1 O Jakov lelja te džal ple dromeja, a odrumal resle le o anđelja e Devlesere.

2 Kad dikhlja len, phenđa: "Akavai e Devlesoro tabor." Adalese adava than vičinđa Mahanajim.*

3 O Jakov angla peste bičhalđa glasnikonen ple phralese e Isavese ani regija Seir, ani phuv Edom, 4 hem naredinđa lenđe: "Ađahar vaćeren mle gospodarese e Isavese: ‘To sluga o Jakov phenela: Sa akava vreme injum le koro Lavan hem zadržinđum man adari. 5 Stekninđum guruven hem heren, sitnona stoka, slugen hem sluškinjen. Bičhalava će e glasnikonen te javinen će, gospodarona, ani nada da ka arakhav milost angla tute.’ "

6 Kad o glasnici irinde pe koro Jakov, phende lese: "Injamle koro to phral o Isav, hem ov akana avela nakora tute, a oleja avena štaršel manuša."

7 O Jakov mulo oti dar, pa e manušen kola inele oleja, e sitnona stoka, e guruven hem e kamilen podelinđa ko duj taborija. 8 Mislinđa: "Te o Isav avela đi ko jekh tabor hem napadini le, o dujto tabor ka šaj te našel."

9 Tegani o Jakov molinđa pe: "Devla, tu kova injan Devel mle pradadesoro e Avraamesoro, tu kova injan Devel mle dadesoro e Isaakesoro, GOSPODE, tu kova phenđan maje: ‘Irin tut ani ti phuv hem kori ti familija, a me ka ćerav te ovel će šukar,’ 10 na injum dostojno zako sa o mangipe hem zaki sa i vernost savo mothovđan premala mande, premalo to sluga. Samo štapi ine man kad nakhljum prekali len Jordan, a akana mandar ule duj taborija. 11 Molinava tut, izbavin man taro vasta mle phralesere e Isavesere, adalese so darava da ka avel hem ka mudari sarijen amen, čak hem e dajen hem e čhaven. 12 A tu phenđan: ‘Čače ka ćerav te ovel će šukar hem te oven tut potomci kobor i pošik e moresiri, savi našti dženel pe.’ "

13 O Jakov adari nakhavđa i rat, pa okova ki sig so dolinđa ple vastencar spreminđa sar daro ple phralese e Isavese: 14 dušel buznjen, biš jarconen, dušel bakren hem biš ovnonen, 15 trijanda đuvljane kamilen hem lengere ternen, saranda guruvnjen hem deš guruven, biš hernjen hem deš heren.

16 Tegani dinđa len ple slugenđe, svako stado posebno, pa phenđa lenđe: "Tumen džan angla mande, ali muken than maškaro svako stado."

17 A ple slugase kova inele prvo naredinđa: "Kad ka resel tut mlo phral o Isav hem kad ka pučel tut: ‘Kasoro tu injan hem kaj džaja? Kaserei akala životinje angla tute?’, 18 tu phen lese: ‘Akalai životinje te slugasere e Jakovesere. Akavai o daro savo bičhali mle gospodarese e Isavese. A ov, ače, avela pala amende.’ "

19 Tegani naredinđa e dujtonese hem e tritonese hem sa averenđe kola inele zadužime zako stado: "Hem tumen isto adava vaćeren e Isavese kad ka resen le. 20 Vaćeren lese hem akava: ‘Ače, to sluga o Jakov avela pala amende.’ "

Adalese so, o Jakov mislinđa: "Ka smirinav le akale daroja savo bičhalava angla mande, pa posle kad ka resa amen, šaj ka primini man šukar."

21 Ađahar e Jakovesoro daro dželo anglo leste, a ov adaja rat ačhilo ano tabor.

22 Adaja isto rat o Jakov uštino, lelja ple soduje romnjen, ple soduje sluškinjen hem sa ple dešujekhe čhaven hem phirindoj nakhino prekalo potok Jabok. 23 A kad bičhalđa len prekalo potok, bičhalđa prekal hem sa plo barvalipe.

24 Ađahar o Jakov ačhilo korkoro, i tegani nesavo manuš borinđa pe oleja sa dok na dislilo. 25 Kad okova manuš dikhlja da našti te pobedini le, khuvđa e Jakove ko kuko, pa e Jakovesoro kuko iščašinđa pe dok borinđa pe oleja.

26 Tegani okova manuš phenđa lese: "Muk man, adalese so već disljola."

Ali o Jakov phenđa lese: "Naka mukav tut đikote na blagoslovineja man."

27 Okova manuš pučlja le: "Sari to anav?"

A ov phenđa lese: "Jakov."

28 Okova manuš phenđa lese: "Naka ovel to anav više Jakov, nego Izrael,* adalese so borinđan tut e Devleja hem e manušencar, hem pobedinđan."

29 Tegani o Jakov phenđa: "Molinava tut, vaćer maje to anav."

A okova manuš phenđa lese: "Sose pučeja zako mlo anav?"

Tegani blagoslovinđa e Jakove adari.

30 O Jakov adava than vičinđa Peniel,* vaćerindoj: "Adalese so dikhljum e Devle muj mujeja, a ačhiljum dživdo." 31 Sar nakhela ine maškaro Peniel, o kham iklilo upreder oleste. A zbog plo kuko phirđa bange. 32 Adalese o Izraelci đi o avdisutno dive na hana o mas oto mišići savo povezini o zglob oto kuko, adalese so o Jakov inele khuvdo ko adava than.