Milagres de Jesus

Kǝnan Yesu komminchi kaɗ chap

27 Kǝ nak Yesu pǝɗat thlaˈtǝ minni, chat kominchǝ chap parakandǝ ndi, nakandǝ ˈya ndi tǝ alkǝta, "Kǝ haɗuchǝˈǝn fa, Waˈi Dauda."

28 Kǝ yim kǝ Yesu kǝ yowun wira, ɓak kominchiɗi kǝmɗiyan, chihangkan tandǝ mee wa, "Fǝrwun kit wa nii mbahan kǝnowundǝ kaɗ wa?" Nggǝmankan nda wa, "Aa, Chinda." 29 Kǝna tǝkan her weniti chikawun fa ndakan wa, "Kǝthlǝm fǝr kit ˈyowun na fee kǝnowundǝ kaɗi." 30 Inkǝ weniti chik yen ha. Kǝn Yesu tǝɗa ndǝ thlǝmech ˈyandǝ kaan ndakan wa, "Kǝ yahwunsi kǝ sǝn yowun ǝnɗi chowun ndi wa." 31 Paɗ chet ˈyandǝ kesh, nakandǝ fanandǝ kusheˈtǝ Yesu ha chǝk tǝ yeni, ǝ thle hahiˈan.

Kǝnan Yesu kominchi kaɗ chap

29 Kǝ nak Yesu tǝ kǝmsichiyan mal mǝrɓi Yeriko ha, parak tertǝ nggomǝn nafchǝ ndi. 30 Chat fowun komminchǝ chap, chokndǝ haa kǝlaar mbanda. Kǝ sǝkkandǝ Yesu mbǝrtǝ ha, thlaˈankandǝ ɓǝrata. Ndakanda wa, "Thlǝmaanda, Waˈi Dauda, kǝ haɗuchǝˈǝnfa" 31 Yanankǝ nggomǝn nafchaˈan tandǝ ha, ndangkandǝ tanda wa, kǝ nggasndǝ ɓaˈ. Paɗ nak kominchaˈan nggǝr thlaˈandǝ ɓǝratǝ kaan ndat wa, "Chinda, Waˈi Dauda, kǝ haɗuchǝˈǝnfa." 32 Thlarkǝ Yesu ha, ˈyakan tanda ndangkan tanda wa, "Mǝ yahtǝwun kǝ chowunchi?" 33 Ndankanda wa, "Thlǝ manda, kǝ mbǝs ǝn naa mǝta." 34 Haɗan kandǝ fa, tǝkankan her wenichiyandǝ fa. Chat kǝɗuyu mbǝs kandǝ naa mǝta paɗ parakandǝ ndi.

Kǝnan Yesu komndǝ kaɗi ǝ Betseda

22 Ɓakandǝ kǝ mǝrɓi Betsaida, chat ɓak fee tǝ komnda, shiyan kanda kǝ tǝkantǝ her fa. 23 Kǝskan heri komǝnɗi chekandǝ kesh kǝ kǝrsǝ wan mǝrɓan, chǝhangkan yahtǝ kǝ wenita, ɗǝfankan herˈyan kǝ in, chǝhangkan mee, "Thlǝ mbahǝncho naa ǝna wa?"

24 Thlaˈan kǝ komǝnɗi indǝ kafǝrta, nda kan wa, "Nggǝt naa nafchǝ kuɗa, paɗ nggǝt naa tandǝ kǝɗ ɗǝfcha, tandǝ wiˈta."

25 Nggǝr kǝ Yesu ɗǝf herˈyan kǝ wenitaˈan ˈyan, inan kǝ nafan wenitaˈyan ha. Kǝnkǝ wenitaˈyan kaɗi, nakan chǝka mǝ ha ndiˈchan. 26 Kalkan nafan ha kǝ pǝɗ kaɗi, ndang kana, "Kǝ ɓehǝn laa parat tǝ hur wan mǝrɓan wa."

Kǝnan Yesu tipeng kaɗi

31 Chek Yesu kesh ǝ thle Taya, parakan tǝ Sidon ɗǝkan kǝ Hawurtǝ Galili ǝ thle Dikafolis. 32 Ə minni ɓang kǝ fee tǝpeng, thla thlǝ mbahǝn wakchǝ ndikta, shiyan kanda, kǝ tǝkantǝ her nafan fa. 33 Kaɓ kǝ Yesu tǝpeng tǝɗi kǝ mǝɗi nawaktǝ nefsi, pakan wan harchiyan kǝ thlǝmechi nafan, chǝhakan yahta, tǝkankan her wanshenuˈti nafan fa. 34 Thlaˈan kǝ Yesu indǝ kafǝrta kǝt kan yiptǝ, ndakana, "Iffata" (ndaˈan nech kǝ) "Inuha."

35 Chat kǝɗuyu inkǝ thlǝmati tipeng tǝ ɗa hayu, ǝnɗi kǝnanchi wanshenuˈtiyan, kwaskan ha, nggak kan shenuˈtǝ ndiˈchan. 36 Kahankǝ Yesu thlǝmat ˈyanda mǝ mbuˈandǝ nefa wa. Nat tǝ ter tǝɗi nda ndǝn tanda wa mǝ mbuˈ nda wa, fen paɗ nakandǝ ɗǝt kǝ pang tǝ mbuˈ ǝnɗi sǝɓcha. 37 Nafchaˈan ndiiɗ kandǝ tǝ saka inda, ndaka nda wa, "Chǝt chǝkami ndiˈchan. Mbahǝn tǝ ɗǝf tǝpeng kǝ ndika. Fee thlǝ sǝk wakchǝ mǝt paɗ, ɗǝf tǝ tandǝ kǝ sǝk nda."

Kǝnan Yesu komndǝ kaɗi thlǝ ˈya fee wa Bartimawus

46 Ɓakandǝ kǝ Yeriko. Nak Yesu tǝ kǝmsichiyan tǝ takǝt nafchi chet kesh mǝrɓan, komndǝs ɗas ǝ kǝlaar mbanda, mǝthlan shita. Thlǝman wa Bartimawus (waˈi Timawus.) 47 Kǝ sǝkkan wa Yesu thlǝ Nazarat nech ɓǝrtǝ ha, chat kǝɗu thlaˈankan ɓǝrata ndakana, "Yesu, Waˈi Dauda, kǝ haɗuchifa."

48 Nak fowun nafchǝ terchan yana ndǝ ha, ndat wa kǝ nggas ɓaˈ. Thlat tǝ kǝɗu nakan chekandǝ thlaˈa ndǝ ɓǝrata tǝ alkǝta, ndat wa, "Waˈi Dauda, kǝ haɗuchifa."

49 Thlarkǝ Yesu ha, ndang kan tanda wa, "ˈYamndi."

Ndang kandǝ komnan wa, "Mbunufata, thlaˈu, mǝthlan ˈyawechi."

50 Chat mǝkan kan ǝna chiptiyan kaɗi, thlaˈkan tǝ weshet fa, ɓakan kǝmɗi Yesu.

51 Chǝhan kǝ Yesu mee, "Mǝ yah tusi kǝ chuchi?"

Ndang kǝ komnan wa, "Thlǝ Chaˈanan kaɗi, kǝ mbǝssi naa mǝta."

52 Ndang kǝ Yesu wa, "Ɗu, fǝr kitˈyo ǝ kǝnuchi kaɗi."

Chat kǝɗuyu mbǝstǝ naa mǝta, parakan Yesu pǝɗa kanda.

Kǝnan Yesu thla kaɗ nggǝttǝ fee kǝ komnda

1 Nak Yesu mbǝrtǝ ha, nakan nafɗi nggǝttǝ fee kǝ komnda. 2 Chihan kǝ kǝmsǝchiyan mee. Ndang kanda wa, "Thlǝ Chaˈanan kaɗi, wun chich ɓǝɓifata, nggǝttǝ fee nafɗiya kǝ komnda kǝɗaya? Mǝthlan wa parchaˈan* wa?"

