1 Tegani o Isaak vičinđa e Jakove hem blagoslovinđa le, pa naredinđa lese: "Ma te le romnjaće Hanaanka! 2 Sig dža ano Padan Aram, ano čher e Beteulesoro, te papusoro, hem adari arakh će romnja, jekha taro te ujkosere e Lavanesere čhaja. 3 Nek o Devel, kova sa šaj, blagoslovini tut te ove plodno hem nek umnožini tut, tutar te ikljon but narodija. 4 Nek tuće hem te potomkonenđe del e Avraamesoro blagoslov, te le ano nasledstvo i phuv ani savi akana živineja, i phuv savi o Devel dinđa e Avraamese."

5 Tegani o Isaak bičhalđa e Jakove, hem ov dželo ano Padan Aram, koro Lavan, kovai čhavo e Beteulesoro e Aramejcosoro, a phral e Revekakoro kojai daj e Jakovese hem e Isavese.

6 O Isav dodžanđa so o Isaak blagoslovinđa e Jakove hem so bičhalđa le ano Padan Aram te arakhi pese adari romnja hem so, blagoslovindoj, naredinđa lese: "Ma te le romnjaće Hanaanka!", 7 hem dodžanđa so o Jakov šunđa ple dade hem pla daja hem so dželo ano Padan Aram. 8 Ađahar o Isav halilo da o Hanaanke nane pali volja lesere dadesiri e Isaakesiri, 9 pa dželo koro Ismailo hem uzalo aver romnja save već inole, leljafse romnjaće e Mahalata. Oj inele čhaj e Avraamesere čhavesiri e Ismailosiri, a phen e Nevajotovesiri.

10 Kad o Jakov iklilo tari Beer Ševa, lelja te džal nakoro Haran 11 hem alo nesar ko jekh than, ačhilo adari te nakhaj i rat, adalese so već ratilo. Lelja jekh bar oto adava than, čhivđa le uzalo plo šero pa pašlilo te sovel. 12 Ano suno dikhlja sluba savi terđola ki phuv, a lakoro vrh inele đi ko nebo. I otojekhvar e Devlesere anđelja ukljena ine hem huljena upro late, 13 a upro late, upre, terđola ine o GOSPOD. Ov phenđa: "Me injum o GOSPOD, o Devel te pradadesoro e Avraamesoro hem o Devel e Isaakesoro. Tuće hem te potomstvose ka dav akaja phuv ki savi pašljoveja. 14 To potomstvo ka ovel baro sar o prah e phuvjakoro hem ka raširinen pe ko zapad hem ko istok, ko sever hem ko jug. Prekala tute hem prekalo to potomstvo ka oven blagoslovime sa o narodija ki phuv. 15 Me injum tuja – ka pazinav tut kaj god te dža hem ka irinav tut ki akaja phuv. Naka ačhavav tut đikote na ispuninava adava so obećinđum će."

16 Kad o Jakov uštino taro suno, phenđa: "Čačei o GOSPOD ko akava than, a me adava na džanđum!"

17 Darandilo hem phenđa: "Kobori strašno akava than! Akava nane ništa aver nego čher e Devlesoro! Akavai i kapija e nebosiri!"

18 O Jakov uštino sabale rano, lelja o bar savo inele uzalo lesoro šero, ispravinđa le sar stubo hem čhorđa ulje upro leste. 19 Adava than vičinđa Betel.* Adaja diz angleder vičinđa pe Luz.

20 Tegani o Jakov halja pe sovli, vaćerindoj: "Te o Devel ka ovel mancar hem te arakhlja man ko akava mlo drom ko savo leljum te džav, te dinđa man maro te hav hem šeja te urjav, 21 pa dživdo hem sasto te irinav man ko čher mle dadesoro, onda o GOSPOD ka ovel mlo Devel, 22 a akava bar savo ispravinđum ka ovel sar znako zako e Devlesoro čher. A oto sa so ka de man, Devla, me tuće ka dav desetak."