1 Kad o Isaak purandilo hem lesere jaćha ule bizorale da našti ine više te dikhel, vičinđa ple phuredere čhave e Isave hem phenđa: "Mlo čhavo!"

A o Isav phenđa: "Akate injum dade!"

2 O Isaak phenđa: "Ače, purandiljum hem na džanav o dive kad ka merav. 3 Adalese le to oružje – ti džidajka hem te strele – pa dža ano polje hem dole maje nesava divljona životinja. 4 Onda ćer maje šužo habe, ađahar sar so me volinava, pa ana maje te hav, te blagoslovinav tut angleder so te merav."

5 A i Reveka šunđa sar o Isaak vaćeri pe čhaveja e Isaveja, pa kad o Isav dželo ano polje te dolel divljona životinja hem te anel la ple dadese, 6 i Reveka phenđa pe čhavese e Jakovese: "Ače, samo so šunđum te dade sar vaćeri te phralese e Isavese: 7 ‘Ana maje nesava divljona životinja hem ćer maje šužo habe te hav, pa te blagoslovinav tut anglo GOSPOD angleder so te merav.’ 8 Adalese šun man akana, mlo čhavo, hem ćer sar so ka phenav će. 9 Dža đi ko stado hem ana maje duje šuže jarconen, te ćerav olendar šukar habe te dadese, ađahar sar so ov volini. 10 Tegani tu ka legare le te dadese te hal, te šaj te blagoslovini tut angleder so te merel."

11 Ko adava o Jakov phenđa pla dajaće e Revekaće: "Ali mloi phral o Isav balalo manuš, a me na injum. 12 A so te mlo dad pipinđa man? Ka isperav hovavno anglo leste, pa upra mande ka čhivav prokletstvo, a na blagoslov."

13 A lesiri daj phenđa lese: "Mlo čhavo, nek to prokletstvo perel upra mande. Samo šun tu man: dža hem ana maje e jarconen."

14 Hem ov dželo, dolinđa e jarconen hem anđa len pla dajaće, a oj ćerđa šužo habe, ađahar sar so volini lesoro dad. 15 Tegani i Reveka lelja o najšuže šeja ple phuredere čhavesere e Isavesere save inola ano čher, pa urjavđa ple tiknedere čhave e Jakove, 16 a ko vasta hem ki men čhivđa lese i koža e jarcosiri. 17 Onda pe čhavese e Jakovese dinđa okova šužo habe hem o maro savo ćerđa.

18 O Jakov dželo koro plo dad hem phenđa: "Dade!"

A o Isaak phenđa: "Kova injan tu mlo čhavo?"

19 A o Jakov ple dadese phenđa: "Me injum o Isav, to prvobijando čhavo. Ćerđum sar so phenđan maje. Akana, molinava tut, ušti te ha hari akava so dolinđum, te šaj te blagoslovine man."

20 Ali o Isaak pučlja ple čhave: "Sar adava da ađahar sigate sa ćerđan, mlo čhavo?" A o Jakov phenđa: "O GOSPOD, to Devel, pomožinđa maje ko adava."

21 Tegani o Isaak phenđa e Jakovese: "Ava po paše, mlo čhavo, te pipinav tut te džanav čače li tu injan mlo čhavo o Isav ili na."

22 O Jakov alo po paše uzalo plo dad o Isaak, hem ov pipinđa le, pa phenđa: "O glasoi e Jakovesoro, ali o vastai e Isavesere."

23 Na pendžarđa le, adalese so lesere vasta inele balale sar lesere phralesere e Isavesere. Kad manglja te blagoslovini le, 24 pučlja le pana jekhvar: "Čače li tu injan mlo čhavo o Isav?"

A o Jakov phenđa: "Oja, me injum."

25 Tegani o Isaak phenđa: "Mlo čhavo, ana maje te hav hari adava so dolinđan, te šaj te blagoslovinav tut."

I o Jakov anđa lese, pa o Isaak halja; hem anđa lese mol, pa o Isaak pilja.

