1 O GOSPOD palem mothovđa pe e Avraamese uzalo e Mamresere bare kašta sar o Avraam bešela ine ko ulaz pese oto šatori ko naj baro tatipe e divesoro.

2 O Avraam vazdinđa plo šero, i eče – dikhlja angla peste trine manušen sar terđona!

Kad dikhlja len, taro ulaz e šatoresoro prastandilo nakoro lende, pa pokloninđa pe mujeja đi phuv anglo lende. 3 I phenđa: "Gospodarona, te arakhljum milost angla tute, ma te nakhe akatar, a te na ave kora mande, koro to sluga. 4 Te anel pe hari pani, te thoven tumare pre, hem te odmorinen tumen talo akava kaš. 5 Ka anav tumenđe hem nešto hajbnase, te osvežinen tumen, a onda te džan tumare dromeja. Adalese so irinđen koro tumaro sluga."

A on phende lese: " Šukari, ćer sar so phenđan."

6 O Avraam ki sig dželo kori Sara ano šatori hem phenđa laće: "Siđar! Le i bari vreća oto najšukar varo, pa mesin hem pekh maro!"

7 Tegani prastandilo kaj ine o guruva, lelja terne thule telco hem dinđa le jekhe slugaste, kova siđarđa te spremini le zako hajba. 8 Onda o Avraam lelja i urda hem o thud hem e telco save spreminđa zako hajba hem ikalđa sa adava anglo lende. Hem sar on hana ine, ov terdino uzalo lende talo kaš.

9 Tegani pučle le: "Kaj ti romni i Sara?"

A ov phenđa lenđe: "Eče adari ano šatori."

10 Tegani jekh olendar phenđa: "Đi berše ano akava vreme ka irinav man tute, hem te romnja e Sara ka ovel čhavo."

A i Sara šunela ine sa adava ko ulaz oto šatori savo inele palo leste. 11 Hem o Avraam hem i Sara već inele but purane, hem nakhino e Sarakoro vreme te oven la čhave.

12 Adalese i Sara asandili ana peste hem phenđa: "Zar akana, kad injum purani, te doživinav adava zadovoljstvo? A hem mloi rom purano."

13 Tegani o GOSPOD pučlja e Avraame: "Sose ti romni i Sara asandili hem phenđa: ‘Zar akana ka bijanav čhave kad injum purani?’ 14 Zar e GOSPODESE nešto pharo? Ka irinav man tute đi berše ano akava vreme, hem e Sara ka ovel čhavo."

15 I Sara oti dar hovavđa vaćerindoj: "Na, na asandiljum."

A o GOSPOD phenđa: "Oja, asandiljan."

16 Tegani o manuša uštine adathar hem dikhle premali Sodoma, o Avraam lelja te džal olencar te ispratini len.

17 Tegani o GOSPOD ana peste phenđa: "Zar te garavav oto Avraam so ka ćerav? 18 Olestar čače ka ovel baro hem zoralo narodo hem prekalo leste ka oven blagoslovime sa o narodija ki phuv. 19 Adalese so, me birinđum le te sikaj ple čhaven hem ple potomkonen te ićeren pe ko drom e GOSPODESORO ćerindoj okova soi ispravno hem pravedno. Ađahar me o GOSPOD ka ćerav okova so obećinđum e Avraamese."

20 O GOSPOD phenđa: "Buti bare o optužbe protiv i Sodoma hem i Gomora hem buti pharo lengoro greh. 21 Adalese ka huljav adari hem ka dikhav da li čače ćerde sa okova so šunđum olendar. Te nane ađahar, ka džanav."

22 Okola duj manuša lelje te džan nakori Sodoma, a o Avraam ačhilo te terđol anglo GOSPOD.

23 Tegani o Avraam alo paše uzalo GOSPOD hem pučlja: "Zar čače ka uništine hem okolen soi pravedna zajedno e grešnikonencar? 24 A so te ani diz isi pinda manuša pravedna? Zar čače ka uništine adaja diz? Zar naka poštedine la zbog o pinda pravedna manuša kolai ano late? 25 Dur adalestar da ka ćere nešto ađahar – te mudare e pravednikonen zajedno e grešnikonencar, te postupine isto e pravednikonencar sar so e grešnikonencar. Dur adalestar! Zar o sudija celone svetosoro te na postupini pravedno?"

26 A o GOSPOD phenđa: "Te arakhljum ani diz Sodoma pinda manušen kolai pravedna, zbog olende ka poštedinav celo than."

27 A o Avraam phenđa: "Ače, džanav da injum samo prah hem pepeo, hem da nane man pravo te vaćerav ađahar e Gospodeja, 28 ali so te ani diz falinena pandž oto pinda pravedna manuša? Zar ka uništine celo diz zbog adala pandž manuša?"

O GOSPOD phenđa: "Te arakhljum da ani diz isi sarandu pandž pravedna manuša, naka uništinav la."

29 O Avraam palem phenđa: "A so te arakhlja pe adari samo saranda pravednici?"

A o GOSPOD phenđa: "Naka uništinav i diz te isi saranda pravedna manuša."

30 O Avraam palem phenđa: "Ma te holjani o Gospod so palem vaćerava. A so te arakhlja pe adari samo trijanda pravednici?"

A o GOSPOD phenđa lese: "Naka uništinav i diz te isi trijanda pravedna manuša."

31 Tegani o Avraam phenđa: "Nane man pravo ađahar te vaćerav e Gospodeja. A so te arakhlja pe adari samo biš pravednici?"

A o GOSPOD phenđa lese: "Naka uništinav i diz te isi biš pravedna manuša."

32 O Avraam palem phenđa: "Ma te holjani o GOSPOD so me pana jekhvar ka vaćerav. A so te arakhlja pe adari samo deš pravednici?"

A o GOSPOD phenđa lese: "Naka uništinav i diz te isi deš pravedna manuša."

33 Kad završinđa o vaćeriba e Avraameja, o GOSPOD dželo, a o Avraam irinđa pe čhere.