3 Nggǝman kǝ Yesu ndakan wa, "Ngga kǝthlǝm kǝt nafɗiya ndu parchaˈan chich ɓǝɓifata wa, kǝɗu kǝthlǝm kǝ pǝn fee teri Farta ɗar indiyan." 4 Nwaat kǝ chimǝn teri thla thlǝnchi nenchi peˈ mǝt ɗaˈ. Na Wiitǝ* chita thla nggawaktǝ yowun chit tera. 5 Ma nggǝt hur heshi, nggǝt nech kǝ ɗaˈkǝti heshi*.

6 Kǝ mbuˈkan kǝɗu, chihakan yahtǝ kǝ haha, tǝhɗankan paˈkan kǝ wenita nafan. 7 Ndang kan wa, "Ɗu, chapan wenito kaɗi ǝ kwi ˈyam Siluwam," (Na saktaˈan wa "Thlǝnda"). Kǝɗu pǝɗak nafan kǝ chapandǝ wenitiyan kaɗi nggǝran kan in mǝthlan naa mǝta.

2 Chat yowun nefa tǝ hatǝfa tarkwai fa, ɓakan kǝmɗi Yesu kop kan ha kǝ pangngǝnan. Ndakan wa, "Chinda, maa ǝ nggiminfa, no mbahǝn chitǝ kaɗ chiɗchiɗ."

3 Panan kǝ Yesu herˈyan ha tǝkankan her fa, nakan ndat wa "Nggǝmani, kǝ nen chǝɗchǝɗ." Chat kǝɗuyu, kǝnkǝ hatǝfa tarkwaiˈyan kaɗi. 4 Ndangkǝ Yesu wa, "Suku ndiˈchan, kǝ mbuˈen chikawun ǝnɗi sǝɓcha wa. Paɗ ɗu kǝ pǝneen fatyo pangnda, tǝ paɗ kǝ firin kǝnaupafǝn kǝɗ ǝnɗi mbuˈtǝ kusiˈ i Musa. Kǝ chin kǝɗu kǝthlǝm sǝnnandǝ tandǝs wa, chuchi fee kaɗ chǝɗchǝɗ."

2 Tukuthl, fowun nafchi ɓakandǝ tǝ thla saafatˈyan kaɗi, ɗuk ɗar wenicha. Kǝ nak Yesu fǝrkit ˈyanda, ndang kan thla saa faɗanˈyan kaɗ yu wa, "Waˈinchi, tǝran hwirha, kaluchi ɓǝɓi fechˈyo ha." 3 Sǝktǝ kǝɗu, fowun fǝ chaˈandǝ kusiˈ i Musa kaɗi fee nech minni ndangkandǝ raˈan wa, "Nafɗa mǝthlan ˈyara Farta."

4 Yesu sǝntǝ ǝnɗi natndǝ saktǝ kǝ ɗaran, ndang kan tanda wa, "Kǝthlǝm mǝ, natwun kaɗa ɓǝɓiˈan kǝɗuyu hur wanɗǝkaɗech ˈyowun? 5 Yen nech paˈpa, kǝ ndǝ fee wa, ‘Kaluchǝfee ɓǝɓifechˈyo ha wa,’ ndu ndat wa, ‘Thlaˈu kǝ wiˈin’? 6 Yah chisi kǝ sǝn wun wa nggǝta Waˈi Nefa alkǝtˈyansi kǝ kallantǝ ɓǝɓifech ha hur heshi." Chat ndang kan thla saa faɗanˈyan kaɗ wa, "Thlaˈu, tǝru wenichiyo, kǝ pǝɗen kaɗi." 7 Nafan paɗ thlaˈkan pǝɗakan kaɗi.

10 Yowun nefsi minni thla saa herˈyan kaɗi. Fowun Farisiyawecha chǝhanka ndǝ mee Yesu ndakanda wa, "Kimsi ǝ kusiˈ i Musa kǝ kǝnan fee yowun kaɗ far yipta wa?" Chihechandǝ mi ini kǝthlǝm kǝ kǝsandǝ tǝ ǝnfa.

11 Nggǝmankǝ Yesu tanda wa, "Wun ǝ hurwun naa chohratyansi, hǝm kan kǝ kwiya far yipta. Awi thlǝ chohraɗan nen kǝtan chǝ kesh wa? 12 Nefa pǝɗantǝ chohrat ha kaˈan, kǝthlǝm ndaˈan ndiˈchansi kǝ chǝ fee kaakǝta far yipta."

13 Ndang kǝ Yesu nafan wa, "Panan herˈyo ha." Panan kan ha chat kǝɗu yu kǝn kǝ haran kaɗi, chokkan kǝɗ har thlaa.

30 Thlaɓǝrtǝ Siman kǝ nunefa ɗuk haɗchan tǝ hatǝfa ɓǝɓa, paɗ chat mbuˈan kǝ nafchǝ Yesu hatǝfaɗan ˈyan. 31 Kǝɗu ɗǝk Yesu kǝ mbǝs ndi, kǝskan herˈyan, thlaˈan kan. Hatǝfa ɓǝɓiˈan kal kan anchi ha, thlaˈkǝ nunafan tahsankan tandǝ ɗǝsemndǝsi.

Kǝnan Yesu nef kaɗi thla naa tarkwai fiyan

40 Ɓak yowun nefa, tǝ tarkwai fa kǝmɗiyan kopkan ha, paɗ shiyan kan Yesu ndakan wa, "Maa ǝ yahǝnsi, alkǝt ˈyosi no mbahan kǝnitǝ kaɗi."

41 Kǝ haɗan kǝ nafɗiya Yesu fa, panan kan her ha tǝkan kan her nafan fa. "Nggǝmani, kǝnu kaɗi." 42 Chat kǝɗuyu malkǝ tarkwaiˈyan ndǝ ha, kǝn kan kaɗi.

3 Tandǝ minni, tǝrkǝ nafchi foɗɗa nefa thla saa fatˈyan kaɗi, ɓakandǝ taˈanchi kǝmɗi Yesu. 4 Mbǝs wandǝ mbanda kǝ saˈndǝ kǝmɗi Yesu wa, kǝthlǝm terti nafcha. Terkandǝ kǝ ɗar kǝtǝn ɗi naa Yesu huran tǝ nafan, chuhwankandǝ ɗar kǝtǝnan keˈke tǝmɗi naa Yesu, kǝ nandǝ fǝr nafɗi saa fatˈyan kaɗ yu kaha tǝ mǝt hunatˈyan kǝ pangngǝn Yesu. 5 Kǝ nak Yesu fǝr kit ˈyanda, ndang kan nafɗa safatˈyan kaɗ wa, "Waˈinchi, kaluchǝ fee ɓǝɓifechˈyo ha."

6 Fartiˈini fowun fǝ chaˈandǝ kusiˈ chǝsi ɗas ɗas, nakandǝ kaɗandǝ ha hur wanɗǝkaɗechˈyanda. 7 "Mǝ chicha naa nafɗa mbuˈtǝ kǝɗuyu? Tǝr tǝ indiyan kǝɗ Farta. Wun naa alkǝt kal ɓǝɓifechˈyan sǝ ha kǝɗu maangga Farta ndak wa?"

8 Chat kǝɗuyu Yesu shin ǝ hur Shemetˈyan ǝnɗi nat ndǝ sakta hur wandǝkaɗech ˈyanda, chat ndang kan tanda wa, "Mǝ chicha natwun kaɗa ichiɗiya hur wanɗǝkaɗechˈyowun? 9 Yen nech paˈpa, kǝ ndang fee thla saa fatˈyan kaɗ wa, ‘Kaluchife ɓǝɓifechˈyo ha wa’, ndu ndat wa ‘Thlaˈu, tǝru wenichiyo, wiˈu wa’? 10 Kǝthlǝm yahchisi kǝ sǝnwun wa nggǝta, Waˈi Nefa, alkǝtˈyansi hur heshiɗiya kǝ kaltǝ ɓǝɓifech ha." Ndangkan thla saa fatˈyan kaɗyu wa, 11 "Nduchi wa, thlaˈu, tǝru wenichiyo kǝ pǝɗen kaɗi."