26 Tegani lesoro dad o Isaak phenđa: "Akana ava po paše hem čumudin man, mlo čhavo."

27 I o Jakov alo po paše hem čumudinđa le, a o Isaak osetinđa o miris oto lesere šeja, pa blagoslovinđa le, vaćerindoj:

"O miris mle čhavesoroi sar o miris oto polje

savo o GOSPOD blagoslovinđa.

28 Nek o Devel del tut rosa taro nebo hem plodno phuv

– but điv hem mol.

29 Nek služinen će o narodija

hem nek pokloninen pe će o plemija.

Vladin upro te phralja

hem nek pokloninen pe će o potomci te dajakere.

Prokleto nek ovel ko ka prokletini tut

hem blagoslovime nek ovel ko ka blagoslovini tut!"

30 Samo so dželo o Jakov ple dadestar e Isaakestar palo adava so blagoslovinđa le, lesoro phral o Isav alo taro lov. 31 Hem ov ćerđa šužo habe, anđa le ple dadese, pa phenđa lese: "Dade, ušti hem ha hari akala divljona životinja so dolinđum, te šaj te blagoslovine man."

32 A lesoro dad o Isaak pučlja le: "Ko injan tu?"

O Isav phenđa: "Me injum o Isav, to prvobijando čhavo."

33 Ko adava o Isaak but darandilo hem phenđa: "Pa ko onda inele okova so dolinđa divljona životinja hem anđa la maje? Haljum adava angleder nego so tu aljan hem blagoslovinđum le, hem adalese adava blagoslov ka ačhol upro leste."

34 Kad o Isav šunđa so phenđa lesoro dad, zorale hem ogorčime vičinđa, pa phenđa ple dadese: "Blagoslovin hem man, dade!"

35 A o Isaak phenđa: "To phral alo hem ki prevara lelja to blagoslov."

36 Tegani o Isav phenđa: "Nane ni čudno soi lesoro anav Jakov. Već dujto puti prevarinđa man – lelja mandar o pravo ko prvorodstvo, a akana, ače, lelja mandar hem o blagoslov."

Onda pučlja: "Zar maje na ačhavđan nijekh blagoslov?"

37 O Isaak phenđa: "Ole čhivđum te ovel to gospodari hem dinđum sa lesere phraljen te oven lesere sluge. Dinđum le điv hem mol. Nane man ništa so šaj te ćerav tuće, mlo čhavo!"

38 Ko adava o Isav phenđa ple dadese: "Zar samo jekh blagoslov isi tut, dade? Blagoslovin hem man, dade mleja!"

Pa zorale runđa.

39 Lesoro dad o Isaak phenđa lese:

"Dur oti plodno phuv ka ovel to čher,

dur oti rosa taro nebo.

40 Ka živine taro to mači

hem ka služine te phralese.

Ali, kad ka pobunine tut,

lesoro jaram ka frde te menjatar."

41 O Isav zamrzinđa e Jakove zbog o blagoslov saveja blagoslovinđa le lesoro dad, pa ana peste mislinđa: "Mlo dad pana hari ka merel. Tegani ka mudarav mle phrale."

42 Kad phende e Revekaće so lakoro phureder čhavo o Isav mangela te ćerel, oj bičhalđa te vičinen lakere tiknedere čhave e Jakove hem phenđa lese: "To phral o Isav mangela te osvetini pe hem te mudari tut! 43 Adalese šun man akana, mlo čhavo: naš ki sig koro mlo phral o Lavan ano Haran. 44 Ačhov koro leste nekobor dive, đikote te phralestar na nakhela i holi. 45 Kad ka nakhel lestar i holi hem kad ka bistrel so ćerđan lese, me ka javinav će te irine tut. Sose sodujen tumen te našalav ano jekh dive?"

46 I Reveka phenđa e Isaakese: "Kalilo maje više akava dživdipe zbog e Isavesere romnja o Hetitkinje. Te hem o Jakov ka lel romnjaće nesava tari akaja phuv, Hetitkinja, so valjani maje onda esavko dživdipe!"