1 O GOSPOD phenđa e Nojese: "Đerdin ani barka, tu hem sa ti porodica, adalese so dikhljum da jedino tu angla mande injan pravedno maškaro manuša kola živinena ano akava vreme. 2 Oto sa o čista životinje le tuja po efta parovija: murše hem đuvlja, a oto nečista životinje le po jekh paro: murše hem đuvlja. 3 Isto ađahar oto sa o čiriklja savei ko nebo le po efta parovija: murše hem đuvlja, te ovel arakhlo lengoro potomstvo ki sa i phuv. 4 Adalese so, zako efta dive ka mukav bršim upri phuv te perel saranda dive hem saranda raća hem ka uništinav ki phuv svako dživdo biće savo ćerđum."

5 I o Noje ćerđa sa so o GOSPOD naredinđa lese.

6 E Noje ine šovšel berš kad o baro pani alo ki phuv. 7 I o Noje đerdinđa ani barka pla romnjaja, ple čhavencar hem lengere romnjencar, te spasini pe oto potop. 8 Oto čista hem nečista životinje, oto čiriklja hem oto sa o stvorenja so lazinena phuvjaja, 9 đerdinde koro Noje ani barka duj po duj, murš hem đuvli, sar so o Devel naredinđa e Nojese. 10 Efta dive palo adava, o baro pani alo upri phuv.

11 Kad e Noje ine šovšel berš, ko dešu eftato dive oto dujto masek – ko adava dive sa o izvorija tali phuv lelje zorale te ikljon naupre hem o brane e nebosere phravdile. 12 O bršim pelo ki phuv saranda dive hem saranda raća.

13 Ko adava isto dive o Noje, lesiri romni, lesere čhave o Sim, o Ham hem o Jafet, hem lengere romnja đerdinde ani barka. 14 Olencar đerdinde sa o životinje palo pumare vrste: i stoka, okola so lazinena phuvjaja hem sa o čiriklja. 15 Duj po duj oto sa o bićija saven ana peste isi o dah e dživdipnasoro đerdinde koro Noje ani barka. 16 Đerdinde murš hem đuvli oto sa o dživde bićija, sar so o Devel naredinđa e Nojese.

Tegani o GOSPOD phandlja o udar palo leste.

17 O potop avela ine upri phuv saranda dive. Sar o pani barjola ine, ađahar legari ine i barka hem vazdinđa la oti phuv. 18 O pani barilo hem vazdinđa pe uče oti phuv, a i barka plovini ine upro pani. 19 Edobor zorale o pani uštino upri phuv da učharđa sa o naj uče planine talo nebo. 20 O pani uštino đi sar efta metarija upreder o potopime planine. 21 Mule sa o dživde bićija save kretinena ki phuv: o čiriklja, i stoka, o divlja životinje, okola so lazinena phuvjaja hem sa o manuša. 22 Ko kopno mudardilo sa so ana peste inole o dah e dživdipnasoro. 23 Ađahar o Devel uništinđa svako dživdo biće ki phuv: e manušen, e životinjen, okolen so lazinena phuvjaja hem e čirikljen. Ačhile samo o Noje hem okola kola inele oleja ani barka.

24 A o pani učharđa i phuv šelu pinda dive.