12 Thlaˈkǝ nafɗi saa fatˈyan kaɗ chat kǝɗuyu tǝrkan wenichiyan, chekan kesh pangngǝn nanda nakandǝ ɗǝpaanda. Nat nda sakandak inda, manan kandǝ Farta, nakandǝ ndat wa, "Tamwaˈan naa weˈtǝ ǝnɗa wa."

Kǝnan Yesu nef thla saa herˈyan kaɗ ǝ Kafarnahum

1 Fartǝ yowun paɗ, Yesu pǝɗakan kǝ wur nggomndi Yahudawecha. Paɗ ǝ minni nefsi thla saa herˈyan kaɗi. 2 Fowun nafchaˈan hur nanda kaa mbanɗi natndǝ mbǝsaandǝ Yesu tǝ ǝnfa, kǝthlǝm ndaˈan nakandǝ fiingan wenita, kǝ nanda maa nan kǝnandǝ nafan kaɗi fartǝ yiptaˈan. 3 Ndangkǝ Yesu thla sa herˈyan kaɗ yu wa, "Thlaˈu, ɓo kesh kǝ thlerin ha pangngǝn chǝka wuni."

4 Kǝn Yesu chǝha ndata, "Mǝ kǝmchisi kǝ chǝ fee fartǝ yipta? Kǝ chǝ fee kaafata a wa, ndu ɓǝɓifata wa? Kǝ hǝraˈan fee shishingnda wa, ndu kǝ ɓǝl fee fata wa?" Paɗ nggas kandǝ kǝmma.

5 Tǝɓǝr kan ha tǝ sǝɓtǝ hwira, nakan haɗ ndǝ hur, kǝthlǝm kwaˈkwa tǝ wandǝkaɗǝchˈyanda. Ndangkan nafan wa, "Panan herˈyo ha." Panan kan ha, chat kǝnkǝ haran kaɗi.

Kǝnan Yesu nef kaɗ mii kwiˈema fartǝ yipta

1 Kǝrsǝ ndaˈan, ɗǝk Yesu kafǝr kǝ Urshelima kǝthlǝm yowun mbǝnfati Yahudawecha. 2 Ə Urshelima nduk tǝ mii mbang chohrecha, yowun kwiˈemsi thla thlǝ nda fee wa Betesda tǝ mee i Yahudawecha. Tauran fee ha tǝ kuwurchǝ ɗǝrman. 3 Ə michi ini terchan nafcha fee nech haɗchan, komincha, tǝraɗcha, tǝ fee saafechˈyandǝ kaɗi, hunech ha nduk tǝ mii kwiˈyaman. [Tǝ nandǝ pǝkta kǝ yiraˈan fee ˈyaman. 4 Kǝthlǝm kǝ far kǝ fara thlǝ ɓa yowun thlǝ thlǝndǝ Farta thlǝ tǝrchǝ kaha kǝ hur ˈyaman kǝ yiraˈanchi. Nat thla lech yimndǝ kǝ hurˈyaman ma yiraˈan fee, chat nan kǝndǝ kaɗi ǝ chǝk yen hatǝfaɗi nech fiyan.] 5 Artǝ hur nafchǝɗi nech ɗuk minni haɗchan, hurechan kum chǝt mahkan nggǝrsǝ foɗfoɗɗa (38) haɗchan. 6 Kǝ nak Yesu anchi ɗuk minni, kaɗakan har paɗ wa hwiri terchan minni, chǝhan kan mee wa, "Yehin kǝ kǝnuchǝ fee kaɗ wa?"

7 Thla nech haɗchantaˈan nggǝman kan ndakan wa, "Thlǝ Maanda, nefinchis wa thla nech kǝsitǝs kǝ yimi kǝ hur ˈyaman ma yiraˈan fee wa. Ma kweˈinchi ha wa tǝni yimndǝsi fartǝɗi yiraˈandǝ fee ˈyaman, lak yowun yimndǝsi mǝ nggǝta."

8 Ndang kǝ Yesu wa, "Thlaˈu, tǝru wenichiyo, wiˈu." 9 Chat kǝɗuyu, kǝnkǝ nafan kaɗi, ɗeukrangkan wenichiyan nggakkan wiˈta.

Chich ichiˈini far yipti Yahudawecha.

Kǝnan Yesu waˈi kapa nef kaɗi thlǝ chanchǝ ter kwitira

46 Nggǝr kǝ Yesu ɗǝt kǝ wan mǝrɓi Kaana ǝ hahi Galili, mǝɗi nggǝrandǝn ˈyem kaɗ kǝ ˈyam yangga. Ə Kafarnahum kapa nefsi thla naa waˈyan haˈchan. 47 Kǝ sǝkkǝ nafan wa ǝ nggǝran Yesu in kaɗ kǝ Galili thlaˈtǝ Yahudiya. Ɗǝkan kǝmɗiyan shiyan kan kǝ ɗa kǝ kǝnandǝ waˈyan kaɗi, thla nech meˈi mǝrta. 48 Ndang kǝ Yesu kapa nafan wa, "Nowun tam fǝr kit wa, maangga tǝ nowun ǝna sakaˈincha tǝ ǝna pǝparech ha wa."

49 Kapa nafan nggǝr kan sǝ wa, "Thlǝ Maanda, komkom ɓo mǝrwak wanan inchǝ kwaɗǝn ya."

50 Ndang kǝ Yesu wa, "Nggǝranˈin kaɗi waˈyo nan nat ha, nen mǝr wa." Nafan paɗ fǝrkan kit kǝ ǝnɗi mbuˈtǝ Yesu, nggǝran kan in kaɗi. 51 Kǝ nakan nggǝrandǝ in kah kyeuriyan, fee thlǝ chich ter hur wirˈyan ɓakandǝ kǝ mbǝsndi ndangka ndawa, "Kǝn waˈyo kaɗi."

52 Chihan kan tanda, wanshengngǝn ɗi nggak tǝ wanan mbǝs sǝmmǝkǝta. Nggǝran kandǝs wa, "Ɓǝraa tǝ wanshengnan arta hur Farta kathlǝ hatǝfa ɓǝɓiˈan anchi ha." 53 Chat kaɗak chin wannan har keˈkeˈ tǝ wanshengngǝnɗi nda ndǝ Yesu wa, "Na waˈyo nat ha." Fǝrkǝ nafan nat tǝ nafchiɗi nech hur wirˈyan kit kǝ Yesu.

54 Ndaˈan nech kǝ chapa tǝ ǝna saka inda thla chit Yesu kǝrsǝ mal hahi Yahudiya ha kǝ hahi Galili.

20 Chat yowun nunefa thla hurech kum nggǝrsǝ chap mǝthlan ɓahtǝ ha tǝ hatǝfa thlǝr fera. Ɓakan tǝ kǝrsǝ Yesu, tǝkan kan her mii kapatˈyan fa. 21 Kǝthlǝm mbuˈchan hur wanɗǝkaɗatˈyan wa, "Maa ǝ tǝkani her chika kapatˈyan fǝ ndak, ni kǝndǝ kaɗi."

22 Tǝɓǝr kǝ Yesu ha nakan ndi, chat ndakan wa, "Waˈinchi, tǝran hwirha. Fǝr kit ˈyo kǝnuchǝ kaɗi." Chat kǝnkan kaɗi.

25 Hur nanda yowun nunefsi nech saa ɓahta tǝ hatǝfa thlǝr fera, yi hurech kum nggǝrsǝ chap. 26 Sii tǝ ɓahtǝ kaan mǝɗi fǝ fǝr wanɓǝɓicha. Sǝɓɓantǝ ichiyan kaɗ nat, chǝk kǝɗu mbǝswa kǝndǝ kaɗ wa. Nak hatǝfaɗan chekta. 27 Kǝ sǝkkan kusheˈtǝ Yesu, chat parakan tǝ hur nafcha ɓakan tǝ kǝrsaˈan, tǝkankan her kapatˈyan fa. 28 Kǝthlǝm kaɗechan wa, "Maa ǝ tǝkani her kapatˈyan fǝ ndak, ni mbǝs kǝndǝ kaɗi." 29 Chat kǝɗuyu thlarkǝ thlǝr farɗa hayu, paɗ sǝkkan fi fatˈyan, ǝ kin kaɗ hur ɓahtiyan ha.

