1 O Adam suća pla romnjaja e Evaja, hem oj ačhili khamni hem bijanđa e Kaine.

Tegani oj phenđa: "O GOSPOD pomožinđa man te dobinav murše čhave!"

2 Palo adava oj bijanđa hem e Kainesere phrale e Avelje. O Avelj inele pastiri, a o Kain zemljoradniko.

3 Palo nesavo vreme, o Kain prinosinđa e GOSPODESE žrtva oto plodija e phuvjakere, 4 a o Avelj prinosinđa o najšukar kotora oto mas oti prvina ple stadosiri. O GOSPOD prihvatinđa e Aveljesiri žrtva, 5 ali e Kaine hem lesiri žrtva na prihvatinđa. Adalese o Kain but holjanđa hem muklja po muj.

6 O GOSPOD pučlja e Kaine: "Sose injan holjame hem sose mukljan to muj? 7 Te ćereja okova soi šukar, ka ove prihvatime. A te na ćereja okova soi šukar, o grehi anglo to udar. Ov mangela te prelel tut, ali tu mora te nadvladine le."

8 O Kain phenđa ple phralese e Aveljese: "Hajde ano polje."

A kad inele ano polje, o Kain uštino upro Avelj hem mudarđa le.

9 O GOSPOD pučlja e Kaine: "Kaj to phral o Avelj?"

O Kain phenđa: "Na džanav. Me li injum čuvari mle phralesoro?"

10 Tegani o GOSPOD phenđa: "So ćerđan adava? Eče o rat te phralesoro vičini tari phuv nakora mande. 11 Adalese ov prokleto hem ispudime e phuvjatar savi phravđa plo muj te primini o rat te phralesoro savo čhorđan te vasteja. 12 Kad ka ćere buti upri phuv, oj naka del tut više plo bijandipe. Ka ove lutalica hem begunco ki phuv."

13 O Kain phenđa e GOSPODESE: "Mli kaznai po bari nego so šaj te akharav la. 14 Ače, avdive ispudineja man akala phuvjatar. Ka garavav man te mujestar, hem ka ovav lutalica hem begunco ki phuv, hem ko god ka arakhi man, ka mudari man."

15 O GOSPOD phenđa lese: "Na! Te neko mudari e Kaine, ka resel le efta puti po bari osveta."

Tegani o GOSPOD čhivđa znako upro Kain, te na mudari le neko kad ka resel le.

16 Tegani o Kain cidinđa pe oto muj e GOSPODESORO hem lelja te živini ani phuv Nod, istočno oto Eden.

17 O Kain suća pla romnjaja, hem oj ačhili khamni hem bijanđa e Enohe. O Kain izgradinđa diz hem dinđa la anav palo plo čhavo – Enoh. 18 E Enohese bijandilo o Irad, e Iradese bijandilo o Mehujael. E Mehujaelese bijandilo o Metušael, a e Metušaelese bijandilo o Lameh.

19 E Lamehe ine duj romnja: jekhakoro anav inele Ada, a e dujtonakoro Cila. 20 I Ada bijanđa e Javale kovai pradad okolengoro kola živinena talo šatorija hem kola arakhena stoka. 21 Lesere phralesoro anav inele Juval. Ovi pradad okolengoro kola bašalena harfa hem flauta. 22 I Cila bijanđa e Tuval Kaine, kova inele kovači oti svako vrsta alatija oti bronza hem oto sastren. Lesere phenjakoro anav inele Naama.

23 O Lameh phenđa ple romnjenđe:

"Ado hem Cilo, šunen man,

e Lamehesere romnjalen, phraven tumare kana mle lafonenđe.

Mudarđum e manuše adalese so raninđa man,

e terne murše adalese so khuvđa man.

24 Te o Kain ka ovel efta puti osvetime,

o Lameh ka ovel eftavardešu efta."

25 O Adam palem suća pla romnjaja, hem oj bijanđa čhave hem dinđa le anav Sit,* vaćerindoj: "O Devel dinđa man dujtone čhave umesto o Avelj, kole o Kain mudarđa."

26 E Sitese bijandilo čhavo hem ov dinđa le anav Enos.

Ano adava vreme o manuša lelje te slavinen e GOSPODE*.