Maria

26 Ye bosome nzia nanu ne, Nyameɛ somane abɔfo Gabriel hɔle Galilea kuro bie bɔ bɛfrɛ ye Nazerɛt nu, 27 ɔsomane ye wɔ ababunu bie berɛ. Né bahyɛ Yosef bɔ ofi David abusua nu ne bɔ kyɛ, bɛkɔmaa okogya sɔ ababunu ne, né ababunu ne dumaa li Mary. 28 Abɔfo ne wurale awuro berɛ ne, ɔha hyirele ye kyɛ: "Wɔ bɔ balo wɔ, mekyea wɔ, Awurade boka wɔ so."

30 Yeti abɔfo ne ha hyirele ye kyɛ: "Mary, nnɛsuro, ofikyɛ Nyameɛ alo wɔ. 31 Nea, ɛkɔnwonzɛ kɔwo baa brienzua, na odikyɛ ɛto ye dumaa Yesu. 32 Ɔkɔyɛ sona titire, na bɛkɔfrɛ ye Anwuro-Anwuroniɛ né awa. Na Awurade Nyameɛ kɔfa ye baba David bia* kɔma ye, 33 na okoli Yakob awuro so Hene afebɔɔ, na ye ahennie ne ngɔwa awieɛ."

18 Atee bɔ bɛfale so bɛwole Yesu Kristo ne ɛhe: Bɛfale ye maame Mary bɛmane Yosef kyɛ ɔye bɔ ɔbaagya ye. Né onya hɔlle agyaa bo, nakoso bɛnwuni kyɛ honhom krongron amaa wanwonzɛ.

46 Yeɛ Mary hane kyɛ:

"Me kra, kamvo Awurade

47 na me honhom di ahurusi wɔ m’Agyenkwa Nyameɛ nwo,

48 ofikyɛ, wapɛ ye nye waanea ye afaneɛ bɔ ɔtte sona bie ne.

Nea, ofi ɛnɛ bɔ ɔkɔ ne, mmenia* mukoraati kɔha kyɛ nne anigye,

49 ofikyɛ, Otumvoɛ ne ayɛ nikye piri paa ama me,

na krongron yeɛ ole ye dumaa.

50 Na ofi aworɛ ndoɔtoasoɛ so bɔ ɔkɔ aworɛ ndoɔtoasoɛ so ne,

bɛ bɔ bɛsuro ye ne yeɛ onwu bɛ anwunvo ɔ.

51 Wafa ye sa wayɛ nningyein mbiri-mbiri;

bɛ bɔ bɛte dwɛɛ wɔ b’ahone nu ne,

wabɔ bɛ wapete.

52 Watu atumvoɛ wafi bɛ bia so,

na wama bɛ bɔ bɛyɛ anwunvo naso;

53 bɛ bɔ ɛhɔen ku bɛ ne, wama bɛ nningyein pa maa bɛ ko ayi,

na wamaa asikafoɛ afa bɛ sa nzaa-nzaa ahɔ.

54 Waaboka ye akoaa Israel,

na wakaye ye anwunvoin ne,

55 kyɛbɔ ɔhane ye nwo dwirɛ hyirele yɛ nana mɔ,

kyɛ okonwu Abraham ne ye bosofoɛ anwunvoin daa ne."

4 Na Yosef koso, ɔnate kyɛ ofi David awuro ne ye abusua nu nati, ofili Nazerɛt bɔ ɔwɔ Galilea ne, na osili nu hɔle David kuro Betlehem bɔ ɔwɔ Yudea ne. 5 Ɔhɔle kyɛ ɔkwaahworɔ ɔne Mary bɔ bafa ye bama ye kyɛ ogya ye ne dumaa, sɔ mmerɛ ne, né waha kaa maa Mary wo.

6 Bɛdwuli berɛ ne, aworɛ hane Mary. 7 Na ɔwole brienzua, ɔwa panyi, na ɔfale ɛtena kyekyele ye nwo, yeɛ ɔfale ye tole alaka bɔ ngaka didi nu nanu, ofikyɛ bannya nekaa wɔ ɛwɔfoɛ sua nemɔ nu.