Kǝnan Yesu nunef kaɗi thla na hatǝfa thlǝr fer fiyan, paɗ thlaˈankan mǝrtǝ wannuwaa

18 Kǝ nak Yesu ɗar mbuˈandat kǝɗu, chat yowun pangndi wur nggomndi Yahudawecha ɓakan koptǝ pangngǝnan. Ndangkan wa, "Waˈinchi kǝ nuwaa mir chatchat ya. Ɓo kǝ ɗifeen her kafa, nan thlaˈta." 19 Thlaˈkǝ Yesu parakan nafan. Kǝmsichiyan paɗ parakandǝ ndi.

23 Kǝ ɓak Yesu kyeuri pangndi wur nggomndi Yahudawechaˈan, nakan fǝ pe shilacha tǝ nggomndi nafcha tǝt hwanya ǝ wur mǝrtaˈan. 24 Ndangkan tanda wa, "Chem kesh mǝɗya. Wannuwanan ngga tǝ mǝrwa, tǝn saˈyen ndak." Masan kanda yi njir fata. 25 Kǝrsǝ chendǝ tertǝ nggomnan kesh, yimkǝ Yesu kǝ hur kǝnndi wannuwanan kǝskan herˈyan har, thlaˈkan tǝ shishingndǝfa.

22 Artǝ hur paktechi kǝtǝn shita naa thlǝman wa Yayirus, ɓakan kǝmǝɗan. Kǝ nakan Yesu, ɓakan kǝmɗiyan, chamkan kuruminchi ha pangngǝnan, 23 shiyankan kaan, ndangkan wa, "Waˈinchi kǝ nuwaa nech me i mǝrta. Komkom ɓo ɗǝfan her kǝ inda, kǝthlǝm kǝ kǝn kaɗi, kǝ chok tǝ shishing ndǝfa." 24 Tǝ kǝɗu, pǝɗak Yesu tǝ ndi.

Tertǝ nafcha kaan parech ndi, nakandǝ njekǝthl ndi.

38 Kǝ saˈ kan ndǝ kauran i Yayirus, nak Yesu nafchiɗi nech wuran, tandǝ tǝta, tandǝ hwata tǝ kappa ɓǝratǝ kaan. 39 Yim kansi, ndangkan tanda wa, "Mǝ thlaˈanchǝ hurˈinchowun, natwun hwat kǝɗaya? Wannu wannan ngga tǝ mǝrwa, tǝn saˈ en ndak." 40 Chat nakan ndǝ massa njir fata.

Rǝkkan tandǝ kesh nat nda, mǝthlan tǝ chin wanan, tǝ manan, tǝ kǝmsichiɗi ɓat nda, yimkandǝ kǝmɗi naa wan nuwanan. 41 Kǝskǝ Yesu herˈyan har, ndang kan wa, "Talita kumi." (ndat wa, "Wannuwaa, ngǝt nduta wa, thlaˈu.")

42 Chat kǝɗuyu thlaˈkǝ wannu wanan wiˈkan ha (Huratˈyan kum nggǝrsǝ chap). Kǝthlǝm ndaˈan, nat nda sakandak indǝ kaan.

Mǝrti Liˈazaru

1 Yowun nefsi naa thlǝman wa Liˈazarus thla haɗcha ǝ Betani, wan mirɓi ndǝ Maryamu tǝ wanmanan Marta. 2 Maryamu tǝɗiya paɗ, mǝthlan paˈanchi Yesu fiɗeɗi nech mbinchan paˈankan kaɗ paɗ tǝ waas indiyan. Liˈazarus tǝɗi nech haɗchan, mǝthlan nech kǝ wanmanan.✝ 3 Kǝthlǝm ndaˈan, wanmanchaˈan kǝ nǝssa thlǝnan kandǝ Yesu, tǝ ndat wa, "Chinmǝn, thla thlǝ yahtu haɗchan nakanya."

4 Kǝ sǝkkǝ Yesu ndakan wa, "Hatǝfaɗa nggech saˈ kǝ mǝrta wa. Chichan kǝɗu, kǝthlǝm kǝ maanan fee Farta, tǝ minni paɗ kǝ maanan fee Waˈi Farta." 5 Kǝthlǝm yah Yesu Marta tǝ wanmanan, Liˈazarus. 6 Tǝ kǝɗu kǝ sǝkkan kusheˈtaˈan wa Liˈazarus haɗchan, nggǝrkan chekandǝ mǝndǝ chap kwandǝn ǝ mǝɗi natǝn.

7 Kǝrsǝ ndaˈan, ndang kan kǝmsichiyan wa, "Nggǝraman in kǝ Yahudiya."

8 Kǝmsichiyan ndanka ndawa, "Thlǝ Chaˈanan kaɗi, wan minchiɗiya yahtǝ Yahudawecha kǝ mǝmakuchi ndǝ fa. Yah kosiya kǝ nggǝreen in kǝ minni paɗ wa?"

9 Nggǝmankǝ Yesu tanda wa, "Ngga wanshengnan kum nggǝrsǝ chap ǝ parta wa? Nat thla wiˈchǝ hur Farta nggech che wan sarta wa, kǝthlǝm ɗaˈkǝti heshi kǝ wenantǝ mǝt kaɗi. 10 Kǝɗu nat thla nech wiˈtǝ wiita, thlǝ chechan wan sarta kǝthlǝm ǝnsǝ nech fǝran ɗaˈkǝta wa."

11 Kǝrsǝ shenuˈchǝɗi mbuˈtǝn ya, ndang kan tanda wa, "Shiketǝmǝn Liˈazarus ǝ saˈtǝ ˈyena, nggǝt paɗ chi thlaˈanda hur ˈyen ˈyan."

12 Ndang kǝ kǝmsichiyan wa, "Chinmǝn, ma ˈyen saˈtǝn, nan thlaˈta." 13 Yesu thlǝ nechan mbuˈanda ndikta kǝ ɗar mǝrti Liˈazaru, kǝɗu nak kǝmsichaˈan kaɗat wa tǝn mbuˈanda ndik saˈ ˈyena ndak.

14 Kǝn Yesu mbuˈandat ɗarat wa, "Ə mǝr Liˈazarus.

Thlaran Yesu rǝnni er ha

23 Kǝ yimkǝ Yesu kǝ hur kwombawal, parak kǝmsichiyan ndi. 24 Sǝn wandǝs wa, thlaˈkǝ rǝnna ǝ kufiˈan kaan, nak ˈyaman thlaˈta nakan yimndǝ kǝ hur kwombawal taˈan. Paɗ Yesu mǝthlan saˈ ena. 25 Ɗǝk Kǝmsichaˈan nahnanda ndang kanda wa, "Chinda, hǝrraˈamǝndǝn, namǝn tǝktǝ ha."

26 Nggǝman kan tanda wa, "Kǝthlǝm mǝ nat wun lekǝt kǝɗu, kun fǝ fǝr kit ngguɗyeh?" Kǝnan thlaˈta yanan kan rǝnniˈan tǝ pǝrti ˈyam kufiˈan ha, chat nggaskǝ mǝɗan kǝmma.

27 Nafcha sakandak inda ndakanda wa, "Weˈtǝ nafmǝ thleya, thla chika rǝnna ta pǝrti ˈyam kufa fǝrandǝ maanda?"

15 Kǝ chǝk farwita, ɓak Kǝmsichi Yesu kǝmɗiyan ndangkanda wa, "Nefsi thlǝ chokchi mǝɗya wa, paɗ nakanya chi farwita. Kallu nggomǝn nafchǝɗa ha kǝthlǝm kǝ ɗǝndǝ kǝ wan mǝrǝɓcha kǝ ɗǝndǝ hi ǝnɗi natndǝ sǝmnda."

