Milagres de Jesus

yesuwƹ yesseḥla sen ileƹmayen

27 mniyn yesuwƹ yekker tayreweḥ s yin ḏbeƹƹent sen ileƹmayen tṣeyḥen mmalen: «reḥmaneγ ay memmis n dawud.» 28 ḏbeƹent ḥetta mniyn yuḏef al lḥuc. yaxy ysestnin: «tetemnem lliy neči tqudduγ aggeγ ayuh?» uwanas: «ayya, ayya siydneγ.» 29 yeggi ifesnis af ṭiṭewinesen yuwa: «tafenyuc rebbiy af lḥsab n liymanuwem.» 30 yaxy mirneṯ ṭiṭewinesen. aḏ yesuwƹ yuwayasen: «rreṯ lbaluwem ammelem y ḥed.» 31 lekenti reḥḥen uwan y midden lkul g aydin n lblad.

seḥli n sen ileƹmayen g riḥa

29 mniyn yeffeγ yesuwƹ aḏ tlamḏes seg riḥa, ḏbeƹƹent ggeṯ d midden. 30 aḏ wsiyn sen ileƹmayen geƹemzen af lḥacit n abriyḏ. mniyn slen lliy yesuwƹ iƹedda s tmesen, ṣeyḥen: «reḥmeneγ ayya siydneγ ay memmis n dawud.» 31 lekinti midden zheren fellasen bac asusmen. yaxy rnin ṣeyḥen iṭer: «reḥmeneγ ayya siydneγ, ay memmis n dawud.» 32 yebbed yesuwƹ. yesγuyasen. aḏ ysestnin: «matta texsem afeneggeγ.» 33 uwanas: «nexs aγentereḏ nzer, ayya siydneγ.» 34 yesxef fellasen, yeggi ifesnis af ṭiṭewinesen. yaxy ƹlewleh ḏwellen zerren, aḏ yyuren deferris.

2 yaxy argaz yejdem yusesd. yesjeḏḏas. yuwayas: «ayya siydneγ kan cek texseḏ rahiy tetqudduḏ ltseḥliḏ we altmukkeseḏ njestiw.» 3 yaxy yezzel fusis, yeṭṭef diyes, yuwa: «ih xseγ, turuh aḥliḏ.» ƹlewleh imukes ljdam n wargaz. 4 aḏ yuwayas yesuwƹ: «arr lbaliḵ wimmal y ḥed, amma barra bac afizer lkahen we ayecheḏ, aḏ uc lweƹdeṯ lliy yuwa felles muwsa bac asennen midden lliy cek teḥliḏ.»

2 yaxy usend midden uγend meclul yezzel. mniyn yezra yesuwƹ liymanesen, yuwa y umeclul: «witteggec ay memmi. rahiy ttweγferen ibekkaḍniḵ.» 3 uwan lbeƹḍ n lliy seḥfeḍen g cceriyƹeṯ y imanesen: «rahiy yeṯƹedda af rebbiy.» 4 yefhem yesuwƹ lliy txemmemmen diyes, ysestnin: «maγer ulawnewem txemmemmen g ccer? 5 mantan yezhel iṭer immal ttweγfereneḵ ibekkaḍniḵ naγ immal n kker yyur? 6 lekenti uwiγ ayuh bac asnem lliy tqudduγ neči lliy yeḏwel d bnaḏem aγfreγ bekkeḍu g tammurt.» lweqt ḏḏin, yuwa y umeclul: «kker qam tesuytiḵ truḥeḏ al lḥuciḵ.» 7 yekker, iruweḥ al lḥucis.

10 aḏ diyes argaz fusis yeqqur. aḏ weqt lliy smuḏen iferysiyyen attehmen, mleymen fellas sestnent: «yaxy ḥlal seḥli n imuḍan as n sebbeṯ.» 11 yerrasen: «kan yjen siwem γares izmer yjen aḏ yudayes g burriƹ as n sebbeṯ. yaxy muc tatisemneƹ we atyeṭṭef? 12 aḏ kennim tessennem lliy bnaḏem xiyr n izmer ggeṯ. mala igga n lxiyr as n sebbeṯ ḥlal.» 13 wembeƹd yuwa y argaz: «zzel fusiḵ.» yezzeliṯ. yaxy teḥla, teḏwel lebas ƹliha am ttani.