19 nakoso Mary de, ɔfale edwirɛ he amukoraati siele ye ahone nu, na ɔdwenene ye nwo.

34 Afei Simeon hyirale bɛ, yeɛ ɔha hyirele Mary, bɔ ɔte akwalaa ne maame ne kyɛ:

"Baye akwalaa he kyɛ, ɔma mmeni pee fi ase wɔ Israel,

na ɔma pee koso dwɔso,

na ɔkɔyɛ nzɛngyerɛneɛ bɔ mmeni pee kodwudwo kotia,

35 kyɛbɔ ɔkɔyɛ a, mmeni pee tianu nzusuyɛɛ kɔla ali,

(amba, dadeɛ tendee bie kosina wɔ)."

48 Ye awofo nwuni ye ne, bɛ nwo dwirili bɛ, na ye maame bisale ye kyɛ: "Mma, nzuati yeɛ ayɛ yɛ sɔ ne? Mene wɔ baba apena wɔ afɛ pa." 49 Na ye koso ɔha hyirele bɛ kyɛ: "Nzuati yeɛ ɛmɔpena me ɔ? Ɛmɔnze kyɛ odikyɛ metena me baba awuro anaa?" 50 Nakoso bɛ de, bannde bɔ ɔha hyirele bɛ ne bo.

51 Ɔne bɛ sa hɔle Nazerɛt, na ɔbrɛle ye nwo ase mane bɛ. Na ye maame fale edwirɛ he amukoraati siele ye ti anu.

3 Bɛ nzãa ne yiele, yeti Yesu maame ha hyirele ye kyɛ: "Bɛ nzãa ne ayie oo." 4 Nakoso Yesu ha hyirele ye kyɛ, "Maame, ɛhe de, ɔfa mene wɔ nwo sɛ? Me mmerɛ nya sonne." 5 Na ye maame ha hyirele asomvoɛ ne kyɛ: "Bɔ ɔkaha kohyire ɛmɔ biala ne, ɛmɔyɛ."

25 Né Yesu maame, ye maame aliema brasua, Klopa aye Mary, ne Mary Magdalene gyi asɛnnua ne bo berɛ. 26 Yeti mmerɛ bɔ Yesu nwuni ye maame ne suaniɛ bɔ okuro ye dwirɛ ne kyɛ bɛgyi berɛ ne, ɔha hyirele ye maame kyɛ: "Maame, nea, ɛwa brienzua ɛhe!" 27 Yeɛ ɔha hyirele suaniɛ ne kyɛ: "Nea, wɔ maame ɛhe!" Na ofi sɔ mmerɛ ne, suaniɛ ne fale ye hɔle ye awuro.

31 Yesu maame ne oliema mmrienzua nemɔ wale bɛɛgyinane aluo dɔ, na bɛsoma ebie kyɛ ɔfrɛ ye ma bɛ. 32 Né mmeni pee apɛ ye nwo ayia, yeti, bɛha bɛhyirele ye kyɛ: "Nea, wɔ maame ne eliema mɔ gyi aluo dɔ, bɛnwa ɛbra." 33 Nakoso, ɔha hyirele bɛ kyɛ: "Nwa yeɛ ole me maame ne nniema mɔ?" 34 Afei, ɔneane bɛ bɔ bapɛ ye nwo bayia namukoraati, na ɔhane kyɛ: "Me maame ne nniema mɔ yeɛ bɛtete wa ne. 35 Ebiala bɔ ɔyɛ bɔ Nyameɛ kuro ne, ɔte nniema brienzua, nniema brasua, ne me maame."

55 "Nná kapentaniɛ ne awa ne ɛhe? Nná ye maame yeɛ ole Mary, na nná oliema mmrienzua yeɛ ole Yakobo, Yosef, Simon ne Yuda? 56 Na oliema mmrasua koso, nná yɛne bɛ yeɛ ɛwɔ wa ne? Ye de, nisua yeɛ onyane ɛhe amukoraati fili ɔ?"

14 Bɛ mukoraati bɛyɛle adwene kõ bɛbɔle mbaeɛ daa, bɛ ne mmrasua nemɔ ne Yesu maame Mary, né Yesu aliemaa nemɔ koso wɔ berɛ.