1 E Avramesiri romni i Saraja našti ine te bijani lese čhaven. A inola jekh ropkinja Egipćanka koja vičinđa pe Agara, 2 pa i Saraja phenđa e Avramese: "Eče, o GOSPOD na dinđa man te oven man čhave. Dža hem sov mla ropkinjaja, šaj prekalo late ka oven man čhave."

I o Avram šunđa e Saraja. 3 Nakhlo deš berš sar o Avram živini ine ano Hanaan, kad lesiri romni i Saraja dinđa pla ropkinja, e Agara e Egipćanka, ple romese e Avramese te ovel lesiri romni. 4 Ov suća e Agaraja hem oj ačhili khamni. Kad i Agara dikhlja dai khamni, lelja te dikhel po tele pe gospodarica.

5 Tegani i Saraja phenđa e Avramese: "Tu injan krivo zaki akaja nepravda savi arakhlja man. Me anđum mla ropkinja tuće ki angali, a oj, kad dikhlja dai khamni, lelja te dikhel man po tele. Nek o GOSPOD presudini koi amendar dujendar u pravu."

6 Tegani o Avram phenđa e Sarajaće: "Ti ropkinjai tuće ano vasta. Ćer olaja sar so mangeja."

Tegani i Saraja lelja te zlostavini e Agara, pa oj našli olatar.

7 O anđeo e GOSPODESORO arakhlja e Agara koro izvor ki pustinja – o izvor kova inele nakoro drom zako Šur – 8 pa pučlja la: "Agaro, ropkinjo e Sarajakiri, kotar aljan hem kaj džaja?"

A oj phenđa: "Našava oti mli gospodarica i Saraja."

9 A o anđeo e GOSPODESORO phenđa laće: "Irin tut te gospodaricate hem pokorin tut laće." 10 Hem phenđa laće: "Ka umnožinav te potomkonen edobor but da naka šaj te dženen pe." 11 O anđeo e GOSPODESORO phenđa laće hem akava:

"Ače, khamni injan hem ka bijane čhave.

Ka de le anav Ismailo,*

adalese so o GOSPOD šunđa zaki ti nevolja.

12 Ov ka ovel sar divljo her.

Upro svakoneste ka vazdel plo vas

hem svako ka vazdel plo vas upro leste.

Ka živini ano neprijateljstvo

sa ple phraljencar."

13 Tegani oj e GOSPODE, kova vaćerđa olaja, vičinđa El Roi, adalese so phenđa: "Akate dikhljum e Devle kova dikhela man." 14 Adalese adava bunari vičini pe Beer Lahaj Roi,* a nalazini pe maškaro Kadeš hem Bered.

15 I Agara bijanđa e Avramese čhave, a o Avram dinđa le anav Ismailo. 16 E Avrame ine oftovardešu šov berš kad i Agara bijanđa lese e Ismailo.