temeḥliwt n lliy iḏemnis ttezelen

20 diyes temeṭṭuṯ γares 12 d isuggasen iḏemnis tezzalen. tusesd al yesuwƹ teṭṭef g temma n rdis s deffer, 21 afelxaḍert tuwa y imanis: «lukan aṭfeγ ḥetta g temma n rdis aḥliγ.» 22 yaxy yenneḍ yesuwƹ yezriṯ, yuwa: «ay yelli, witteggec. rahiy liymanim yseḥlayem.» teḥla temeṭṭuṯ seg lweqt ḏḏin.

yesuwƹ yesseder yellis n yjen seg imeqqaren

18 mniyn netta yemmal g ayuh n dwiy, yusesd meqqar n lmjameƹ yesjeḏ zzeṯis yuwa: 19 «yelli turuh temmuṯ, amma sed agg felles fusiḵ adj atekker.» yekker yesuwƹ yeḏbeƹƹi aḏ yiḏes tlamḏes.

23 mniyn yuḏef yesuwƹ al tezeqqa n umeqqar n lmjemeƹ aḏ yezra lliy čeṯen g tcebbebt aḏ lliy sgujduren. 24 yuwa: «rewḥeṯ. rahiy tefruxt wittemmuṯc lekenti teṭṭes.» ṣṣen felles. 25 ysefγ midden aḏ yuḏef yeṭṭef tefruxt seg fusis tekker.

yesuwƹ yesserkaḥ g aḍu

23 wembeƹd yuli al leflukeṯ, aḏ ḏbeƹƹent tlamḏes. 24 yaxy yekkerred aḍu d meqqar g iylel almiy ḥeḍerbac tenbelen aman lflukeṯ.

aḏ yusi netta yeṭṭes. 25 reḥnas tlamḏes fiseƹ ssekkeren diyes mmalen: «ayya siydneγ semmenƹaneγ rahiy tanemmeṯ.» 26 yaxy yuwayasen: «maγer tugeḏḏem? ayya lliy liymanuwem ḍƹiyf.» wembeƹd yekker yezher af aḍu aḏ iylel. yaxy yersa aḍu. 27 yaxy ṯƹejben midden uwan: «zeƹma d mam wuhnit bac asyeγ rrey aḍu aḏ iylel?»

yesuwƹ yesseča g 5,000 d midden

15 temeddiṯ usennesd tlamḏes uwanas: «ayuh n umkan widdis ḥaja aḏ as ireḥ, adj areḥen midden al tmurewin bac asγen man ačan.»

16 lekenti yesuwƹ yuwayasen: «muc lazem areḥen uctasen kennim ačan.»

17 yaxy uwan: «wiγernexc dehnit kan 5 d tiqurseṯin aḏ sen n trubay.» 18 yuwa: «aγtettend al deh.» 19 aḏ yuwa y midden: «ndeṯ y uču af rbiƹ.» wembeƹd iqam aydin 5 n tiqurseṯin aḏ sen n trubay. yesmuqel al ujenna, yeḍleb rebbiy bac anumerneṯ. yerza tiqurseṯin, yucineṯ y tlamḏes, ferqentent af midden.

20 čen lkul cbeƹan, wembeƹd qamen tlamḏa 12 d tiƹellagin ƹebbenneṯ seg lliy yefdelled.

21 aḏ wsiyn lliy čen teqrib 5000 d irgazen man γiyr imeckenen aḏ tiseḏnan.

25 aḏ lexra n yeḍ yused yesuwƹ al tlamḏes yeggur af aman.

yesuwƹ yesseča 4,000

32 yesγuy yesuwƹ af tlamḏes yuwa: «rahiy sexxefniḏ ayuh n midden. γarsen ṭuruh 3 d ussanaṯ iḏiy aḏ willic man ačan. ykemmel uču lliy uγentiḏ yiḏesen. neči wilγisexc aruḥen lluzen, balek witquddunc aḏeṣlen.»

33 yaxy tlamḏes uwan: «s manis tadnaγ g ayuh n lxla tiqurseṯin keffeneṯ y ayuh n midden lkul.»

34 ysesetnin: «mennit γarwem d tiqurseṯin?» uwanas: «7 aḏ trubay timeckunin.»

35 yaxy yuwa y midden anden y uču af tammurt. 36 wembeƹd iqam aydin n tiqurseṯin aḏ aydin n trubay. yeḥmeḏ rebbiy, yerza aγrum, yuci y tlamḏes, ferqent af midden.

