1 Ano adava vreme o Amrafel o caro oto Šinar, o Arioh o caro oto Elasar, o Kedarlaomer o caro oto Elam hem o Tidal o caro oto Gojim 2 džele ano mariba protiv pandž avera carija: o Bera o caro oti Sodoma, o Birša o caro oti Gomora, o Šinav o caro oti Adma, o Šemever o caro oti Cevoim hem o caro oti Bela, adavai i Coar. 3 Akala pandž carija pumare vojskencar udružinde pe zajedno ani dolina Sidim, adavai o Mrtvo more. 4 Angleder, dešu duj berš služinde e Kedarlaomerese, ali ko dešu trito berš pobuninde pe protiv oleste.

5 Ko dešu štarto berš, o Kedarlaomer hem o carija kola inele oleja marde pe hem pobedinde e Refajconen ano Aštarot Karnajim, e Zuzejconen ano Ham, e Emijconen ano Šave Kirjatajim, 6 hem e Horijconen ki lengiri planina Seir sa đi ko El Paran paše uzali pustinja. 7 Tegani irinde pe hem džele ano En Mišpat, adavai o Kadeš, pa osvojinde sa i regija kote živinde o Amalečanja hem e Amorejconen, kola živinde ano Hacecon Tamaru.

8 Tegani o caro oti Sodoma, o caro oti Gomora, o caro oti Adma, o caro oti Cevoim hem o caro oti Bela, adavai i Coar, iklile ani dolina Sidim 9 protiv o Kedarlaomer o caro oto Elam, o Tidal o caro oto Gojim, o Amrafel o caro oto Šinar hem o Arioh o caro oto Elasar – štar carija protiv pandž. 10 A ani dolina Sidim inele pherdo rupe smolaja, pa kad o carija oti Sodoma hem Gomora pumare vojskencar lelje te našen, nesave pele ko rupe, a avera našle ano gore. 11 O štar carija lelje sa o barvalipe oti Sodoma hem Gomora hem sa lengoro hajba, pa džele. 12 On legarde hem e Lote, e Avramesere phralesere čhave, kova živinđa ani Sodoma, hem sa lesoro barvalipe.

13 A jekh manuš kova naštino e neprijateljendar alo hem javinđa e Avramese e Jevrejcose, kova živinđa uzalo bare kašta e Mamresere. O Mamre inele Amorejco, e Eškolosoro hem e Aneresoro phral. On trin inele ano savez e Avrameja. 14 Kad o Avram šunđa dai lesere phralesoro čhavo zarobime, čedinđa trišelu dešu ofto trenirime manušen, robonen kolai bijande olese ano čher, hem lelja te džal ano mariba palo carija sa đi ki diz Dan. 15 O Avram podelinđa ple manušen ko grupe, pa prekali rat napadinđa e neprijateljen hem pobedinđa len. Jurinđa len sa đi ki diz Hova, severno oti diz Damask. 16 Ađahar irinđa palal sa o barvalipe, a irinđa hem pe phralesere čhave e Lote hem sa lesoro barvalipe, zajedno e đuvljencar hem avere manušencar.

17 Kad o Avram irinđa pe oto mariba sar pobedniko upro Kedarlaomer hem avera carija kola inele ano savez oleja, o caro oti Sodoma iklilo anglo leste ani dolina Šave, adavai e Carosiri dolina. 18 O Melhisedek, o caro oto Salim, anđa o maro hem i mol. Ov inele svešteniko e Najbare Devlesoro 19 hem ov blagoslovinđa e Avrame, vaćerindoj:

"Nek e Avrame blagoslovini o Najbaro Devel,

o Stvoritelji* e nebosoro hem e phuvjakoro.

20 Nek ovel blagoslovime o Najbaro Devel

kova dinđa tut i pobeda upro neprijatelja."

Tegani o Avram dinđa e Melhisedekese desetak oto sa.

21 O caro oti Sodoma phenđa e Avramese: "De man mle manušen, a o barvalipe so osvojinđan nek ačhol tuće."

22 A o Avram phenđa lese: "Haljum sovli e GOSPODESE, e Najbare Devlese, e nebosere hem e phuvjakere Stvoriteljese, 23 da naka lav ni o thav, ni o dorikha oti obuća, niti bilo so adalestar soi klo, sar te na phene: ‘Me ćerđum e Avrame te ovel barvalo.’ 24 Me maje naka lav ništa sem okolestar so hale mle manuša hem o deo so pripadini okolenđe kola džele mancar – e Anerese, e Eškolese hem e Mamrese; on nek len plo deo."