1 Nakoso, honhom* ne ka ye pefee kyɛ, mmerɛ bɔ oli siɛ nanu ne, ebiemɔ kɔhwe bɛ nwo kofi gyidie nanwo, na bɛkooli honhom nu dwirɛ bɔ ɔtte nahorɛ, ɔne sunzummɔne ngyerɛkyerɛ si. 2 Bɔ ɔte yeɛ ole kyɛ, bɛkotie nyaatwomfoɛ bɔ bɛnga nahorɛ, bɔ b'ahonim awu koraa ná wayɛ kyɛ kena-mvoin bɔ buralɛ ayera ebie maa waala ye berɛ ne. 3 Bɛbra agyaa, na bɛhyɛ mmenia kyɛ betua bɛ nwo aleɛ bɔ Nyameɛ abɔ kyɛ bɛ bɔ bɛle gyidie na banwu nahorɛ ne fa asennaa li ne. 4 Ofikyɛ nikye biala bɔ Nyameɛ abɔ ne nwo te, yeti sɛ ebie fa asennaa dɛ́ a, ɔnzɛ kyɛ okyi nikye fee, 5 ofikyɛ Nyameɛ dwirɛ ne mbaeɛ yeɛ bɛfa bɛte ye nwo ɔ.

6 Sɛ ɛfa afutuo he ma aliemaa nemɔ a, ɛkɔyɛ Kristo Yesu somvoɛ pa, bɔ bafa edwirɛ bɔ ogyi gyidie ne ngyerɛkyerɛ pa naso batete ye, ɛhene yeɛ ali ye si pɛpɛɛpɛ ne. 7 Nakoso, edwirɛ bɔ ɔtte nahorɛ bɔ otia nningyein krongron ne, bɔ gua. Ebie yeɛ ole bɔ nworowaa mɔ ka ne. Mmom fa nyamesom pa tete wɔ nwo. 8 Ofikyɛ, sɛ ɛtengyɛ-tengyɛ w'aporɛ nu a, mvasoɛ kaa wɔ so, nakoso mvasoɛ wɔ nyamesom pa so wɔ nikye biala nu, ofikyɛ ɔboka yɛ ɛnɛ, na ɔkɔboka yɛ wɔ ngoa bɔ ɔkɔwa kyẽa bie nanu koso. 9 Ɛhe te nahorɛ dwirɛ bɔ odikyɛ yedɛ yɛ to nu koraa. 10 Ɛhe ati yeɛ yɛyere yɛ nwo yɛyɛ adwuma serɛ ne, ofikyɛ yɛ nye la Nyameɛ bɔ ɔte ase naso. Ye yeɛ ɔte mmenia mukoraati Agyenkwa ne, ɛnga-nga bɛ bɔ bɛdi nahorɛ ne.

11 Kɔ so fa ahyɛdeɛ he ma bɛ, na kyirekyire bɛ. 12 Nnɛmaa ebiala bu abrandeɛ bɔ ɛte ne animtia, mmom yɛ nneasoɛ pa ma bɛ bɔ bɛdi nahorɛ ne wɔ dwudwolɛ, suban, ɔdɔ, gyidie, ne ahoteɛ nu. 13 Fa wɔ nwo wura badwanu kengalɛ ne ngyerɛkyerɛ nu kodwu kyɛ ngɔwa. 14 Nnɛbu wɔ nye gua akyɛdeɛ bɔ ɔwɔ wɔ nu, bɔ mbanyi nemɔ nate ngɔmhyɛ so fa mane wɔ mmerɛ bɔ bɛfale bɛ sa bɛguale wɔ so naso. 15 Dwenedwene ɛhemɔ nwo, fa w'adwene mukoraati sie so, ná wamaa ebiala anwu ngɔsoɛ bɔ enya ye ne. 16 Nea wɔ nwo so yé, na ma wɔ nye hɔ wɔ ngyerɛkyerɛ nwo. Yere wɔ nwo yɛ ɛhemɔ, sɛ ɛyɛ sɔ a, ekole wɔ nwo ɔne bɛ bɔ betie wɔ ne ngoa.