Rahilja hem o Josif, pa hem on pokloninde pe.

8 O Isav pučlja: "A savoi razlog so bičhalđan kora mande okova stado?"

O Jakov phenđa: "Te arakhav milost angla tute, gospodarona."

9 Ali o Isav phenđa: "Man već isi but, phrala. Ačhav tuće adava soi klo."

10 O Jakov phenđa: "Na, molinava tut. Te arakhljum milost angla tute, primin adava daro mandar. Adalese so, kad dikhljum to muj ka phene da dikhljum o muj e Devlesoro, akana kad milosrdno priminđan man. 11 Prihvatin o blagoslov savo anđum će, adalese soi o Devel milosrdno premala mande, pa isi man hem buderi."

I adalese so o Jakov edobor nagovorinđa le, o Isav prihvatinđa o daro.

12 Tegani o Isav phenđa: "Hajde amen akana te dža ko drom zajedno."

13 Ali o Jakov phenđa lese: "Tu gospodarona, džane dai o čhavore bizorale, a valjani te pazinav upro bakre hem o guruvnja save dena thud ple tikoren. Te terinđum len te džan po sig samo jekh dive, sa ka meren. 14 Adalese tu, gospodarona, dža angla mande, anglo to sluga, a me ka avav pohari, korako palo korako e stokaja hem e čhavorencar, đikote na resava kora tute, gospodarona, ano Seir."

15 O Isav phenđa: "Ana barem te ačhavav tuja nekobor mle manušen."

O Jakov phenđa: "Šukari adava tutar, gospodarona, ali na valjani."

16 Ađahar o Isav ko adava isto dive irinđa pe palal nakoro Seir. 17 Ali o Jakov dželo ano Sukot hem adari pese vazdinđa čher, a zaki stoka štale. Adalese hem adava than vičini pe Sukot.*

18 Putujindoj taro Padan Aram, o Jakov šukar alo đi i diz Sihem ano Hanaan hem lelja te živini angli diz. 19 I phuv upri savi vazdinđa plo šatori činđa taro čhave e Hamoresere zako šel srebrnjaci. (O Hamor inele dad e Sihemesoro.) 20 Adari o Jakov vazdinđa žrtveniko hem vičinđa le El Elohe Izrael.*