1 A o sap inele po lukavo oto sa divlja životinje saven o GOSPOD o Devel ćerđa.

Ov pučlja e đuvlja: "Čače li o Devel phenđa tumenđe: ‘Na troman te han oto nijekh kaš ano vrt?’ "

2 I đuvli phenđa e sapese: "O plodija oto kašta ano vrt amen tromaja te ha, 3 sem o plod oto kaš savoi ano maškar e vrtesoro, zako savo o Devel phenđa: ‘Ma te han olestar ni ma te pipinen le, te na meren!’ "

4 Tegani o sap phenđa e đuvljaće: "Na, sigurno naka meren. 5 Nego, džanel o Devel: kad ka han olestar, ka phravđon tumare jaćha hem ka oven sar o Devel – ka džanen soi šukar, a soi bišukar."

6 I đuvli dikhlja dai o plod oto kaš šukar hajbnase, dai šukar zako dikhiba hem dai poželjno zbog i mudrost savi šaj te del. Pa lelja o plod oto kaš hem halja le. A dinđa le hem ple romese, kova inele olaja, pa hem ov halja. 7 Tegani sodujengere jaćha phravdile hem halile dai nange. Adalese pletinde o listija e smokvakere hem ćerdefse nešto soja te učharen pe.

8 Tegani šunde o phiriba e GOSPODESORO e Devlesoro kova phirela ine ano vrt kad lelja te raćol, pa garavde pe olestar maškaro kašta ano vrt.

9 O GOSPOD o Devel vičinđa e manuše hem pučlja le: "Kaj injan?"

10 A o manuš phenđa: "Šunđum to phiriba ano vrt hem darandiljum, adalese so injum nango, i garavđum man."

11 A o Devel pučlja le: "Ko phenđa će da injan nango? Na li haljan oto kaš savestar naredinđum će te na ha?"

12 A o manuš phenđa: "I đuvli kola tu čhivđan te ovel mancar, oj dinđa man o plod oto kaš, pa me haljum."

13 Tegani o GOSPOD o Devel pučlja e đuvlja: "So ćerđan adava?"

A i đuvli phenđa: "O sap prevarinđa man, pa haljum."

14 Tegani o GOSPOD o Devel phenđa e sapese:

"Adalese so ćerđan adava,

prokleto te ove maškari sa i stoka

hem maškaro sa o divlja životinje!

Ko vođi ka vucine tut

hem prašina ka ha

sa o dive te dživdipnasere.

15 A me ka čhivav neprijateljstvo

maškara tute hem i đuvli,

hem maškaro klo potomstvo

hem olakoro potomstvo.

Ov ka zdrobini to šero,

a tu ka ha le ki patum."

16 A e đuvljaće phenđa:

"Ka barjarav te muke e bijandipnasere;

ano muke ka bijane čhaven.

Ka ovel tut želja te romese,

a ov ka vladini upra tute."

17 A e Adamese phenđa:

"Adalese so šunđan te romnja

hem haljan oto kaš zako savo naredinđum će: ‘Ma te ha olestar!’, ače:

I phuv nek ovel prokleto zbog tute.

Mukaja ka ha olatar

sa o dive te dživdipnasere.

18 Oj ka bijani će kare hem korov,

a tu ka ha o biljke oto polje.

19 Ano znoj te mujesoro maro ka ha,

sa đikote na irineja tut ani phuv,

adalese so oti phuv injan ćerdo

– prah injan hem ano prah ka irine tut. "

20 O manuš dinđa pla romnjaće anav Eva,* adalese soi oj daj sa e dživdenđe.

21 O GOSPOD o Devel ćerđa e Adamese hem lese romnjaće šeja oti koža hem urjavđa len.

22 Tegani o GOSPOD o Devel phenđa: "Ače, o manuš akana ulo sar jekh amendar, adalese so džanel soi šukar, a soi bišukar. Adalese na tromal te mukel pe lese te pružini plo vas hem te lel o plod oto kaš e dživdipnasoro, pa te hal le hem te živini večno."

23 Adalese o GOSPOD o Devel ispudinđa le taro edensko vrt, te ćerel buti upri phuv oti savi hem inele ćerdo. 24 Kad ispudinđa e manuše, istočno oto edensko vrt čhivđa heruvimija hem jagalo mači, savo kretini pe ine ko sa o strane, te pazinen o drom savo legari nakoro kaš e dživdipnasoro.