1 Akavai o zapis e Adamesere potomkonendar:

Kad o Devel stvorinđa e manuše, ćerđa le te ovel pali olesiri slika. 2 Stvorinđa murše hem đuvlja hem blagoslovinđa len, a kad stvorinđa len, dinđa len anav "manuša".

3 Kad e Adame ine šelu trijanda berš, bijandilo lese čhavo slično olese, ki lesiri slika hem ov dinđa le anav Sit. 4 Palo adava so bijandilo o Sit, o Adam živinđa pana oftošel berš hem bijandile lese pana čhave hem čhaja. 5 O Adam ukupno živinđa enjašelu trijanda berš hem mulo.

6 Kad e Site ine šelu pandž berš, bijandilo lese o Enos. 7 Palo adava so bijandilo o Enos, o Sit živinđa pana oftošelu efta berš hem bijandile lese pana čhave hem čhaja. 8 O Sit ukupno živinđa enjašelu dešu duj berš hem mulo.

9 Kad e Enose ine enjavardeš berš, bijandilo lese o Kainam. 10 Palo adava so bijandilo o Kainam, o Enos živinđa pana oftošelu dešu pandž berš hem bijandile lese pana čhave hem čhaja. 11 O Enos ukupno živinđa enjašelu pandž berš hem mulo.

12 Kad e Kainame ine eftavardeš berš, bijandilo lese o Malaleil. 13 Palo adava so bijandilo o Malaleil, o Kainam živinđa pana oftošelu saranda berš hem bijandile lese pana čhave hem čhaja. 14 O Kainam ukupno živinđa enjašelu deš berš hem mulo.

15 Kad e Malaleile ine šovardešu pandž berš, bijandilo lese o Jaret. 16 Palo adava so bijandilo o Jaret, o Malaleil živinđa pana oftošelu trijanda berš hem bijandile lese pana čhave hem čhaja. 17 O Malaleil ukupno živinđa oftošelu enjavardešu pandž berš hem mulo.

18 Kad e Jarete ine šelu šovardešu duj berš, bijandilo lese o Enoh. 19 Palo adava so bijandilo o Enoh, o Jaret živinđa pana oftošel berš hem bijandile lese pana čhave hem čhaja. 20 O Jaret ukupno živinđa enjašelu šovardešu duj berš hem mulo.

21 Kad e Enohe ine šovardešu pandž berš, bijandilo lese o Matusala. 22 Palo adava so bijandilo o Matusala, o Enoh živinđa trišel berš ćerindoj okova soi pali e Devlesiri* volja hem bijandile lese pana čhave hem čhaja. 23 O Enoh ukupno živinđa trišelu šovardešu pandž berš. 24 O Enoh živinđa ćerindoj okova soi pali e Devlesiri volja, a onda nestaninđa, adalese so o Devel lelja le.

25 Kad e Matusale ine šelu oftovardešu efta berš, bijandilo lese o Lameh. 26 Palo adava so bijandilo o Lameh, o Matusala živinđa pana eftašelu oftovardešu duj berš hem bijandile lese pana čhave hem čhaja. 27 O Matusala ukupno živinđa enjašelu šovardešu enja berš hem mulo.

28 Kad e Lamehe ine šelu oftovardešu duj berš, bijandilo lese čhavo. 29 Ov dinđa le anav Noje,* vaćerindoj: "Ov ka utešini amen ani amari phari buti savi mora te ćera ki phuv savi o GOSPOD prokletinđa." 30 Palo adava so bijandilo o Noje, o Lameh živinđa pana panšelu enjavardešu pandž berš hem bijandile lese pana čhave hem čhaja. 31 O Lameh ukupno živinđa eftašelu eftavardešu efta berš hem mulo.

32 Kad e Noje ine panšel berš, bijandile lese o Sim, o Ham hem o Jafet.