16 Nggǝran kǝ Yesu tandǝs wa, "Ngga nwaat kǝ pǝɗa nda wa, fǝraman tanda ǝna kǝ sǝmnda."

17 Nggǝrang kandǝs tǝ ndat wa, "Ənsi harˈyan mǝɗa wa, ɓilshet ɗǝrman tǝ yirfǝ chap nessiyaˈan ndak." 18 Ndang kan tanda wa, "Ɓamitǝn tandǝ kǝmɗiya." 19 Ɗǝfkan nggomǝn nafchaˈan kǝ chokndǝ ha kǝ ɗar ndau hwalita. Tǝrkǝ Yesu ɓilsheɗi ɗǝrman tǝ yirifɗi chap yu, thlaˈan kan indǝ kǝ hulafǝrta, chǝkan usuko kǝmɗi Farta. Chakan kan ɓilsheɗan ha, fǝrakan kǝmsichiyan, kǝmsichaˈan paɗ fǝrankandǝ nafcha. 20 Natnda sǝm kanda nggal kanda. Nggomman kǝ kǝmsichiyan takǝt fishirchaˈan, inaftǝ kum nggǝrsǝ chap. 21 Nafchǝɗi sǝmchǝ ɗǝsǝmnan saa ndǝ aru ɗǝrman kǝ hǝssa, shengngawu fee nǝssa, tǝ wan wancha hurang wa.

25 Kǝ wanshengnan mahkan yi walwurta, nak Yesu wiˈta ɗar ˈyaman kǝ ɗi kǝmɗi kǝmsichiyan.

Sǝman Yesu ǝn nafchǝ aru foɗɗa

32 ˈYak Yesu kǝmsichiyan kǝ ɓandǝ nduk kǝ thlǝmaɗan. Ndangkan tanda wa, "Nggomǝn nafchǝɗa haɗi tǝfa. Kǝthlǝm ɓukwiya mǝnyandǝ mahkan thlǝman naa, paɗ ɗǝsǝmndes kǝ sǝm nda wa. Ə yahwisi kǝ kali tandǝ ha ǝ mita wa. Kǝthlǝm yahwisi kǝ kǝt fowun hur nandǝ ǝ mbanda wa."

33 Ndak kǝmsichaˈan ˈyan wa, "Nechamǝn mbǝs ɓilshet ǝ ayi thla natmǝn sǝman ǝn tertǝ nggomǝnɗiya, ǝ chanje kǝ ɗa ya?"

34 Chihankǝ Yesu mee tanda wa ɓilshet kurmi nessiyowun. Nggǝrkandǝs wa, "Ɓilshet muɗ nessi tǝ wan yirǝfchǝ ngguɗyeh."

35 Ndangkǝ Yesu nafcha wa, kǝ chokndǝ ha kǝ haha. 36 Kǝ tǝrkǝ Yesu ɓilsheɗi muɗyu tǝ yirfan, chǝkan usoko kǝmɗi Farta, chǝchen kan ha, fǝrankan kǝmsichiyan. Kǝmsichaˈan nakandǝ fǝrandǝ nggommǝn nafchaˈan.

37 Nat nda sǝmkanda nggal kanda. Nggomankǝ kǝmsichiyan fishirchaˈan paktǝ inafchǝ muɗ. 38 Fee sǝmcha hǝssǝ aruˈ foɗɗa, shengngawu fee tǝ nǝssǝ, tǝ wancha wa.

Ndik Yesu kǝ ɗar ti chamǝn kǝtǝn shita.

24 Kǝrsǝ ɓati Yesu tǝ kǝmsichiyan kǝ Kaparnahum, ɓak fǝ thlǝt chaminchi chap kǝthlǝm Wiri Farta mbǝs Biturus. Chǝhan kanda wa, "Thlǝ tichǝ thlǝ chaˈananˈyowun chamndǝ kǝthlǝm Wiri Farta kuɗa wa?"

25 Nggǝmang kǝ Biturus wa, "Aa, thlǝ tichan."

Kǝ yimkǝ Biturus kǝ hur wuran, Yesu nggakchǝ ndiktǝ tǝ ndi. Chihan kan wa, "Mǝ nech kǝ kaɗatˈyo Biturus? Mǝɗi micha thlǝ thlǝt kutǝrchǝ wanɗǝɓithl icha ndu chamnda? Mǝɗi wanchiyanda wa, ndu mǝɗi fowun wa?"

26 Nggǝman kǝ Biturus wa, "Mǝɗi ramcha."

Ndangkǝ Yesu wa, "Wanchǝ hahiˈan tiwanda wa hacha. 27 Paɗ kǝthlǝm kǝ sǝɓandǝ hwirkaɗ tǝ nggǝmnan wa. Ɗu kǝ kufa kǝ mikin nggalkǝm ˈyo. Kǝ tirin yirif ɗi latu kǝsta, kǝ i neen meˈyan ha. No naa wanɗǝɓǝthl tipesha thla saˈchǝ ndǝnari foɗɗa hwirˈyan. Tǝrko fǝranko tanda, chamndinchi tǝ yuwa."

Ɗǝf Yesu si kǝ mǝr ɗǝftǝ shukwat kaɗi.

18 Pung walwurta nakan nggǝrandǝ in kǝ mǝrɓan, kǝsankǝ mita. 19 Kǝnakan yowun ɗǝftǝ shukwata nduk kǝlaar mbanda, ɗikan kimni, paɗ mbǝs wa wanchaˈan wa, kǝ saˈchǝ ndak. Ndangkan shukwaɗan wa, "Mǝ nggirin nggǝt tawa kǝ kweekǝɗan. Chat hwarkǝ shukwaɗan kaɗi." 20 Nak kǝmsichaˈan kǝɗuyu, sakankǝ indǝ tanda ndakanda wa, "Chich in kǝn hwartǝ shukwaɗi kaɗ chat kǝda ya?" 21 Nggǝmankǝ Yesu ndangkan tanda wa, "Kittaˈan nati mbuˈowunda, ma fǝr kit yowunsi as wowun inda wa. Ngga ǝnɗi chandǝ fee shukwaɗa ndak natwun chǝta wa. Paɗ nowun mbahǝn ndandǝ ɗekwen wa thlaˈu mǝɗya kǝ hǝmin kǝ hawurta, nan chǝt kǝɗu. 22 Ma fǝrwun kit chǝka mǝ shiyanduwun Farta hur shita, nowun mbǝsta."

37 Thlaˈkǝ kapa rǝnnaa, nakan thlaˈandǝ ˈyam kufiˈan nakan thlǝftǝ kafi kwombawal ˈyanda. Nak ˈyamɗi yimndǝ kǝ huran, nak kwombawal taˈan yimndǝ ha kǝ hur ˈyaman. 38 Nak Yesu saˈen tǝ kǝrsǝ kwombawal taˈan ɗǝftǝ indiyan kǝ ɗar mǝt ɗǝf inda. Ɓak Kǝmsichiyan nah nanda, ndang kanda wa, "Thlǝ chaˈanan kaɗi, kǝmuwu ǝnawa, nggǝmǝn meˈi mǝrta?"

39 Kǝ nahǝnkǝ Yesu, yanan kan rǝnniˈyan ha. Ndang kan hawurtaˈan wa, "No kǝmma, nggasu ɓaˈ." Chat rǝnni ini thlarkan ha nak mǝɗan kǝmma.

40 Ndang kan kǝmsichiyan wa, "Kǝthlǝm mǝ natwun lekǝt kǝɗuyu? Paˈ kǝ nakanya fǝrwowun kit wa?"

41 Lekǝkandǝ kaan, ndang kandǝ raˈan wa, "Weˈtǝ naf mǝ kǝɗaya? Rǝnna, tǝ ˈyam hawurta, tandǝ fǝran maanda?"

35 Nduk tǝ hǝmɗi Farta, ɓak kǝmsichiyan kǝmɗiyan, ndangkanda wa, "Mǝɗiya wurchis wa. Paɗaa fartǝ hǝm nda. 36 Nda ndǝn nafchǝɗiya wa, kǝ ɗǝ ndǝ kǝ mǝrǝɓcha tǝ wan mǝrǝɓ chiɗi mǝɗiya. Kǝ hiyandǝ indi yandǝ ɗǝsǝmndǝsi."

