1 O Josif naredinđa ple čheresere upravnikose: "Pher akale manušengere džaci hajbnaja, kobor god šaj te legaren pumencar, hem svakonese upral ano džako čhiv lesere pare. 2 A mli bari čaša, okoja i srebrno, čhiv upral ano džako e najtiknederesoro, zajedno e parencar savencar platinđa o điv."

I okova manuš ćerđa ađahar sar so o Josif phenđa lese.

3 Kad dislilo, spreminde e phraljen hem lengere heren zako drom.

4 Sar pana na džele dur oti diz, o Josif phenđa ple čheresere upravnikose: "Odmah te dža palo okola manuša, pa kad ka rese len, phen lenđe: ‘Sose irinena bišukaripe zako šukaripe? Sose čorđen i srebrno bari čaša mle gospodaresiri? 5 Adajai čaša savatar pijela mlo gospodari hem savi služini lese te dikhljari? Ćerđen bišukaripe!’ "

6 Kad reslja len o upravniko, ov phenđa lenđe sa akala lafija, 7 a on ko adava phende lese: "Sose ađahar vaćereja amencar, gospodarona? Dur adalestar da amen, te sluge, ka ćera ađahar nešto! 8 Čak taro Hanaan irinđam će hem o pare save arakhljam upral ano amare džaci. Sose bi čoraja onda o srebro ili o zlato taro čher te gospodaresoro? 9 Te nekaste amendar arakhlja pe adava, koro te sluge, adale mudaren, a amen avera ka ova te robija, gospodarona."

10 O manuš phenđa lenđe: "Šukar vaćerena. Ali nek ovel ađahar: Kora kaste ka arakhi pe adaja čaša, ov ka ovel mlo robo, a avera ka oven slobodna."

11 Tegani svako olendar ki sig muklja plo džako ki phuv hem phravđa le. 12 O manuš lelja te rodel ano džaci počindoj oto najphureder phral, a završindoj koro najtikneder. I čaša arakhlja pe ano džako e Venijaminesoro. 13 Ko adava on pharavde ple šeja, pa sare natovarinde pumare heren hem irinde pe ani diz.

14 Kad o Juda hem lesere phralja đerdinde ano čher e Josifesoro, ov pana inele adari.

On pele mujeja đi phuv anglo leste, 15 a ov phenđa lenđe: "So ćerđen adava? Zar na džanen da manuš sar mande, šaj sa te dodžanel ađahar so ka dikhljari?"

16 O Juda phenđa: "So te phena će, gospodarona? So te phena? Sar te opravdina amen? O Devel otkrijinđa i krivica amari, te slugengiri. Amen akana injam te robija, gospodarona – amen hem okova kora kaste arakhlja pe ti čaša."

17 Ali o Josif phenđa: "Dur adalestar da me nešto ađahar ka ćerav! Samo o manuš kora kaste arakhlja pe mli čaša ka ovel robo, a tumen avera šaj ano mir te irinen tumen koro tumaro dad."

18 Tegani o Juda alo paše uzalo leste hem phenđa: "Molinava tut! O gospodarona, muk maje, te slugase, te phenav će nešto hem ma holjan upra mande, upro to sluga, adalese so tu injan sar o faraon. 19 Tu, gospodarona, pučljan amen, te slugen: ‘Isi tumen li dad ili aver nesavo phral?’ 20 A amen phenđam tuće, gospodarona: ‘Isi amen purano dad, a ole isi pana jekh čhavo, ovi najtikneder kova bijandilo lese ano phuripe. Lesoro phral mulo hem samo ov ačhilo oto čhave ple dajakere. O dad but volini le.’ 21 Tu onda phenđan amenđe, te slugenđe: ‘Anen maje ole, te dikhav le mle jaćhencar.’ 22 A amen gospodarona, tuće phenđam: ‘O čhavoro našti te ačhaj ple dade, adalese so te ačhavđa le, o dad ka merel.’ 23 Ali tu phenđan amenđe, te slugenđe: ‘Te tumaro najtikneder phral na avela tumencar, ma ikljoven maje anglo jaćha!’ 24 Kad irinđam amen te slugase, mle dadese, phenđam lese so tu, gospodarona, phenđan. 25 Palo nesavo vreme amaro dad phenđa amenđe: ‘Irinen tumen hem činen amenđe pana hari hajbnase’, 26 a amen phenđam: ‘Našti te irina amen adari. Šaj te dža samo ako amaro najtikneder phral džala amencar, adalese so našti okole manušese te ikljova anglo jaćha bizo amaro najtikneder phral.’ 27 To sluga, mlo dad, phenđa amenđe: ‘Džanen da mli romni bijanđa duje čhaven. 28 Jekh dželo mandar, pa me phenđum: "Sigurnoi čhinđerdo ko kotora", i nikad više na dikhljum le. 29 A te legarđen hem akale, pa arakhi le nesavo bišukaripe, ka ćeren man ko purane berša rovavne ano Šeol te džav.’

30 Te akana me irinđum koro to sluga, koro mlo dad, pa ov, kovai but povezime akale čhavoreja, 31 dikhela da o čhavoro nane amencar, ka merel. Ađahar amen, te sluge, ka ćera amare dade ko purane berša rovavne ano Šeol te džal. 32 Me, to sluga, dinđum garancija mle dadese zako akava čhavoro, vaćerindoj: ‘Te me na anđum le tuće palal celo dživdipe ka ovav krivo angla tute!’ 33 Adalese, gospodarona, muk me, to sluga, te ačhovav akate umesto o čhavoro sar to robo, a tu muk e čhavore te irini pe ple phraljencar. 34 Adalese so, sar te irinav man koro mlo dad ako o čhavoro nane mancar? Naka šaj te dikhav o pharipe savo bi arakhi mle dade."