1 Ano adava vreme o Juda dželo oto ple phralja hem lelja te živini koro jekh manuš kova vičinđa pe Hira, tari diz Adulam. 2 Adari o Juda dikhlja e čhaja nesave Hanaancosere kova vičinđa pe Šua, lelja la romnjaće hem suća olaja. 3 Oj ačhili khamni hem bijanđa čhave, kase o Juda dinđa anav Er. 4 Oj palem ačhili khamni hem bijanđa čhave, kase dinđa anav Onan. 5 Palo adava oj bijanđa pana jekhe čhave hem dinđa le anav Sala. Ano adava vreme kad o čhavoro bijandilo, on živinde ani diz Keziv.

6 O Juda ple najphuredere čhavese arakhlja romnja. Olakoro anav inele Tamara. 7 Ali e Judasoro prvobijando čhavo o Er inele bišukar anglo GOSPOD, pa o GOSPOD mudarđa le.

8 Tegani o Juda phenđa e Onanese: "Sov te phralesere romnjaja i ćer ti dužnost premalo late sar soi amaro adeti, te šaj te phrale ovel potomstvo."

9 Ali adalese so o Onan džanđa da o potomstvo naka ovel olesoro, kad god bi sovela ple phralesere romnjaja, na ćerela ine te ačhol khamni, sar te na del potomstvo ple phralese. 10 Adava so ćerđa inele bišukaripe anglo GOSPOD, pa o GOSPOD mudarđa hem ole.

11 Tegani o Juda phenđa pla borjaće e Tamaraće: "Dža hem živin sar udovica te dadese ano čher, đikote mlo čhavo o Sala na barjola."

Adalese so, o Juda mislinđa: "Te na mudarđol hem ov sar lesere phralja."

Ađahar i Tamara dželi te živini ple dadese ano čher.

12 Palo but vreme e Judasiri romni, e Šuinasiri čhaj, muli. Kad nakhino o vreme e tugujibnasoro, o Juda dželo ple amaleja e Hireja e Adulamcoja ani Timna koro manuša kola muravena ine lesere bakren.

13 Kad phende e Tamaraće: "Eče, to sastro džala ani Timna te muraj e bakren," 14 tegani oj huljavđa pestar o udovička šeja, phandlja pe o veo, hem učharđa plo šero, pa beštini ko ulaz ano Enajim, kovai nakoro drom premali Timna. Adalese so, dikhlja da o Sala barilo, a na dinde la olese romnjaće.

15 Kad dikhlja la o Juda, mislinđa dai bludnica, adalese so lakoro muj ine učhardo.

16 O Juda oto drom dželo uzalo late hem phenđa: "Hajde, ana te sovav tuja." Ov na džanđa dai oj lesiri bori.

A oj pučlja le: "So ka de man te sućum tuja?"

17 O Juda phenđa: "Ka bičhalav će jarco taro stado."

A oj phenđa: "So ka de man sar garancija dok na bičhaleja le?"

18 O Juda pučlja la: "So te dav tut sar garancija?"

Oj phenđa: "Ti angrustik e pečateja savi phandli e dorikhaja, hem o štapi savoi će ano vas."

I ov dinđa la adava, pa suća olaja, hem oj ačhili khamni lestar. 19 Tegani i Tamara dželi čhere, huljavđa o veo hem palem urđa pe ple udovička šeja.

20 O Juda bičhalđa ple amale e Adulamco e jarcoja, te činel okola đuvljatar adava soi laće dindo sar garancija, ali ov na arakhlja la.

21 Ov pučlja e dizutnen: "Kaj i hramsko bludnica koja inele uzalo drom zako Enajim?"

A on phende lese: "Akate na inele nisavi hramsko bludnica."

22 Ov irinđa pe koro Juda hem phenđa: "Na arakhljum la. Hem sem adava, o dizutne phende maje: ‘Akate na inele nisavi hramsko bludnica.’ "

23 Tegani o Juda phenđa: "Nek ačhol adava koro late, ma o manuša te maren amenđe muj. Eče, me bičhalđum laće jarco, ali tu na arakhljan la."

24 Kad nakhine trin masek, e Judase phende: "Ti bori i Tamara muklja pe ano blud, pa čak hem ačhili khamni."

O Juda phenđa: "Ikalen la hem tharen la."

25 Ali, sar ikalena la ine, oj ple sastrese phenđa: "Ačhiljum khamni e manušeja kasoroi akava. Dikh, molinava tut, pendžareja li kasiri akaja angrustik e pečateja savi phandli e dorikhaja hem o štapi?"

26 O Juda pendžarđa len, pa phenđa: "Oj po pravedno mandar, adalese so me na dinđum la mle čhavese e Salase."

Hem o Juda više na suća olaja.

27 Kad alo o vreme i Tamara te bijani, dičhilo dai laće ano vođi blizanci.

28 Sar bijani ine, jekh olendar pružinđa plo vas avrijal, a i babica phandlja lolo thav ko lesoro vas, vaćerindoj: "Akava iklilo prvo."

29 Ali baš kad cidinđa plo vas, lesoro phral iklilo, a i babica phenđa: "Sar li tu probinđan tut te ikljove prvo?" Adalese dinde le anav Fares.*

30 Palo adava iklilo lesoro phral, kole ine o lolo thav ko vas, pa olese dinde anav Zara.*