37 Nggǝran kǝ Yesu tandǝs wa, "Kun fǝraman tandǝ ɗǝsǝmnda, kǝ sǝmnda." Nggǝrankǝ kǝmsichaˈan ˈyansu wa, "Yahcho sǝ kǝ ɗǝ ǝn hi ɗǝsǝmǝnɗa yi ndǝnari kum chǝt kum chap kǝ fǝran ǝn tandǝ kǝ sǝmnda wa?"

38 Tǝ kǝɗu chǝhan kǝ Yesu tanda wa, "Ɓilshet kurmi nessiyowun? Ɗam ɗǝpamandǝn." Ɗǝpang kanda, ndang kan nda wa, "Ɓilshet ɗǝrman tǝ yirfǝ chap."

39 Ndang kǝ Yesu kǝmsichiyan wa, kǝ chokandǝ nafchǝ ha tukut tukut, kǝ ɗar hwalita. 40 Chokkǝ nafchaˈan ha michi samǝn samǝn, fowun nechan ndǝ kum chǝt kum arta, fowun kum chǝt ɗǝrman . 41 Tǝrkǝ Yesu ɓilsheɗi ɗǝrman tǝ yirefɗi chap yu, thlaˈankan indiyan kafǝrta, changkan Farta usoko. Chichenkan ɓilsheɗan ha, fǝrangkan kǝmsichiyan, kǝ chakkaandǝ nafcha. Yirǝfɗi chap yu paɗ, chakankan ha kǝthlǝm nafchaˈan nat. 42 Nat nda sǝm kanda, paɗ nggalkanda. 43 Kǝmsichiyan paɗ ngomman kandǝ takǝt chiche ɓilsheɗi, tǝ yirǝf ɗi. Ndiɗantǝ inafta kum nggǝrsǝ chap. 44 Tertǝ nafchiɗi sǝmchi ɗǝsǝmǝn ini, hǝssǝ aruˈ ɗǝrman.

48 Nakan tandǝ ɓahtǝ ha tǝ kombawal tǝɗi, kǝthlǝm yah ndǝssi kǝ hurandǝ kombawal taˈan kǝ pangnga, paɗ nak rǝnniˈan nggǝra ndat kǝrsin. Katamǝta, ɓakan nduk tǝ tanda, mǝthlan wiˈtǝ ɗar ˈyaman. Yehsi kǝ pǝɗandech ha. 49 Kǝ nakandǝ anchi mǝthlan wiˈtǝ ɗar hawurtaˈan, tǝr kanda wa shemeti mǝrta. Hwakanda tǝ alkǝta. 50 Kǝthlǝm nii ndǝ anchi nat nda, paɗ lekǝ kanda.

Chat kǝɗuyu ndikkǝ Yesu tǝ tanda, ndakan wa, "Kǝ thlaˈ hur indiyowun wa, nggǝta kǝ lekǝwun wa." 51 Yimkan kǝ hur kombawal tǝɗi nat ndǝ huran, chat hunak rǝnni ˈyan ha. Sakan kǝ indǝ tandǝ kaan,

Sǝman Yesu ǝn nafchǝ aruˈ foɗɗa

1 Ə hur wan minchiˈini, nggǝr kǝ nafchǝ nggom ndǝ terchan. Nakan ǝnsi nat ndǝ sǝm nda wa, ˈyak Yesu kǝmsichiyan, ndang kan tanda wa, 2 "Nggomǝnɗiya tandǝ haɗitǝ fa, kǝthlǝm mǝndǝ mahkan tandǝ tǝ nggǝta, paɗ ǝnsi natndǝ sǝmnda wa. 3 Maa ǝ kallinchǝ tandǝ ha kǝ ɗǝ ndǝ kaɗi tǝ mita, fowuna naa fat wulandǝ tandǝ ɗar mbanda, kǝthlǝm fowun ɓechandǝ mǝt langnga."

4 Nggǝmang kǝ kǝmsichiyan wa, "Nech fee mbǝs ɗǝsǝmǝnɗi nech nggallandǝ tertǝ nafchǝɗa hur chanjang ɗiya ayi?"

5 Chǝhan kan mee tanda wa, "Ɓilshet kurmi nessiyowun?" Nggǝrang kandǝs wa, "Muɗ."

6 Ndang kan tertǝ nafchaˈan wa kǝ chok ndǝ ha kǝ haha. Tǝr kan ɓilsheɗi muɗ yu, chankan usoko Farta, chichenkan ha, chakan kan kǝmsichiyan kǝthlǝm kǝ fǝrandǝ nafchaˈan, fen paɗ chǝkandǝ kǝɗu. 7 Wan yirǝf chiyandǝs ngguɗyeh. Chankan usoko Farta, ndang kan kǝmsichaˈan wa kǝ chakandǝ nafchaˈan paɗ. 8 Sǝm kǝ nafchaˈan, nggal kanda, ngomankandǝ takǝt fishirchaˈan, ndiiɗan tǝ inaftǝ muɗ. 9 Tertǝ nafchǝɗi sǝmchǝ ɗǝsǝmǝnɗi hǝssa aruˈ foɗɗa. Kalkan tandǝ ha.

Ndan Yesu ɗeftǝ shukwata wa no nata

12 Əssaɗan kǝ nakan ndǝ mal Betani ha, nak mitǝ fi Yesu. 13 Nakan ɗǝftǝ shukwata langnga tǝ saˈchǝ ndiˈchan, ɗǝkan ɗǝpanda ndu nan mbǝs wan ɗǝftaˈan ɗaran. Kǝ saˈkan, mbǝs wa wanan wa saˈchi ndak, kǝthlǝm ngga fartǝ nggǝttǝyan wa. 14 Ndang kan ɗǝftaˈan wa, "Mǝ nggǝr yowun kan wan chiyo paɗ wa." Paɗ sǝkkǝ kǝmsichiyan ǝnɗi mbuˈtǝn.

Ɗǝftǝ shukwaɗi hwarchǝ kaɗi

20 Walwurtaˈan nakandǝ mbǝrtǝ ha, nakandǝ ɗǝftǝ shukwaɗan hwerkaɗ thlaˈtǝ thlarchiyan kǝ wan harchiyan. 21 Kuɗuk kǝ Biturus ǝnɗi nda ndǝ Yesu, dǝftǝ shukwaɗan, ndang kan wa, "Thlǝ chaˈanan kaɗi, ɗǝpa ndǝn ɗǝftǝ shukwaɗi ndaa ndu wa no natyu, hwerkaɗi."

22 Nggǝmang kǝ Yesu wa, "Fǝram kit kǝ Farta," 23 Kittaˈan nati mbuowunda, maa naa yowun mbahǝn nda ndǝ nggwalɗiya wa, ‘Ɗu, mǝku fatˈyo kǝ hur hawurta,’ paɗ aswa indǝ hur wanɗǝkaɗatˈyan wa, fǝr kan kitsi tǝ ndat wa ǝnɗi mbuˈtǝn nan chok tǝ kǝɗu, nechan nat kǝɗu paɗ. 24 Kǝthlǝm ndaˈan nggǝt mbuˈowunda, nat ǝnɗi shitǝwun hur shenuˈtǝ tǝ Farta, kǝ fǝrwun kitsi wa mbǝswun, nechan nat kǝ yuwun paɗ. 25 Maa thlar wun ha nowun shenuˈtǝ tǝ Farta, maa yowunsi hur wanɗǝkaɗatˈyowun, kalam ndǝ ha. Maˈna Chinwun hulafǝrta, kalowun ɓǝɓifech ˈyowun ha.

