1 Nnɛtwi panyi nyunu, mmom dwudwo kyire ye te kyɛ wɔ baba, ɛne mmrandeɛ nemɔ koso tena kyɛ eliema mmrienzua, 2 mmrasua mbanyi ne koso, yɛ bɛ kyɛ wɔ maame mɔ, na ɛne ndaluwa nemɔ tena te kyɛ eliema mmrasua wɔ ahoteɛ mukoraati nu.

3 Akunafoɛ bɔ bɛlle bie ne, boka bɛ. 4 Nakoso, sɛ kunaniɛ bie le mmaa anaa nnomaa a, ye de odikyɛ bɛdi moa bɛsua kyɛ bɛkɔla nyamesom pa ali wɔ awuro, na bɛfa bɔ ɔfata b'awofo ne bɛ nana mɔ bɛma bɛ, ɛhene yeɛ ɔsɔ Nyameɛ nye ɔ. 5 Na brasua kunaniɛ bɔ olle bokafoɛ biala, ná wahia ye ne, wafa ye nye wato Nyameɛ so, na daa biala ɔfa ngotosrɛ ne mbaeɛ kɔ ye nyunu eyia ne kɔngɔen. 6 Nakoso, kunaniɛ bɔ odi ye akɔnnɔ si ne, ɔte te-ase-awuo. 7 Kɔ so fa ahyɛdeɛ he ma bɛ, na ebiala annya bɛ nwo dwirɛ biala anga. 8 Nahorɛ dwirɛ yeɛ ole kyɛ, sɛ ebie ngora nnea ye abusuafoɛ, ɛnga-nga bɛ bɔ ɔne bɛ te awuro ne a, wahwe ye nwo wafi gyidie nanwo, na ɔte nnipa-bɔneniɛ tra bɔ onne nni ne.

9 Sɛ ɛkɔfa kunaniɛ bie dumaa kɔboka so a, sana wali afoɛ 60 bɔ ɔkɔ ne, ebie bɔ né ohu kõ, 10 na bɛdi ye nwo adanzeɛ kyɛ ɔyɛ nyumaa pa; ebie yeɛ ole kyɛ ɔtete mmaa, odɛ́ mmenia wɔfoɛ, onwunzi akrongronfoɛ gya bo, ɔboka bɛ bɔ bɛ nwo ahyere bɛ ne, na ofi ye ahone nu yɛ adwuma pa biala.

11 Nakoso, nnɛfa akunafoɛ bɔ bɛte ndaluwa ne boka so, ofikyɛ sɛ b'akɔnnɔ ye b'adwene fi Kristo so a, ɛyɛ a ne bɛpena kyɛ bɛgya, 12 na bekonya atemmuo, ofikyɛ bapo gyidie bɔ bɛli moa benyane ye ne. 13 Afei koso, bɛbayɛ mmenia bɔ bɛnguro adwuma, na ekonwu ye ne, ne bɛnate-nate amanvoɛ awuro nu. Nná adwuma ngome yeɛ bɛnguro ɔ, mmom bɛdi nzekure, bɛfa bɛ nwo bɛdide amanvoɛ dwirɛ nu, na bɛkeka edwirɛ bɔ ye nwo nhia kyɛ bɛka ɔ. 14 Yeti, akunafoɛ bɔ bɛte ndaluwa ne de, mepena kyɛ bɛgya, bɛwo mmaa, na bɛnea b'awuro, na wamma ɔtamfo ne annya yɛ nwo dwirɛ biala anga. 15 Ofikyɛ ebiemɔ ahwe bɛ nwo baali Satan si dada. 16 Sɛ gyidiniɛ brasua le abusuafoɛ bɔ bɛte akunafoɛ a, maa ɔboka bɛ, ná bannyɛ adesoa bamma asafo ne. Ɛhe kɔmaa asafo ne kɔhora kɔnea akunafoɛ bɔ bɛlle bie ne.

17 Ɛmɔfa nidie paa* bɛma mbanyi bɔ bɛdi nningyein nyunu yé ne, titire ne, bɛ bɔ bɛbɔ mmɔden wɔ dwudwolɛ ne ngyerɛkyerɛ nu ne. 18 Ofikyɛ tworɔnzɛm ne ka kyɛ, "Nnɛkyekye nandwie noa, mmerɛ bɔ ɔporo hwiit ne," yeɛ "Sɛ ebie yɛ adwuma a, ye akatua fata ye." 19 Sɛ bɛbɔ panyi bie sommoɛ a, nnedɛ to nu, sana mmenia nyɔ anaa nza di ye nwo adanzeɛ kora. 20 Nakoso, bɛ bɔ bɔne ali bɛ ti ne de, ka bɛ nyunu wɔ ebiala nyunu, na wabɔ bɛ bɔ baha ne kɔkɔ.

21 Ngyi Nyameɛ, Yesu Kristo ne abɔfo bɔ baye bɛ namukoraati nyunu mehyɛ wɔ kyɛ, di sɔ akwankyerɛ he aso bɔ ɛngɔyɛ nyeyemuɛ, na ɛngɔnea ebiala nyunu ɔ.

22 Nnɛpere wɔ nwo fa wɔ sa gua ebiala so lle, ná ɛne bɛ angyɛ bɛ bɔne ne. Kɔ so bɔ bra bɔ ye nwo te ɔ.

23 Nnɛno nzue kõ;* wɔ ko ne, ɔne fokyɛlɛ bɔ ɛtaa fokyɛ nati, ɛyɛ a no nzãa kaa.

24 Mmenia biemɔ yɛ bɔne a, ye nwo da berɛ ma ebiala nwu ye, na ɔfa bɛ kɔ atemmuo nu, nakoso ebiemɔ deɛ de, ɔkyɛ kora ne banwu ye. 25 Sɔ ala koso yeɛ nyumaa pa da adi maa ebiala nwu ye, na sɛ bannwu ye ndɛ po a, ɔngɔhora nngɔfea daa.