1 O Jakov živinđa ani phuv ki savi živinđa lesoro dad sar abanđija, ano Hanaan.

2 Akavai o izveštaj e Jakovestar:

Kad o Josif inele terno čhavo oto dešu efta berš, arakhi ine o stado ple dadesoro ple phraljencar, e Bilhakere hem e Zilpakere čhavencar, kola inele lesere dadesere romnja. Ov ple dadese anđa bišukar glaso olendar.

3 A o Izrael oto sa ple čhave najviše volinđa e Josife, adalese so bijandilo lese ano phuripe, pa ov ćerđa lese but šužo ogrtači. 4 Kad e Josifesere phralja dikhle so lengoro dad e Josife volini više oto sa čhave, zamrzinde le edobor da našti ine nijekh ljubazno lafi te phenen lese.

5 Jekhvar o Josif dikhlja suno hem vaćerđa le ple phraljenđe, pa on pana više zamrzinde le.

6 O Josif phenđa lenđe: "Šunen savo suno dikhljum: 7 Sar phandaja ine e đivesere snopija ano polje, pa mlo snop otojekhvar uštino hem ispravinđa pe, a tumare snopija čedinde pe uzalo leste hem pokloninde pe lese."

8 O phralja ko adava phende lese: "Zar tu adava mangeja te vladine upro amende? Zar mangeja te ove amaro gospodari?"

Hem pana po više lelje te mrzinen le zbog lesoro suno hem zbog sa so phenđa olendar.

9 A o Josif dikhlja hem aver suno hem phenđa le ple phraljenđe vaćerindoj: "Šunen, palem dikhljum suno: pokloninde pe maje o kham, o masek hem o dešu jekh čerenja."

10 Kad vaćerđa adava ple dadese hem ple phraljenđe, lesoro dad ukorinđa le hem phenđa: "Savoi adava suno so dikhljan! Zar me, ti daj hem te phralja ka ava hem ka poklonina amen mujeja đi phuv angla tute?"

11 I dok lesere phralja inele ljubomorna upro leste, lesoro dad razmislinđa oto sa adava.

12 Jekhvar, e Josifesere phralja legarde ple dadesere stado te hal čar paše uzalo Sihem, 13 o Izrael phenđa e Josifese: "Džane da te phralja legarde e stado te hal čar paše uzalo Sihem. Hajde, ka bičhalav tut koro lende."

O Josif phenđa: "Šukari, ka džav."

14 O Izrael phenđa lese: "Dža hem dikh da li sa šukar te phraljencar hem e stadoja, pa irin tut te javine maje."

Ađahar bičhalđa le tari Hevronsko dolina.

Kad o Josif reslo ano Sihem, 15 jekh manuš dikhlja le sar lutini maškaro polja, pa pučlja le: "So rodeja?"

16 O Josif phenđa: "Rodava mle phraljen. Phen maje, na li džane kaj legarde e stado te hal čar?"

17 O manuš phenđa lese: "Džele akatar. Šunđum len sar vaćerena: ‘Hajde ano Dotan.’"

O Josif dželo palo ple phralja hem arakhlja len paše uzalo Dotan. 18 A on odural već dikhle le, pa lelje te dogovorinen pe te mudaren le.

19 Jekh averese phende: "Ače, avela okova so dikhela sune. 20 Hajde akana te mudara le hem te frda le ani nesavi jama! Ka phena da halja le nesavi divljo zver. Te dikha onda so ka ovel oto lesere sune!"

21 Kad šunđa adava o Ruvim, dikhlja te spasini le lengere vastendar, vaćerindoj:

"Ma te mudara le! 22 Ma te čhora lesoro rat! Frden le ani akaja jama akate ani pustinja, ali ma vazden tumaro vas upro leste!"

O Ruvim phenđa adava sar te spasini e Josife taro lengere vasta hem te irini le lesere dadese.

23 Kad o Josif reslja koro ple phralja, on huljavde lestar ki sila okova šužo ogrtači, 24 pa dolinde le hem frdinde le ani jama. A ani jama na inele pani.

25 Kad bešle te han, vazdinde plo šero hem dikhle bute trgovconen kola inele Ismailovci sar avena taro Gilad. Lengere kamile inele natovarime mirisencar, balsameja hem smirnaja saven legarena ine ano Egipat.

26 O Juda phenđa ple phraljenđe: "So isi amen adalestar te mudara amare phrale hem te garava lesoro meriba? 27 Hajde te bikna le akale Ismailconenđe. Ma te vazda amaro vas upro leste, amaroi phral, amaro rat."

I lesere phralja šunde le.

28 Kad nakhle maškar olende okola Ismailovci kola inele midijanska trgovci, o phralja ikalde e Josife oti jama hem zako biš srebrnjaci bikninde le olenđe, pa on e Josife legarde ano Egipat.

29 Kad o Ruvim irinđa pe hem kad dikhlja da o Josif nane ani jama, pharavđa ple šeja upra peste, 30 pa irinđa pe koro ple phralja hem phenđa: "O čhavoro nane adari! So ka ćerav akana?"

31 Tegani o phralja lelje e Josifesoro ogrtači, čhinde jekhe jarco hem o ogrtači makhle e jarcosere rateja, 32 pa o ogrtači bičhalde koro plo dad vaćerindoj: "Arakhljam akava. Dikh na li akava te čhavesoro ogrtači."

33 O Jakov pendžarđa le hem phenđa: "Oja, adavai o ogrtači mle čhavesoro! Nesavi divljo zver sa halje le! O Josif čhinđerdoi ko kotora!"

34 Tegani o Jakov pharavđa ple šeja upra peste hem ko maškar urđa pe ano kostret, pa but dive runđa ple čhave. 35 Sa lesere čhave hem čhaja ale te tešinen le, ali ov na manglja te utešini pe.

Phenđa: "Na, ka rovav mle čhave sa đikote hem me na džava ano Šeol."

Ađahar lesoro dad runđa palo leste.

36 A okola Midijanci bikninde e Josife ano Egipat e Potifarese. Ov inele jekh oto e faraonesere bare službenici, naredniko e palatakere stražakoro.