1 Jekh dive, i Dina, i čhaj kola i Lija bijanđa e Jakovese, iklili te dikhel e đuvljen taro adava krajo. 2 Kad dikhlja la o Sihem, dolinđa la hem silujinđa la. Lesoro dad o Hamor o Hivijco inele vladari adala phuvjakoro. 3 Ali o Sihem but zavolinđa e Dina, e Jakovesere čhaja, hem zaljubinđa pe ano late. Adalese trudinđa pe te zadobini lakoro vilo.

4 O Sihem phenđa ple dadese e Hamorese: "Le maje akala čhaja romnjaće."

5 Kad o Jakov šunđa soi lesiri čhaj i Dina lađardi, lesere čhave inele ano polje e stokaja, pa o Jakov na manglja ništa te ćerel sa đikote on na irinena pe.

6 Tegani e Sihemesoro dad o Hamor alo te vaćeri e Jakoveja. 7 Kad šunde so ulo, e Jakovesere čhave irinde pe taro polje but ožalostime hem holjame, adalese so o Sihem, kad suća e Jakovesere čhajaja, ćerđa okova soi ano Izrael lađavo hem so na tromal te ćerel pe.

8 O Hamor phenđa lenđe: "Mlo čhavo o Sihem but zaljubinđa pe ani tumari čhaj. Molinava tumen den le ola romnjaće. 9 Ana te phanda brakovija maškar amende – den amen tumare čhajen romnjenđe, a tumen len amaren. 10 Živinen maškar amende – i phuv tumenđe ko raspolaganje: živinen, biknen hem stekninen tumenđe phuv ano late."

11 A o Sihem phenđa e Dinakere dadese hem lakere phraljenđe: "Te arakhav milost angla tumende, pa ka dav tumen so god mangena. 12 Odredinen kobor god mangena i cena zaki bori hem daro savo god mangena, pa me ka dav tumen kobor god ka roden – samo den ma e čhaja romnjaće."

13 Adalese so lengiri phen i Dina inele lađardi, e Jakovesere čhave ki prevara odgovorinde e Sihemese hem lesere dadese, e Hamorese: 14 Phende lenđe: "Našti adava te ćera – te da amara phenja biobrezime manušese – adava bi amenđe ovela lađ. 15 Ka prihvatina adava so mangena samo te uljen sar amen ađahar so ka obrezinen svakone tumare murše. 16 Tegani ka da tumen amare čhajen hem ka la tumare čhajen amenđe, ka živina maškara tumende hem tumencar ka ova jekh narodo. 17 Ali, te na šunđen amen hem na obrezinđen tumen, onda amen ka la amara phenja hem ka dža."

18 Lengoro predlog sviđinđa pe e Hamorese hem lesere čhavese e Sihemese. 19 O Sihem, kova inele najugledno sarijendar ano čher ple dadesoro, na razmislinđa pe ni hari te ćerel okova so rodinde, adalese so edobor manglja e Jakovesere čhaja. 20 Adalese o Hamor hem lesoro čhavo o Sihem džele angli kapija pumare dizjakiri te vaćeren pumare dizutnencar, vaćerindoj:

21 "Adalai manuša šukar premala amende. Ana te muka len te živinen ani amari phuv hem te biknen ano late – isi olenđe dovoljno than ani akaja phuv. Amen šaj te la lengere čhajen romnjenđe, a on šaj te len amare čhajen romnjenđe. 22 Ali akala manuša ka pristaninen te živinen amencar sar jekh narodo samo te svako murš maškar amende obrezini pe sar so on obrezinena pe. 23 Zar olengiri stoka, lengoro barvalipe hem sa avera životinje ađahar naka oven amare? Adalese ana te pristanina, hem on ka živinen maškar amende."

24 I sa olengere dizutne složinde pe e Hamoreja hem lesere čhaveja e Sihemeja, pa svako murš ani diz obrezinđa pe.

25 Ali ko trito dive, sar pana sarijen olen ine dukha, duj čhave e Jakovesere, o Simeon hem o Levije, e Dinakere phralja, lelje pumare mačija, pa đerdinde iznenada ani diz hem mudarde svakone murše. 26 Mačeja mudarde e Hamore hem lesere čhave e Siheme, lelje e Dina taro čher e Sihemesoro pa džele. 27 Avera čhave e Jakovesere ale ko adava than kaj inele o mudariba pa čorde i diz adalese so lengiri phen inele lađardi. 28 Lelje lengiri sitno hem krupno stoka, e hernen hem sa olengoro so inele ani diz hem ano polje. 29 Legarde sa olengoro barvalipe, legarde sa lengere romnjen hem e čhavoren hem čorde sa so inele ano čhera.

30 Tegani o Jakov phenđa e Simeonese hem e Levijese: "Ćerđen maje nevolja akaleja, adalese so o manuša akala phuvjakere, o Hanaanci hem o Perižanja, zamrzinde man. Amen injam hari, pa te on udružinde pe protiv mande te napadinen man, ka ova uništime hem me hem mle čherutne."

31 Ali on phende lese: "Našti ov te postupini amara phenjaja sar bludnicaja."