1 Me Paul, bɔ y'Agyenkwa Nyameɛ ne Yesu Kristo bɔ ɔte y'anidasoɛ né aye me kyɛ nyɛ Yesu Kristo somafoɛ,

2 mefa krataa he mekɔma Timoteo bɔ ɔte mma paa wɔ gyidie nanu ne.

Adom, asomdwie, ne anwunvoin bɔ ofi yɛ Baba Nyameɛ, ne y'Awurade Yesu Kristo berɛ ha wɔ.

3 Mekɔ Makedonia ne, nzrɛle wɔ kyɛ ɛtena Efeso, sɔ ala yeɛ kesaalae mesrɛ wɔ kyɛ tena berɛ, na ma ebiemɔ nwu ye kyɛ ɔnzɛ kyɛ bekyirekyire ngyerɛkyerɛ foforɛ biala, 4 na nnɛmaa bɛha bɛ nwo wɔ anansesɛm* ne abusua sanden nwo dwirɛ nwo. Mvasoɛ biala nne sɔ nningyein nemɔ so, na bɔ ofi nu ba yeɛ ole ngẽka; na ɔmma yɛnnya nikye biala bɔ ɔkɔmaa yɛ gyidie kɔyɛ se mvi Nyameɛ berɛ. 5 Bɔ ɔte yeɛ ole kyɛ, akwankyerɛ he botae yeɛ ole kyɛ, yɛkofi ahone bɔ enu te nu, ahonim* pa, ɔne gyidie bɔ nyaatwom nne nu yɛkɔla ɔdɔ ali. 6 Ebiemɔ ahwe bɛ nwo afi sɔ nningyein hemɔ nwo, na edwirɛ bɔ mvasoɛ biala nne so yeɛ bɛkeka ɔ. 7 Bɛpena kyɛ bɛkyire mmeraa ne, nakoso bɔ bɛka ne po, bɛnde yebo, na bɔ basɔ nu twaan ne koso, bɛnde yebo.

8 Yɛse kyɛ, sɛ ebie fa mmeraa ne yɛ adwuma yé de a, mmeraa ne te pa, 9 nakoso odikyɛ onwu kyɛ, nná teneneefoɛ ti yeɛ bɛhyɛ mmeraa ɔ, mmom bɛhyɛ mmeraa bɛma mmeratofoɛ, atuatefoɛ, bɛ bɔ bɛnzuro Nyameɛ, abɔnefoɛ, bɛ bɔ bɛdi bɛ mmango mɔ hwamɔ, bɛ bɔ bɛ nwo nde, bɛ bɔ bɛku bɛ baba ne bɛ maame mɔ, awudifoɛ, 10 adwamammɔfoɛ, mmrienzua bɔ bɛne mmrienzua da, bɛ bɔ bɛkye mmenia besie, bɛ bɔ bɛnga nahorɛ, bɛ bɔ bɛka ndaen a benni so, ɔne nikye biala bɔ ɔne ngyerɛkyerɛ pa ne nyia ne, 11 kyɛbɔ anuonyam nzɛmba bɔ anigye Nyameɛ ne afa ama me ne te ne.

12 Meda y'Awurade Yesu Kristo bɔ ɔma me anwoserɛ ne ase, ofikyɛ wanwu me kyɛ ebie bɔ odi nahorɛ, yeti yeɛ wafa ɔsom adwuma bie wawura me sa ne. 13 Ɔwɔ nu, mmerɛ bie bɔ wapɛ nu ne, né mekeka mmusue dwirɛ, metane mmenia nye, na ne nde patapaa. Nakoso onwuni me anwunvo, ofikyɛ ne menze bɔ meyɛ ɔ, na né nne gyidie koso. 14 Nakoso, y'Awurade adom ne bole me so, ɔne gyidie ne ɔdɔ bɔ ɔwɔ Yesu Kristo nu ne. 15 Sɔ dwirɛ he te nahorɛ, na odikyɛ yedɛ yɛ to nu; yeɛ ole: Kristo Yesu wale ewiase kyɛ ɔbaale abɔnefoɛ ngoa, ná me yeɛ nni moa wɔ sɔ abɔnefoɛ nemɔ nu ɔ. 16 Ye mukoraati si ne, onwuni me anwunvo kyɛbɔ ɔkɔyɛ a me bɔ nni moa wɔ abɔnefoɛ nu ne, Kristo Yesu kɔfa me so kɔye y'aboterɛ mukoraati ali, na wafa me wayɛ nneasoɛ wama bɛbɔ bekonya ye nu gyidie ne, na banya daa ngoa. 17 Afei, Ɔhene bɔ ɔwɔ berɛ daa bɔ ɔmborɔ, ná anyeɛ nnwu ye ne, Nyameɛ komapɛ twen ne, ye yeɛ nidie ne anuonyam ha ye daa, daa. Amen.

18 Afei, mma Timoteo, mefa akwankyerɛ he mewura wɔ sa, kyɛbɔ ngɔm bɔ bɛhyɛ bɛfale wɔ nwo ne te ne, na wamaa ahõ koɛ pa ne, 19 atira gyidie ne ahonim pa nu. Ɛhe yeɛ ebiemɔ apia ato nekaa bie bɔ wamaa bafĩ ase wɔ gyidie nanu ne. 20 Bɛ nu bie yeɛ ole Himeneo ne Alɛzanda, na bɛ de, mafa bɛ mawura Satan sa kyɛ ɔhwe bɛ so, ná wamaa basua kyɛ bɛngɔkeka mmusue dwirɛ kõ.