1 Afei aliemaa mɔ, ɛmɔhɔ so bɛbɔ mbaeɛ bɛma yɛ, kyɛbɔ ɔkɔyɛ a Awurade dwirɛ ne kɔtrɛ ndɛndɛ, na wanya anuonyam, kyɛbɔ wanya ye wɔ ɛmɔ dɔ ne. 2 Afei ɛmɔsrɛ Nyameɛ, kyɛ ole yɛ fi amumuyɛfoɛ ne abɔnefoɛ sa nu, ofikyɛ nná ebiala yeɛ ole gyidie ɔ. 3 Nakoso, Awurade di nahorɛ, na ɔkɔmaa ɛmɔ kɔyɛ se na wabɔ ɛmɔ nwo waen wafi ɔbɔnefoɛ ne sa nu. 4 Na yɛle ɛmɔ nu gyidie wɔ Awurade nu, kyɛ akwankyerɛ bɔ yɛfa yɛmane ɛmɔ ne, ɛmɔfa bɛyɛ adwuma, na ɛmɔ kɔhɔ so bɛkɔfa bɛkɔyɛ adwuma. 5 Yɛsrɛ Awurade kyɛ, ohyire ɛmɔ ahone atee hɔ Nyameɛ dɔ nwo, na Kristo ti, ɛmɔmia ɛmɔ nye.

6 Afei aliemaa mɔ, yɛ ma ɛmɔ akwankyerɛ wɔ Awurade Kristo Yesu dumaa nu kyɛ, aliemaa biala bɔ ɔnate basabasa, na ɔmva edwirɛ bɔ yɛha yɛ hyirele ɛmɔ* ne nnyɛ adwuma ne, ɛmɔhwe ɛmɔ nwo bɛfi ye nwo. 7 Ná ɛmɔ bɔbɔ ɛmɔse kyɛ, odikyɛ ɛmɔsuesua yɛ, ofikyɛ yannyɛ basabasa wɔ ɛmɔ nu, 8 na yanni ebiala aleɛ mbaen.* Mmom yɛ yerele yɛ nwo yɛ yɛle adwuma eyia ne kɔngɔen, kyɛbɔ ɔkɔyɛ a, yɛngɔfa adesoa biala yɛngɔto ɛmɔ so ɔ. 9 Né yɛle tumi kyɛ yedɛ nningyein yefi ɛmɔ berɛ, nakoso né yɛpena kyɛ yɛyɛ nikye bie maa ɛmɔ suesua. 10 Nahorɛ dwirɛ yeɛ ole kyɛ, mmerɛ bɔ ne yɛwɔ ɛmɔ berɛ ne, né yɛtaa yɛma ɛmɔ ahyɛdeɛ kyɛ: "Sona biala bɔ onguro kyɛ ɔyɛ adwuma a, nnɛmaa odidi." 11 Yate kyɛ ebiemɔ nate basabasa wɔ ɛmɔ nu bɔ bɛnyɛ adwuma koraa, na bɛfa bɛ nwo bɛdide amanvoɛ dwirɛ nu. 12 Sɔ mmenia ne, yɛhyɛ bɛ, na yɛtu bɛ fo wɔ Awurade Yesu Kristo nu kyɛ, bɛyɛ konn, na bɛyɛ adwuma bɛpena bɛ noa aleɛ. 13 Aliemaa mɔ, ɛmɔ de, nnɛmɔ yakyi pa bɔ ɛmɔyɛ ne.

14 Nakoso, sɛ ebie andie edwirɛ bɔ ɔwɔ krataa he anu ne a, ɛmɔhyɛ sɔ sona ne nzorɛ, na ɛmɔhwe ɛmɔ nwo bɛfi ye nwo, ná wamaa wafɛle. 15 Nakoso, Nnɛmɔbu ye kyɛ ɔte ɛmɔ tamfo, mmom, ɛmɔtu ye fo kyɛ aliemaa.

16 Yɛsrɛ asomdwie Wura ne kyɛ, ye bɔbɔ ɔma ɛmɔ asomdwie daa wɔ atee biala so. Awurade ne ɛmɔ mukoraati tena.

17 Paul, me ngyeaa bɔ mafa me bɔbɔ me sa mahworɔ ɛhe. Ɛhe yeɛ mefa mehyɛ me ngrataa mukoraati nzorɛ ɔ, sɔa yeɛ metworɔ ɔ.

18 Y'Awurade Yesu Kristo Adom ha ɛmɔ mukoraati.