1 yuṣel buwlus aḏ siyla al tesaluniki lliy yusi diyes lmejmeƹ n wuḏeyen beƹd mag ƹeddan af mfibuliys aḏ buluniya. 2 yaxy ireḥḥas buwlus am lƹadeṯ aḏ yeqqim yetkaceḥ disen s dwiy lliy g lektab 3 n sebbeṯaṯ. 3 aḏ yusi iƹezzem g lektab aḏ yetfesresen lliy lmesiyḥ lazem ayettuƹeḏeb we ayekker seg jar lliy mmuṯen. aḏ yuwa: «rahiy lmesiyḥ lliy tesugumem diyes netta d yesuwƹ lliy tbecreγ diwem siyes ṭuruh.» 4 yaxy crehhen ulawen n lbeƹḍ seg lliy ḥderren aḏ umennen. aḏ ḏbeƹen buwlus aḏ siyla. aḏ yusi iḏsen ggeṯ d iyuwnaniyen lliy wsiyn tẓallan y rebbiy aḏ ggeṯ d tiseḏnan timurkentiyen.

5 yaxy nγerren wuḏeyen lliy wuminenc. aḏ laymen lbeƹḍ n lliy thummuwn seg irgazen aḏ midden bac aggen lehrej we aṣeyḥen g tmura. aḏ fzeƹen lkulhum al lḥuc n yasuwn xsen aṭfen buwlus aḏ siyla bac atensbedden azzaṯ cceƹb. 6 mniyn witenufin diyn kerkeren yasuwn aḏ lbeƹḍ n aweṯen al lḥukkam n tmura. aḏ cken uwan: «rahiy ayuh n sen n irgazen lliy qlebben ddunyeṯ usend al tmurenneγ zada. 7 aḏ yefreḥ sisen yasuwn g tzaqqas. aḏ nihnin lkulhum witeggenc s dwiy n lqeyṣer. aḏ tbecren s lmelek iḍen ismis yesuwƹ.»

8 yaxy ugeḏḏen midden aḏ lḥukkam mniyn slen ayuh. 9 aḏ lqan af yasuwn lekfaleṯ bac atsiben netta aḏ lliy yiḏes.

10 g yiḍ ceyƹen aweṯen buwlus aḏ siyla al biyriya. mniyn uṣelnas, reḥḥen al lmejmeƹ n wuḏeyen diyes. 11 aḏ wsiyn uḏeynis xiyr n wuḏeyen n tesaluniki. aḏ qbellen dwiy n rebbiy aḏ nihnin crehhen fellas ggeṯ. aḏ uḏellen ƹezmen g lektab kul as bac aḥekren dwiy n buwlus ṣḥiḥ naγ aha. 12 yaxy umennen ggeṯ sisen. aḏ umennen seg iyuwnaniyen ggeṯ d tseḏnan n imurkentiyen aḏ irgazen.

13 slen wuḏeyen n tesaluniki lliy buwlus yella yetbeccer g biyriya. yaxy iweḍḍent. aḏ qqimen tḥercen g midden fellasen.

14 yaxy ƹlewleh awyen aweṯen buwlus al iylel bac ayerzef. aḏ yeqqim siyla aḏ timuṯawus diyn. 15 reḥḥen aweṯen yid buwlus almiy seṣlent al ṯiyna. wembeƹd rrend. aḏ yusi buwlus iweṣṣeyin bac amlen y siyla aḏ timuṯawus aḍewden felles fiseƹ.

16 mniyn yusi yesugum disen g ṯiyna, yufa tmura tečur d leṣnam. yaxy iγeccec. 17 yuḏel yetkeceḥ g wuḏeyen aḏ g lliy muc d wuḏeyen seg indin lliy tẓallan g lmejmeƹ. aḏ ydugga zada y lliy yetemleqa yiḏesen kul as g ssaḥeṯ n tmura. 18 mniyn uflayen yiḏes lbeƹḍ seg tlamḏa n biquwr, aḏ lbeƹḍ n iriweqiyen, uwan lbeƹḍ sisen: «af matta ydugga ayuh n argaz lliy ilsis diyma iṭenneḍ zeƹma.»

aḏ uwan ttenyaṯ lliy rahiy yetbeccer s ysem n irebbiyen iḍen. afelxaḍert yusi yduggeyasen af yesuwƹ aḏ tneḵris.

19 yaxy awyent al aryubaγus. aḏ uwanas: «nexs anessen d matta ayuh n lmeḏheb jdiḏ lliy tetbecreḏ siyes. 20 rahiy neseγda diyeḵ temeleḏ g dwiy aγrib nexs atnefhem.» 21 aḏ wsiyn midden n ṯiyna aḏ lliy seknen diyes seg iγriben tƹeddan g lweqtesen duggan naγ sseγdan g ḥaja d jdiḏ.

22 yebbed buwlus g amas n aryubaγus yuwa:

«ay midden n ṯiyna ufiγwem deynin ggeṯ g kul ciy. 23 mniyn neči tendeγ g tmurewem, aḏ smuquleγ al lemƹebduwem, ufiγ ḥetta mkan n teγrest yuri fellas: < al rebbiy lliy winessinc ismis. > mala s ayuh n rebbiy lliy tetzellimas aḏ witsinemc ismis neči tbecreγ diwem. 24 rahiy netta wisekkenc g lemƹebed lliy bnenten ifesn n midden afelxaḍert netta d rebbiy n ujenna aḏ tammurt. aḏ d netta yeggi ddunyeṯ aḏ lliy diyes lkul. 25 witeḥtaq ḥaja s γarwem, afelxaḍert d netta lliy ituc y midden lkul temeddurt aḏ rruwḥ aḏ kul ciy. 26 aḏ yeggi midden lkul seg yjen. aḏ ysesknin g tammurt lkul.

aḏ yeggi s luwel lweqt n tmedurtesen aḏ leḥduḏ n temurinsen, 27 bac aḏurzun af rebbiy we atefen. rahiy netta yella yid kul yjen sineγ, 28 afelxaḍert

<siyes netedder aḏ neggur aḏ nella. >

naγ mammeḵ uwan lbeƹḍ seg irgezenuwem lliy tinyen:

<neccin zada d ṭarwas. >

29 mala medam neccin d ṭarwa n rebbiy yexs wintegc rebbiy am ṣnem s wureγ naγ s lfejreṯ naγ seg iḍγaγen yetquddu kul yjen atyeg mammeḵ yexs. 30 rahiy rebbiy lliy wifeniḥesebc af ussan lliy tusim witsinemc disen ismis, yesγuyu ṭuruh af midden lkul bac adesen we ateben, 31 afelxaḍert yeggi as y leḥsab y lliy g ddunyeṯ lkul s lƹedl af ffus n yjen iwezayi. aḏ yuca lemerṯ y midden lkul mniyn ysekri seg tmettent.»

32 mniyn slen lbeƹḍ n midden s tneḵri beƹd temettent, qqimen teṯhezzan. lekenti midden iḍen uwan y buwlus: «nexs aγentufleyeḏ af ayuh tijekkelt iḍen.» 33 aḏ amyuh yeffeγ buwlus s γarsen. 34 aḏ diyes mam yumen aḏ yeḏbeƹ buwlus, aḏ sisen dyunisyus lliy yusi d yjen seg irgezen n lmejles n aryubaγus aḏ temeṭṭuṯ ismis damariys aḏ lbeƹḍ n midden.