37 čen midden almiy cebƹen. wembeƹd qamen tlamḏes 7 n isnin ƹebbenneṯ seg tiqurseṯin lliy fdelented.

38 aḏ wsiyn lliy čen 4000 d irgazen man γiyr tiseḏnan aḏ imeckenen.

yesuwƹ ydeffeƹ g ḍḍeribeṯ n lheykel

24 mniyn uṣellen al kefrnaḥuwm, usend lliy tlayemen g ḍḍeribeṯ n lheykel. uwanas y buṭrus: «yaxy lmuƹlmewem wituc sen drehem?» yerrasen: «ituc.»

25 aḏ s manis yuḏef buṭrus al lḥuc, ysesetni yesuwƹ: «man mleḏ af lmuluk, s mammun tlayemen g ḍḍeribeṯ? yenda tleyemen diyes, seg ibeldiyen naγ seg iγriben?»

26 yerras buṭrus: «seg iγriben.» yaxy yuwa yesuwƹ: «mala ibeldiyen γarsen lḥeq widefƹenc. 27 lekenti bac winseγliḍc ayuh n midden ureḥ al iylel. tluḥeḏ teṣennertiḵ. teṭfeḏ trebit. trebit temezwert lliy tateffeγ. miras imis. taḏefeḏ diyes ṣurdi lqimtis 4 drahem. awyiy teḏefƹeḏ ḍḍeribeṯ fella aḏ fellaḵ.»

yesuwƹ yelƹen temeṭciṯ

18 al ača tajji mniyn yerred al tmura yelluz 19 yezra temeṭciṯ af lḥacit n abriyḏ, ireḥḥes, lekenti wiyufi felles kan tiwerqay. yeḏƹu fellas, yuwa: «maƹadc aḏerweḏ xlaṣ beƹed as wuh.» yaxy teqqur temeṭciṯ ƹlewleh. 20 mniyn zren tlamḏes aydin ṯƹejben, uwan: «ya, mammeḵ teqqur ayuh n temeṭciṯ ƹlewleh.» 21 yaxy yerrasen: «lḥeq afenemleγ: kan γarwem liyman aḏ witetcukkumc, tetqudum aggem iṭer n lliy ggiγ y ayuh tmečiṯ. ḥetta kan amlem y ayuh n jbel: < mukes temlewḥeḏ g iylel. > ayṣar lliy tuwim. 22 aḏ lliy atḍelbem g tẓalliṯ s liyman atelqim.»

seḥli n xdim n lqayed n 100

5 mniyn yuḏef yesuwƹ al tmura n kefrnaḥuwm, yusesd yjen d lqayed n 100 g ljiyc n ruwma yetjeheyas. 6 yemmal: «ayya siydneγ rahiy xdimiw yemcul aḏ yuγa mkanis g tzaqqa, aḏ γares ggeṯ d aγenna.»

7 yaxy yuwayas yesuwƹ: «tareḥeγ atseḥliγ.»

8 yerras lqayed n 100: «ayya siydneγ neči wistehlexc bac aḏeḏfeḏ al tzaqqaw. amma mmel tuflayt akehaw bac ayeḥla xdimiw. 9 neči γari mam iḥekkem diyi, aḏ γari zada irgazen ḥekmeγ disen, lemmi mleγ y yjen sisen: < barra. > ayreḥ, naγ y ttani: < sed. > adyas. aḏ y xdimiw: < agg ayuh. > ayeg.»

10 mniyn yesla yesuwƹ aydin yeṯƹejjeb aḏ yuwa y lliy debƹen diyes: «lḥeq afenemleγ: wiḏḏufixc ḥetta d yjen seg israyil yesteƹqeḏ diyi am ayuh n argaz.» 11 aḏ zada afenemleγ: «ggeṯ d midden iberiyen tadesen s mcerreq aḏ mγerreb we afraḥen yid ibrahiym aḏ isḥaq aḏ yeƹquwb g lmelekuwt n ujenna. 12 amma israyiliyen lliy yusi γaresen lḥeq aḏeḏfen al lmelekuwt tamlewḥen gi tellest n barra mani taƹeyyeden we aγezzen cwerbesen s uγenna.»

