1 Kad o Josif inele legardo ano Egipat, o Egipćanco o Potifar, jekh oto e faraonesere bare službenici, naredniko e palatakere stražakoro, činđa le oto Ismailovci kola legarde le adari.

2 O GOSPOD inele e Josifeja, pa ov inele uspešno. Živinđa ano čher ple gospodaresoro e Egipćancosoro. 3 Kad lesoro gospodari dikhlja dai o GOSPOD e Josifeja hem da dela le te ovel uspešno ano sa so ćerela, 4 o Josif arakhlja milost anglo plo gospodari hem ulo lesoro lično sluga. O Potifar čhivđa le te ovel upravniko lesere čherestar hem te brinini pe oto sa lesoro barvalipe. 5 Otkad o Potifar čhivđa e Josife te upravini lesere čhereja hem sa lesere barvalipnaja, o GOSPOD, zbog o Josif, blagoslovinđa e Egipćancosoro čher. E GOSPODESORO blagoslov inele upro sa so ine e Potifare ano čher hem ano polje. 6 O Potifar muklja e Josifese ko vasta sa so inole hem zako ništa više na brininđa, samo zako hajba savo halja.

A o Josif inele šužo murš hem inole šukar telo. 7 Palo nesavo vreme, lesere gospodaresiri romni čhivđa jakh upro leste hem phenđa lese: "Sov mancar."

8 O Josif odbinđa la hem phenđa ple gospodaresere romnjaće: "Ače, otkad me injum akate, mlo gospodari na brinini pe zako ništa ano čher, nego sa so isi le muklja maje ko vasta. 9 Ano akava čher nane niko upreder mande. Mlo gospodari na uskratinđa maje ništa sem tut, adalese so tu injan lesiri romni. Sar onda šaj te ćerav esavko bišukaripe hem te grešinav protiv o Devel?"

10 Ađahar dive palo dive oj nagovorini ine e Josife te sovel olaja, a ov odbini ine te sovel olaja hem te ovel paše uzalo late.

11 Jekh dive o Josif đerdinđa ano čher te ćerel pli buti, a andre niko na inele oto sluge. 12 Oj dolinđa le oto ogrtači hem phenđa: "Sov mancar!"

Ali ov ačhavđa plo ogrtači olaće ano vas hem ki sig naštino avri.

13 Kad oj dikhlja da ov ačhavđa plo ogrtači olaće ano vas hem da naštino avri, 14 oj vičinđa ple slugen hem phenđa lenđe: "Dikhen! Anđa amenđe akale Jevrejco te lađari amen! Manglja te sovel mancar, ali me leljum te vičinav. 15 Kad šunđa so leljum te vičinav, ačhavđa plo ogrtači kora mande hem naštino avri."

16 Ićerđa e Josifesoro ogrtači uzala peste sa đikote lesoro gospodari na alo čhere, 17 tegani hem olese vaćerđa isto priča: "Okova sluga o Jevrejco kole anđan amenđe, alo kora mande te lađari man. 18 Ali, kad leljum te vičinav, ačhavđa plo ogrtači kora mande hem naštino avri."

19 Kad lesoro gospodari šunđa i priča pla romnjakiri, koja phenđa lese: "Ađahar to sluga ćerđa mancar", inele but holjame, 20 pa lelja e Josife hem frdinđa le ano phandlipe, adari kaj inele phandle e carosere zatvorenici.

Dok o Josif inele ano phandlipe, 21 o GOSPOD inele oleja. Mothovđa lese plo mangipe hem dinđa le te arakhi milost anglo upravniko oto phandlipe, 22 kova sa e zatvorenikonen ano phandlipe muklja e Josifese ko vasta, pa o Josif inele odgovorno zako sa so ćerđa pe adari. 23 O upravniko oto phandlipe na brininđa zako ništa so inele e Josifese poverime, adalese so o GOSPOD inele e Josifeja hem dinđa le te ovel uspešno ano sa so ćerela.