Kǝn reta ǝ mirɓi Kaana

1 Far mahkanan chǝk fee mbǝnfa kǝn reta ǝ Kaana hur hahi Galili. Man Yesu paɗ mǝthlan minni. 2 Shiyan kǝ fee Yesu, tǝ kǝmsichiyan, kǝ ɗǝndǝ kǝ mǝt kǝn reɗan. 3 Kǝ tǝɓak ˈyam yanggiɗi nech minni, ɓak man Yesu kǝmɗiyan ndangkan wa, "Tǝɓi ˈyam yanggiyanda."

4 Nggǝman kǝ Yesu manan wa, "Yaa, michicha natu ɗǝf nenchi kǝ hur ndiktǝɗiya?" Saˈwu wanshengnan inchi kwaɗǝn wa, malitǝn. 5 Ndangkǝ man Yesu mafeechiɗi minni wa, "Nat ǝnɗi ndowundǝn wa kǝ chǝwun, chama." 6 Ə minni ɓutǝ sa ˈyamchǝsi michcha tahǝs tǝ fee tǝ ɗakwancha shet, ǝna tar raˈati Yahudawecha yi chap icha. Chika yen ɓutǝ sa ˈyem arta thlǝ thlichan kǝɗ ɓutǝ ˈyema kumchit chap ndu kumchit mahkan yi ˈyema. 7 Ndangkǝ Yesu mafechaˈan wa, "Ndiɗaman ɓutǝ sa ˈyamchaˈan tǝ ema." Fen paɗ ndiɗan kandǝ kǝ miyan. 8 Ndangkan tanda wa, "Nakanya, cham har, kǝ ɗawun kapa thlǝ mbǝnfaɗan." Chǝkan ndǝ ˈyam ɗa har yu, ɗan kandǝ kapa thlǝ mbǝnfaɗan. 9 Kǝ hoɓan kǝ kapa thlǝ mbǝnfaɗan ˈyamɗi, nggǝrchǝ ha kǝ ˈyam yangga yu ngguɗyeh. Mǝthlan paɗ sǝnwa mǝɗi ɓa fee taˈanchǝ wa (Mafeechiɗi kwanchǝ ˈyaman ndak sǝncha.) Chat kapa thlǝ mbǝnfaɗan ˈyakan chima periˈan cheɗek. 10 Ndangkan wa, "Chika wuni thlǝ ɓechan tǝ ˈyam yanggiɗi nech mbinchan kwaɗǝn. Fartǝɗi nggathlǝ nafchǝ kaˈan, kǝnan ɓat tǝ thla nawakchǝ mbinchan kǝrsa. Tǝ kǝɗu cha wuɓan ko thla nech mbinchan kǝ nakanya." 11 Thleya nech kǝ tǝrkwathl kan sakaˈincha hur fee chǝt Yesu, ǝ Kaana i hahi Galili. Minni pǝndǝ Yesu maandiyan, kǝmsichiyan paɗ fǝrkandǝ kit kǝ anchi.

6 Mbuˈchan kǝɗuyu kǝthlǝm kǝ kaɗanchi, kǝthlǝm mǝthlan tǝ indiyan sǝntǝ ǝnɗi natǝn chita.

7 Nggǝman kǝ Filibus ndakan wa, "Chika mǝ kulkuli yi tipesh kumchit kum chap (200) nggech chaˈan tǝ chika wuni kǝ mbǝs ngguɗyeh wa."

8 Artǝ hur kǝmsichiyan Andrawus wanman Siman Biturus ndang kan wa, 9 "Ə yowun wanwaa mǝɗi ya tǝ kulkuli ɗǝrman yi pǝkata, tǝ yirfǝ chap. Kǝɗu mǝna thleya chaˈandǝ tertǝ nggomǝnɗiya kǝɗ thleya?"

10 Ndak Yesu wa, "Ndamandǝn nafcha wa kǝ chok ndǝ ha." Mǝɗan hwalichǝs kaan. Kǝthlǝm ndaˈan hǝssa chokkandǝ ha. nechandǝ kǝɗ aruˈ ɗǝrman(5000). 11 Tǝrkǝ Yesu kulkulitaˈan, kǝrsǝ chan usoko Farta, chakankan fee chokchi ha. Kǝɗu paɗ chitǝn tǝ yirfan. 12 Kǝ sǝm kanda nggalkanda, ndang kan kǝmsichiyan wa, "Nggomaman fishirchaˈan tǝɗi hǝhatech kah yu kǝ thlǝm kǝ sǝɓ chika mǝ kaɗ wa." 13 Nggoman chandǝ takǝt fishirchaˈan tiˈini hur kulkuli tǝɗi ɗǝrman yi pǝkata, paɗ diiɗ kan inaftǝ kum nggǝrsǝ chap.

19 Kǝrsǝ wiˈtǝ kǝɗ kilomita ɗǝrman ndu michcha, kǝɗu nak Yesu ɓat nduk tǝ kombawal taˈan, paɗ kǝmsichaˈan lekǝkanda. 20 Ndang kǝ Yesu tanda wa, "Nggǝta, mǝ lekǝwun wa." 21 Kǝɗu mbǝnkandǝ fata, thlǝ kandǝ anchi kǝ hur kombawal taˈan. Chat kǝɗuyu kombawaltaˈan saˈkandǝ kǝ mii chichangnda mǝɗi nat ndǝ ɗǝta.

Pin Yesu fata kǝmɗi kǝmsichǝ muɗ

1 Kǝrsǝ ndaˈan Yesu nggǝrkan pǝnan fat kǝmsichiyan, ǝ kapa kufi Galili. Ə mbanɗi pǝɗǝn fatˈyan ya: 2 Siman Biturus, Toma. (Thla thlǝ ˈya fee wa wanmoɗata), Nataniyel thla ɓech ǝ Kaana yi hahi Galili, wanchi Zabadi, tǝ fowun kǝmsichǝ chap tandǝ mǝt arta. 3 Siman Biturus ndang kan tanda wa, "Nggǝta chi kǝ tǝmnda." Ndang kanda wa, "Naˈan ɗǝta tǝ wechi." Minni pǝɗakandǝ kǝ yimnda kǝ hur kombawaltaˈan, kǝɗu witiˈni kǝs wandǝ ǝna wa.

4 Led walwurta, Yesu thlar kan ha chichangnda, paɗ kǝmsichiyan sǝn wanda wa Yesu wa.

5 ˈYak Yesu tanda ndakan wa, "Shikechina yirfiyowunsǝ wa?"

"Auwa," nggǝmndǝ nda.

6 Ndakan wa, "Mǝkam mapatˈɗan tǝ harsǝm i kombawal taˈan nowun mbǝs fowunna." Kǝ chikandǝ kǝdu, mbahǝn wandǝ kahandǝ kombawal taˈan wa, kǝthlǝm tertǝ yirǝfchǝɗi nech huran.

7 Kǝn kǝmsiɗi yahtǝ Yesu kaan ndandǝ Biturus wa, "Thleya Thlǝwira niya." Kǝ sǝkkǝ Siman Biturus anchi ndatǝn wa, "Thleya Thlǝwirniya." Tǝrkan kapatˈyan kǝn kan kǝ filˈyan (Kǝthǝm choh kǝtanchǝ ha, hǝmkan kǝ hur ˈyaman). 8 Parak takǝt kǝmsichaˈan anchi tǝ kombawaltaˈan, tandǝ kah yirǝfchǝ heet hur mapaɗan. Kǝthlǝm langgǝ ndǝ ha tǝ chǝchanda wa nechan nat kǝɗ ɗǝf sartǝ aruˈ. 9 Kǝ chekanda nakan ndǝ waɗi njaˈ tǝ fee tǝ chalwata kǝsta, nakandǝ yirfa ɗaran tǝ njohǝma ǝ minni.