13 yuwa yesuwƹ y lqayed n 100: «barra. rahiy rebbiy tafyuc lliy teḍlebaḏ afelxaḍert tumeneḏ.» aḏ g lweqt ḏḏin, yeḥla xdimis.

zeƹzeq n cyaḍen aḏ aγreq n iḥellufen

28 mniyn yuṣel yesuwƹ al lḥacit ttani g lḥumeṯ n ijedriyen laqent sen irgazen skenenten cyaḍen aḏ nihnin ffaγen seg amas n leqbur, aḏ nihnin d iweƹƹeren ggeṯ, aḏ ḥetta d yjen wiyetquddu ayƹedda seg aydin n abriyḏ. 29 aḏ fiseƹ ṣeyḥen: «matta texseḏ s γarneγ ay memmis n rebbiy? yaxy tusid al dehnit qebbel lweqt bac aγenteƹeḏbeḏ?»

30 aḏ tusi tereslit n iḥellufen tferreḏ tmasen. 31 yaxy uwan cyaḍen y yesuwƹ: «kan texseḏ aγenetzeƹzqeḏ, nekyaneγ al ayuh n treslit n iḥellufen.» 32 yuwayasen: «berreṯ.» ffaγen aḏ ḥewlen al treslit n iḥellufen. yaxy uzellen iḥellufen fiseƹ aḏ udan s nnaj jbel g iylel aγreqqen diyes.

33 aḏ rwellen lliy sefreḏen s iḥellufen al tmura aḏ uwan af mag iṣar lkul y lliy ttwesknen. 34 yaxy feγend midden n tmura bac aleqan yesuwƹ. mniyn zrent uwanas ayeffeγ s γarsen.

bekkuc lliy yufley

32 mniyn seddiγ ffeγen yen n sen, uγennesd midden bekkuc yeskenni cciyḍan. 33 yesuwƹ izeƹzeq cciyḍan yuflay bekkuc. yaxy fehhen midden uwan: «ƹemris winezri am ayuh xlaṣ g israyil.»

yesuwƹ yid beƹelzebul

22 wembeƹd uγennesd argaz yeƹma aḏ d bekkuc aḏ yeskenni cciyḍan, yseḥlayi, yeḏwel izer aḏ ydugga.

liyman n tmeṭṭuṯ tekenƹanit

21 wembeƹd yeffeγ yesuwƹ seg aydin n mkan ireḥ al lḍraf n ṣuwr aḏ ṣeyda lliy middenisen muc d uḏeyin. 22 yaxy temeṭṭuṯ tekenƹanit s yin tusesd tetṣeyyeḥ: «rreḥmiḏ ayya siydneγ ay memmis n dawud. yelli tetƹana ggeṯ. yeskenniṯ cciyḍan.» 23 lekenti wisyerri ḥetta tuflayt. yaxy usend tlamḏes mmelnas tƹewaḏen: «ggas mag texs. rahiy nettaṯ tetṣeyyeḥ deferrenneγ.»

24 yaxy yerrasen: «rahiy yenkiyiḏ rebbiy kan al midden lliy weddren am tulli seg aṯ israyil.»

25 lekenti temeṭṭuṯ teqrebesd tesjeḏ tuweyas: «ƹewniḏ ayya siydneγ.»

26 yaxy yerras: «muc d ṣwab mam aywiy aγrum n imeckennis we atidileweḥ y ijriwen n iṭṭan.»

27 tuwa: «γareḵ lḥeq ayya siydneγ lekenti ijriwen n iṭṭan tteten seg ifetfuten n aγrum lliy tṭuṭan seg uču n iḏbabenesen.»

28 yaxy yerras yesuwƹ: «ayya temeṭṭuṯ liymanim d meqqar. tamyuc rebbiy lliy teḍlebbeḏ.» yaxy teḥla yellis ƹlewleh.

yesuwƹ yesseḥla frux diyes cciyḍan

14 mniyn uṣellen al midden, yeyyur argaz al yesuwƹ yezwa af ifednis zzaṯis. 15 yuwa: «ayya siydneγ rḥem memmi. rahiy yuḍen s lmeṣṣebyen, aḏ netta yetƹana ggeṯ aḏ seƹat iṭṭuṭa g timsi, seƹat g aman. 16 aḏ uγiγtiḏ al tlamḏeḵ wiquddenc atseḥlan.»

17 yaxy yuwa yesuwƹ: «ayya ljiyl lliy witemenc aḏ lliy yeƹwej al lemmi taqimeγ iḏewem? al lemmi tafenḥemleγ? aγtettiḏ al dehnit.» 18 yezher yesuwƹ af cciyḍan. yeffeγ seg afrux. yeḥla seg lweqt ḏḏin.