1 O Avraam taro Hevron lelja te džal nakori phuv Negev hem adari lelja te živini maškaro Kadeš hem Šur. Dok živinđa ano Gerar sar abanđija, 2 o Avraam zaki pli romni i Sara phenđa dai lesiri phen. Adalese o Avimeleh, o caro oto Gerar, bičhalđa ple slugen pali Sara hem lelja la kora peste.

3 Ali o Devel prekali rat alo ano suno e Avimelehese hem phenđa lese: "Ka mere zbog akaja romni kola leljan, adalese soi oj dindi đuvli."

4 A o Avimeleh pana na suća e Saraja, pa phenđa: "Gospode, zar ka mudare e narodo kova nane krivo? 5 Zar na phenđa maje korkoro o Avraam: ‘Oj mli phen’? Hem na li korkori oj phenđa: ‘Ovi mlo phral’? Me adava ćerđum ani čisto savest hem na meljarđum mle vasta."

6 A o Devel phenđa lese ano suno: "Oja, džanav da adava ćerđan ani čisto savest. Adalese zadržinđum tut te na grešine protiv mande – adalese na dinđum tut te pipine la. 7 A akana irin adale manušese lesere romnja. Ovi proroko hem ka molini pe tuće, pa ka ačhove dživdo. Ali, te na irinđan la te džane da sigurno ka mere tu hem sare kolai kle."

8 O Avimeleh uštino rano sabale, pa vičinđa sa ple službenikonen. Kad vaćerđa lenđe plo suno, on but darandile.

9 Tegani o Avimeleh vičinđa e Avraame, pa pučlja le: "So ćerđan amenđe adava? So ćerđum će bišukar pa te čhive esavko baro greh upra mande hem upro mlo carstvo? Ćerđan maje okova so niko nikase ne bi ćerela."

10 Hem o Avimeleh pučlja e Avraame: "Savoi o razlog so ćerđan adava?"

11 A o Avraam phenđa: "Mislinđum: ‘Sigurno ko akava than na darana e Devlestar, pa ka mudaren man zbog mli romni.’ 12 A sem adalestar, oj čače mli phen, čhaj mle dadesiri, ali na hem mla dajakiri, pa leljum la romnjaće. 13 A kad o Devel ćerđa te ikljovav taro čher mle dadesoro, me phenđum laće: ‘Ađahar ka mothove maje to mangipe: kaj god te dža, ka phene da injum to phral.’ "

14 Tegani o Avimeleh lelja bakren, guruven, robonen hem ropkinjen hem dinđa len e Avraamese. Irinđa lese hem lesere romnja e Sara.

15 O Avimeleh phenđa: "Ače, mli phuv će ko raspolaganje. Le živin kaj god tu mangeja."

16 A e Saraće phenđa: "Ače, dinđum te phralese hiljada srebrnjaci sar dokaz da injan nevino anglo sarijende kolai tuja. Ađahar ka ove potpuno opravdime."

17 Tegani o Avraam molinđa pe e Devlese, hem o Devel sasljarđa e Avimelehe, lesere romnja hem lesere ropkinjen, pa palem šaj ine te bijanen čhaven. 18 Adalese so, o GOSPOD ano čher e Avimelehesoro ćerđa svakona đuvlja te ovel nerotkinja zbog e Avraamesiri romni i Sara.