10 Nda ndak Yesu wa, "Ɓamatǝn fowun yirǝfcha hur thla kǝstǝwun nakanya." 11 Kǝthlǝm ndaˈan Siman Biturus nggǝrkan kǝ hur kombawal taˈan. Kaɓankan mapaɗan kǝ mii chichangnda heet tǝ paktǝ yirifcha, aruˈ arta tǝ kumchit ɗǝrman nggǝrsǝ mahkan. Chika nakan terchanda, ɗahwu mapaɗan kaɗ wa.

Kǝnan Yesu mafati kappa thlǝ yandi Romawech kaɗi

5 Kǝ yim kǝ Yesu kǝ mǝrǝɓ Kaparnahum, chat yowun kapa thlǝ yaandi Romawecha ɓakan kǝmɗiyan. Shiyankan Yesu kǝ kǝsanchi sǝ. 6 Ndakan wa, "Chinda, maafatinchi mǝthlan ɗuk wiri, mbahǝn wa tǝɓǝrtǝha wa. Mǝthlan saa ɓahtǝ kaan."

7 Ndang kǝ Yesu wa, "Ni ɗǝt kǝ kǝnandǝ kaɗi."

8 Chat kapa thlǝ yaanan i Romawechaˈan nggǝman kan wa, "Chinda chaˈwisi kǝ ɓen kyeurinchi wa, ndiku ndak, maafatinchi nan kǝndǝ kaɗi. 9 Kǝthlǝm nggǝt paɗ nechi hur heri yowuna, tǝpaɗ fǝ yaanchǝs ǝ hur herinchi. Thlǝ ndanchi thleya wa, ‘Ɗu,’ chat kǝ ɗa. Yowun paɗ kǝ ndani wa, ‘Ɓo,’ chat ɓakan. Kǝ ndani maafatinchi wa, ‘Chu ǝn kǝɗa,’ chat chikan."

10 Kǝ sǝkkǝ Yesu kǝɗu, chat fǝrankan saka inda. Ndang kan fee nech para ndǝ yuwa, "Kittaˈan nati mbuˈowunda, ǝ hur Israˈila tamwi mbǝs thlǝ fǝrkit tǝ alkǝtfǝ kǝɗ thleya wa. 11 Kittaˈan nggǝt sǝnowundǝsi, ndat wa, terchan hur fǝ fǝr kitcha kǝɗ weˈtǝ thleya, nandǝ ɓat ǝ mǝt che farta, tǝ mǝt hǝmǝn farta. Kǝ chok ndǝ ha, kǝ sǝmnda mǝt nggomnda nat tǝ Ibrahim, Ishaku tǝ Yakubu, ǝ kutǝrakti hulafǝrta. 12 Fee chefee tahsanda kuturakti Farta, paɗ karndǝ fǝr kit, na fee cham tandǝ kesh, kǝ hur wuthla. Mǝɗi na fee tǝta tǝ kang wanthlancha."

13 Chat tǝɓǝrkǝ Yesu ha, ndang kan kapa thlǝ yaandi Roma taˈan wa, "Ɗu kaɗi, na fee chuta kǝɗ ǝnɗi fǝrtu kit." Chat kǝɗuyu maafaɗan i kapa thlǝ yaanan kǝnkan kaɗi.

Kǝnan Yesu nafchi kaɗ chap naa whaˈarchi fiyanda

28 Kǝ saˈkan kǝ heshi kufi thla ǝ thle Gadarawa. Nafchǝ chap tǝ hwaˈarchǝfa chekandǝ kesh mǝɗi thlǝ thlohandǝ fee mǝmatecha, ɗǝkandǝ mbǝs ndi. Chok ndǝ kǝ ǝna lekǝt kaan mbahǝn wu yowun mbǝrtǝ ha tǝ minni wa. 29 Chat kǝɗuyu hwakanda ndaka nda wa, "Mǝpuchǝ tǝ nggaˈan, chǝ Waˈi Farta? Tǝ ɓen kǝthlǝm kǝ fireˈinchin ɓahta kǝn wanshengnan saˈta wa?"

30 Kǝ pang ngguɗyeh paɗ, fowun kapa chaap kǝllanggarchǝs tandǝ parata. 31 Hwaˈarchaˈan shiyan kandǝ Yesu ndaka nda wa, "Maa ǝ cheˈǝnchǝn kesh, pǝkko nggaˈan kǝ hur chaap kǝllanggǝrchiɗa."

32 Ndangkan tanda wa, "Pǝɗama." Chat chekandǝ kesh yimkandǝ kǝ hur chaap kǝllanggarchaˈan. Nat chaap kǝllanggarchaˈan rakakandǝ tǝ weshet fa firewh kandǝ kaha tǝ mii chichangngǝnɗi nech hwengnga yimkandǝ kǝ hur hawurtaˈan. Tǝkkandǝ ha hur ˈyaman. 33 Fǝ para kǝllanggarchaˈan rakakanda, yimkandǝ kǝ mǝrɓan, chat mbuˈkandǝ kusheˈtaˈan nat, tǝ ǝnɗi sǝɓchǝ tǝ nafchiɗi naa hwaˈarchǝ fiyanda. 34 Chat nafchi mǝrɓan chekandǝ kesh kǝ mbǝs Yesu. Kǝ nakandǝ ndi, shiyankanda kǝ maltǝ thle mǝt ˈyandǝ ha.

Kǝnan Yesu ɓem kaɗi

32 Kǝ nak kominchǝɗi chap yu pǝɗat kesh, ɓak fowun nafchǝ tǝ yowun hishnefa thla njandǝ hwaˈǝrchǝ shenuˈta kǝmɗi Yesu. 33 Kǝ chen kǝ Yesu hwaˈarchaˈan kesh, nafɗi mbahan wakchǝ shenuˈtaˈanyu shenuˈkan. Nggomndi nafchaˈan sakandak inda ndakandǝ wa, "Tamwamǝn na weˈtǝ ǝn kǝɗ thleya ǝ hahi Israˈila wa."

Yesu tǝ kutur hwaˈarcha

22 Ɓan kǝ fee thla na hwaˈarchǝ fiyan shenuˈwa wa, paɗ komnda. Kǝ nan kǝ Yesu kaɗi, nggakkan shenuˈta, tǝ paɗ mǝthlan namǝta.

Fǝr kit i nunefa thlaˈtǝ hahi Kanˈana

21 Malkǝ Yesu mǝɗan ha pǝɗakan kǝ thle wanmǝrǝɓchi Taya tǝ Sidon. 22 Kǝɗ kwishya nunefa thlǝ Kanˈana, thla nech tǝ choktǝ ǝ thle mǝɗan, ɓakan kǝmɗi Yesu, nakan tǝta. Nakan ndat wa, "Ai Chinda, Waˈi Dauda, kǝ haɗuchi fa. Ɓǝɓi hweˈrǝ ɓahandǝ waˈinchi kǝ nuwaa kaan."

23 Mbuˈawu Yesu nunafan ǝna wa. Chika tǝ kǝɗu, nunafan malawa paraˈ tandǝ tǝ shita wa. Minni ɓak kǝmsichiyan, shiyan kandǝ Yesu, ndat wa, "Ndandǝn nuɗa wa, kǝ pǝɗa, kǝthlǝm mǝthlan ɓilla mǝnchǝ kǝrsa tǝ tǝta."

24 Ndak Yesu wa, "Nggǝtta thlǝnchǝ fee nenchi kǝmɗi nafchi Israˈilawechǝ ndak. Nechandǝ kǝɗ chaap chohrecha fee sakecha."

25 Ɓak nunafan nduk. kopkan ha shiyankan, "Komkom kǝsisi, Chinda."

26 Nggǝrkǝ Yesu sǝ wa, "Ɗǝɗ wa sǝwa kǝ tǝr fee ɗǝsǝmndi wancha paɗ kǝ fǝran fee yiɗcha wa."

27 Ndak nunafan wa, "Ənɗi mbuˈtu ndaˈan nech kǝ kittaˈan Chinda. Paɗ yiɗcha thlǝ mbǝschandǝ fishirtǝ ɗǝsǝmǝnɗi hǝmchǝ kah fartǝɗi na thlǝ wirˈyandǝ sǝm ǝna."