1 A ano adava vreme ki sa i phuv vaćerđa pe samo jekh čhib hem koristinde pe ista lafija. 2 Sar o manuša džana ine ko istok, arakhle jekh dolina ani phuv Šinar hem adari lelje te živinen.

3 Tegani phende jekh averese: "Hajde te ćera cigle hem te peka len šukar te zoraljon."

Ađahar koristinde cigla umesto bar, a i smola služinđa lenđe umesto malteri.

4 Onda phende: "Hajde te gradina amenđe diz hem kula savakoro vrh ka ovel đi ko nebo. Adaleja ka ćera amenđe baro anav hem te na rasejina amen ki sa i phuv."

5 A o GOSPOD huljilo te dikhel i diz hem i kula so gradinde o manuša.

6 O GOSPOD phenđa: "Adalese soi on jekh narodo hem sarijen isi jekh čhib, ondai akava samo početak oto lengere delja. Akana naka ovel lenđe nemoguće te ćeren sa okova so zamislinena. 7 Hajde te hulja hem te pomešina lengiri čhib, te na haljoven jekh avere."

8 Ađahar o GOSPOD adathar rasejinđa len ki sa i phuv, pa on ačhavde te gradinen i diz. 9 Adalese i diz vičini pe Vavilon,* adalese so adari o GOSPOD pomešinđa i čhib sa e manušengiri, hem adathar rasejinđa len ki sa i phuv.

10 Akavai e Simesere potomci:

Duj berš palo potop, kad e Sime ine šel berš, bijandilo lese o Arfaksad. 11 Palo adava so bijandilo o Arfaksad, o Sim živinđa pana panšel berš, hem bijandile lese pana čhave hem čhaja.

12 Kad e Arfaksade ine trijandu pandž berš, bijandilo lese o Sala. 13 Palo adava so bijandilo o Sala, o Arfaksad živinđa pana štaršelu trin berš, hem bijandile lese pana čhave hem čhaja.

14 Kad e Sala ine trijanda berš, bijandilo lese o Ever. 15 Palo adava so bijandilo o Ever, o Sala živinđa pana štaršelu trin berš, hem bijandile lese pana čhave hem čhaja.

16 Kad e Evere ine trijandu štar berš, bijandilo lese o Falek. 17 Palo adava so bijandilo o Falek, o Ever živinđa pana štaršelu trijanda berš, hem bijandile lese pana čhave hem čhaja.

18 Kad e Faleke ine trijanda berš, bijandilo lese o Ragav. 19 Palo adava so bijandilo o Ragav, o Falek živinđa pana dušelu enja berš, hem bijandile lese pana čhave hem čhaja.

20 Kad e Ragave ine trijandu duj berš, bijandilo lese o Seruh. 21 Palo adava so bijandilo o Seruh, o Ragav živinđa pana dušelu efta berš, hem bijandile lese pana čhave hem čhaja.

22 Kad e Seruhe ine trijanda berš, bijandilo lese o Nahor. 23 Palo adava so bijandilo o Nahor, o Seruh živinđa pana dušel berš, hem bijandile lese pana čhave hem čhaja.

24 Kad e Nahore ine bišu enja berš, bijandilo lese o Tara. 25 Palo adava so bijandilo o Tara, o Nahor živinđa pana šelu dešu enja berš, hem bijandile lese pana čhave hem čhaja.

26 Kad e Tara ine eftavardeš berš, bijandile lese o Avram, o Nahor hem o Haran.

27 Akavai e Tarasere potomci:

E Tarase bijandile o Avram, o Nahor hem o Haran.

E Haranese bijandilo o Lot. 28 O Haran mulo angleder ple dadestar e Tarastar, ano Ur Haldejsko, ani phuv kaj bijandilo.

29 O Avram hem o Nahor leljefse romnjen. E Avramesiri romni vičinđa pe Saraja, a e Nahoresiri romni vičinđa pe Milka, koja inele čhaj e Haranesiri. O Haran inele e Milkakoro hem e Jiskakoro dad. 30 A e Saraja na ine čhave, adalese so inele nerotkinja.

31 O Tara lelja ple čhave e Avrame, ple unuko e Lote, kova inele e Haranesoro čhavo, hem pla borja e Saraja, savi inele romni lesere čhavesiri e Avramesiri, hem olencar taro Ur Haldejsko dželo ki phuv Hanaan. Ali kad resle đi ko Haran, lelje te živinen adathe.

32 O Tara živinđa dušelu pandž berš hem mulo ano Haran.