1 Sar o manuša lelje te množinen pe hem te širinen pe ki phuv, bijandile lenđe čhaja. 2 O čhave e Devlesere dikhle dai o čhaja e manušengere šuže, pa lelje len romnjenđe, kas god mangle.

3 Tegani o GOSPOD phenđa: "Mlo duho, kova dela dživdipe, naka ačhol zauvek ano manuš, adalese soi o manuš telesno. Adalese, o manuš naka živini više oto šelu biš berš."

4 Ano adava vreme, a hem kasnije, ki phuv živinde o Nefilimija,* adalese so o čhave e Devlesere suće e manušengere čhajencar hem on bijande lenđe čhaven. On inele ratnici, prešunde manuša pana taro purano vreme.

5 O GOSPOD dikhlja kobori baro e manušesoro bišukaripe ki phuv hem dai o mislija lesere vilesere stalno irime samo nakoro bišukaripe. 6 O GOSPOD pokajinđa pe so stvorinđa e manušen ki phuv hem ano lesoro vilo inele bari dukh.

7 Adalese o GOSPOD phenđa: "Ka uništinav ki phuv e manušen kolen stvorinđum, zajedno e životinjencar hem okolencar so lazinena phuvjaja hem e čirikljencar savei ko nebo, adalese so pokajinđum man so stvorinđum len."

8 Ali o Noje arakhlja milost anglo GOSPOD.

9 Akavai o zapis oto Noje:

O Noje inele pravedno manuš, bizi mana maškaro manuša kola živinde lese ano vreme, hem ćerđa okova soi pali e Devlesiri volja. 10 Ole ine trin čhave: o Sim, o Ham hem o Jafet.

11 A i phuv anglo Devel inele rumime hem inele pherdi nasilje.

12 O Devel dikhlja da i phuv inele rumime, adalese so sa o manuša ki phuv ruminde pe, 13 pa phenđa e Nojese: "Odlučinđum te uništinav sa e manušen, adalese so i phuv pherdili nasilje zbog olende. Ače, ka uništinav len zajedno e phuvjaja. 14 Adalese ćer tuće barka oto kaš čempres. Ano late ćer pregrade, a avrijal hem andral makh la smolaja. 15 Ađahar ćer la: nek ovel šelu trijandu pandž metarija glego, bišu duj metarija buli hem dešu trin metarija uči. 16 Ćer o krov ki barka ađahar da oto vrh na tele te ovel phravdo ekvaš metari zako svetlost. O udar čhiv ki jekh strana oti barka hem ćer te ovel la teluno, srednjo hem upruno sprati.

17 Ače, ka mukav o baro pani ki phuv te uništini svako stvorenje talo nebo savo ana peste isi le o dah e dživdipnasoro. Sa soi ki phuv, ka merel. 18 Ali tuja ka phandav savez. Ka đerdine ani barka, tu, ti romni, te čhave hem lengere romnja. 19 A oto svako dživdo biće čhiv tuja ani barka po dujen, murše hem đuvlja, te preživinen tuja. 20 Oti svako vrsta e čirikljendar, oti svako vrsta e životinjendar hem oti svako vrsta e stvorenjendar so lazinena phuvjaja po duj nek đerdinen kora tute, te preživinen. 21 Le tuja sa o vrste oto hajba hem arakh ani barka, te ovel hem tuće hem olenđe zako hajba."

22 I o Noje ćerđa sa ađahar sar so naredinđa lese o Devel.