1 mniyn wsiyn buṭrus aḏ yuwḥenna duggan y midden, usennesend lkuhhan aḏ meqqar n iƹessasen n lheykel aḏ iṣedduwqiyiyen. 2 γecceccen afelxaḍert buṭrus aḏ yuwḥenna wsiyn seƹzamen aḏ mmelen y midden lliy tneḵri n lliy mmuṯen d leḥqiqeṯ madam yekker yesuwƹ. 3 yaxy ṭfenten luḥenten g lḥebs al ača afelxaḍert yusi d ggiḍ. 4 aḏ wsiyn ggeṯ seg indin lliy slen lxuṭbeṯ umennen almiy ḏwelen lmumnin ḥaḍrebac 5,000 seg irgazen.

5 al ača tajji mleymen g uwrceliym imeqqaren n wuḏeyen aḏ iwessaren aḏ lliy seḥfeḍen g cceriyƹeṯ. 6 aḏ yiḏesen ḥennan rreyes n lkuhhan aḏ qayafa aḏ yuwḥenna aḏ skender aḏ nnasenesen lkul. 7 yaxy sγuyen y buṭrus aḏ yuwḥenna sesetnenten: «mam yucewem lquweṯ bac aggem ayuh aḏ s ysem n mam teggimt.»

8 yečur buṭrus seg rruwḥ lqudus yuwayasen:

«ayya imeqqaren n cceƹb, ayya iwesserenis, 9 kan tesestunem diyneγ as wuh afelxaḍert n lxiyr lliy neggi y ayuh n umeclul bac asnem mammeḵ yeḥla, 10 yexs asnem lkulkum aḏ aṯ israyil lkul lliy s ysem n yesuwƹ lmesiyḥ nnaṣiriy lliy teṣlebbemt aḏ lliy ysekri rebbiy seg jar lliy mmuṯen. rahiy s ismis yebbed ayuh n umeclul zzaṯuwem yeḥla. 11 rahiy yesuwƹ am aḍγaγ lliy tluḥemt ayya ibennayen. yeḏwel netta d lsas meqqar n terkineṯ. 12 aḏ widdic mam yesemneƹ kan netta afelxaḍert widdic ysem iḍen adug jenna yuci rebbiy y midden bac anemneƹ siyes.»

13 yaxy fehhen lliy ḥderren seg ṯṯiqeṯ n buṭrus aḏ yuwḥenna g imanesen afelxaḍert ssenen lliy nihnin wiƹzimenc aḏ seg ssayer n midden. aḏ fhemmen lliy nihnin wsiyn yid yesuwƹ. 14 aḏ afelxaḍert zren meclul yebbed yiḏesen wiquddenc arren af buṭrus aḏ yuwḥenna.

15 amma uwanasen afγen seg lmejlis bac amcewren jaresen. 16 aḏ uwan: «matta aneg s ayuh n sen n irgazen? zzaṯ midden n uwrceliym tṣar af ifesnesen lmuƹjizaṯ aḏ lemayer. winetqudduc anmel lliy nettaṯ d tikerkas. 17 amma bac wisellenc midden lkul s ayuh n dwiy yexs atenneseggeḏ bac maƹadc aḏuflayen y midden af ayuh n ysem beƹd as wuh.» 18 wembeƹd uγentend aḏ uwanasen «widugeṯec y midden aḏ wisenseḥfeḍec ism n yesuwƹ xlaṣ.»

19 lekenti buṭrus aḏ yuwḥenna uwan: «mleṯ lḥeq zzaṯ rebbiy. s dwiy n mam yexs aneg? s dwiywem naγ s dwiy n rebbiy? 20 rahiy winetqudduc anbeṭṭel dwiy af lliy nezri aḏ nesli.»

21 yaxy djullen disen imeqqaren n lmejlis man γiyr man atenƹeqben aḏ sibyenten afelxaḍert ugeḏḏen seg midden lliy wsiyn lkulhum tsebḥen y rebbiy af lmuƹjizaṯ lliy zrenteṯ. 22 aḏ argaz lliy yeḥla ifaṯ 40 d isuggasen.

23 mniyn siybenten, buṭrus aḏ yuwḥenna ḏwellen ƹlewleh al yeṯmesen ƹeweḏnesen matta uwanasen imeqqaren n lkuhhan aḏ iwessaren. 24 beƹd mag slen dwiysen, zullen y rebbiy s ul yjen uwan:

«ay rebbiy lliy iteg kulci aḏ lliy yeggi jenna aḏ tammurt aḏ iylel aḏ lliy disen lkul, 25 ayya lliy tuwiḏ s rruwḥ lqudus af imi n babenneγ dawud lliy d lƹebdiḵ:

<af rebbiy maγer midden n lummem lkul thadjan?

s lbaṭel y beƹeḍhum tewecucen?

26 lemluk n tammurt aḏ imeqqarnis

mleymen af lliy diyma yella

lliy iwazayi taḥerben. >

27 aḏ yentem ayuh n dwiy nembelḥeq dehnit mniyn mleymen hiyruwdus aḏ biylaṭus benṭy yid midden n israyil aḏ midden ttaniyeṯ bac aḥerben memmiḵ yesuwƹ meqdus lliy teggit d lmesiyḥ. 28 aḏ ggen yiḏes lliy s lqudertiḵ texseḏ aḏ tesmuḏeḏ ayṣar.

29 ṭuruh smuqel ay rebbiy mammeḵ segeḏen diyneγ. aḏ ucaneγ lquweṯ bac anṣaṣel dwiḵ menγir tiwdi. 30 aḏ zzel fusiḵ bac aḥlan midden we aṣerneṯ lmuƹjizaṯ d lemayer aḏ leγrayeb s ysem n yesuwƹ memmiḵ meqdus.»

31 beƹd mag zullen yerjij mkan lliy wsiyn diyes aḏ čuren lkul s rruwḥ lqudus, aḏ uḏellen tbecren s dwiy n rebbiy menγer tiwdi.

32 aḏ wsiyn lmumnin kul ciysen jmiyƹ, amellaḵ γarsen ul yjen naγ nihnin d argaz yjen. aḏ ḥetta d yjen sisen wiyemmil af ḥaja γares nnuw weḥdi amma yusi kulci jaresen d ccerkeṯ. 33 aḏ wsiyn imersal tbecren s tneḵri n yesuwƹ aḏ yiḏesen lquweṯ n rebbiy. aḏ nnaƹmeṯ temeqqart tzugga fellasen lkul. 34 aḏ willic jaresen mam meḥtaj afelxaḍert indin lliy γarsen imezdeγen naγ tizeγwin wsiyn zenzan mag γarsen aḏ tucen lḥeqqis 35 y imersal. aḏ nihnin tzununt af lliy setḥeqqen af leḥsab n mag yelzemmasen.

36 aḏ sisen yuwsef lliy semment imersal bernaba yeƹni memmis n ucejjeƹ aḏ netta seg leƹcireṯ n lawiy seg qubruṣ. 37 yusi γares mezdeγ, yezenzy yuγed lḥeqqis yuci y imersal.