1 beƹd mag iƹedda lehrej, yesγuy buwlus y tlamḏa. icejƹin aḏ yuwayasen b islema. ireḥ al meqduniya. 2 aḏ yeqqim iṭenneḍ diyes yeseƹzam g midden. aḏ g laxer yuṣel al lyuwnan. 3 yeqqim diyes 3 chuwr. mniyn yusi ijerra g imanis y terzeft af iylel al suwrya, yesla lliy wuḏeyen smuḏen tatenγen. yaxy yeḏwel al abriyḏ n meqduniya. 4 aḏ yerzef yiḏes subeterus memmis n birrus seg biyriya, aḏ rsterxus aḏ sekundus seg tesaluniki, aḏ γayus seg derba, aḏ tixukus aḏ trufimus seg asiya, aḏ timuṯawus. 5 aḏ inuh lkul sbeqnaneγ. aḏ sugemneneγ g teruwas. 6 neqqim ussan n tfeṣka n tqurset g filibbi. wembeƹd, neqdeƹ iylel aḏ nuṣel al teruwas g 5 d ussanaṯ. aḏ neqqim diyn 7 d ussanaṯ.

7 as n lḥed nemleyem bac anzun aγrum, yuḏel buwlus yetbeccer g midden. aḏ afelxaḍert yesmuḏ terzeft al ača yeqqim ixeṭṭeb al zgenyeḍ. 8 aḏ nusi nemleyem g leƹli diyes ggeṯ d inerren sseγan. 9 aḏ yusi diyes afrux ismis tixus ygeƹmez g cebbak. yaxy inuddem. yeγlebbi iḍeṣ. yuda seg ṯeleṯ. yemmuṯ mniyn yusi buwlus ydugga. 10 yezwa buwlus iγemri yuwa: «wittegeṯec. rahiy wicci diyes rruwḥ.» 11 aḏ beƹd mag yuli buwlus izuneneγ aγrum. aḏ yeča. ykemmel dwiys al lefjer. yerzef. 12 amma afrux uγentiḏ yedder. aḏ freḥḥen ggeṯ.

13 amma neccin nerkeb lbabur al ssus lliy tansugem diyes buwlus. we atenwi afelxaḍert yesmuḏ tasedyas yeggur. 14 mniyn yiweḍ, nserekbi g lbabur nerzef al lmers n militus. 15 aḏ s yin nkemmel terzeft. al ača nƹedda af ljezireṯ n xiyus. aḏ g as wi 3 nƹedda tman ljezireṯ n samusa. aḏ nuṣel g as wis 4 al militus. 16 aḏ yusi buwlus yesmuḏ wiyetbeddic g afsus bac wiyetƹeṭṭelc g asiya afelxaḍert yusi yetluffu bac ayeṣel al uwrceliym g tfeṣka n as n 50 beƹd tfeṣka n uƹeddi.

17 seg militus yenkiy buwlus yesγuyu y izmimen n lmejmeƹ n lmuminin n afsus. 18 mniyn usennesd, yuwayasen:

«tessennem matta ggiγ iḏuwem seg as mezwar lliy uḏeffeγ diyes al asiya. 19 rahiy usiγ xedmeγ g rebbiy menγir ckar n imaniw. aḏ s ggeṯ d leƹyaḍ. aḏ neči tƹaniγ seg wuḏeyen. 20 aḏ kul ḥaja tafentenfeƹ seḥfeḍγewemted zzaṯ midden aḏ seg lḥuc al lḥuc. 21 aḏ usiγ mmeleγ y wuḏeyen aḏ iyuwnaniyen ateben al rebbiy, we aḏemnen s siydneγ yesuwƹ lmesiyḥ.

22 yuweyiḏ rruwḥ lqudus: < yexs areḥeḏ al uwrceliym. > aḏ wisinnexc matta yesugum diyi dinet. 23 lekenti diyma rruwḥ lqudus yemmeliḏ g kul timura udefγes lliy lḥebs aḏ lemcakel ssugumen diyi g uwrceliym. 24 amma neči witegiḏexc af imaniw madam xseγ aggeγ lwejbiw we akemleγ lxeḏmeṯ lliy yucited siydneγ yesuwƹ bac acehdeγ we abecreγ s nnaƹmeṯ n rebbiy.

25 neči sseneγ lliy maƹedc azrem uḏmiw beƹd as uh. aḏ neči usiγ tendeγ jerewem tbecreγ s lmelkuwt n rebbiy. 26 mala qa tafenemleγ as uh: rahiy iḏemnuwem muc g teḵrumtiw 27 afelxaḍert ggiγ ljehdiw bac afenseṣleγ matta yexs rebbiy lkul. 28 mala rreṯ lbaluwem af imanuwem aḏ af midden lliy yeggiwem rruwḥ lqudus d izmimen fellasen. aḏ rreṯ lbaluwem af lmejmeƹ n lmuminin lliy rebbiy yuca afelxaḍertis iḏemmen n memmis.

29 rahiy neči sseneγ lliy beƹd terzeftiw, taḏeḏfen jarewem leḏyub iweƹerren lliy wisexfenc af tulli. 30 aḏ midden siwem takren we aseḥefden midden iḥejeyen wiḥlin bac akerekren tlamḏa defferesen. 31 afelxaḍert n ayuh, rreṯ lbaluwem yeqƹeḏ. aḏ smitaṯ lliy neči 3 d isuggesen wilbeṭlexc anṣeḥ n midden ggiḍ, uggas, aḏ neči tƹideγ afelxaḍertwem.

32 ṭuruh tafenedjeγ y rebbiy aḏ nnaƹmeṯ n dwiys. rahiy netta yetquddu ayerni liymanuwem we afenyuc lwerṯ jar lliy mqudsen siyes lkul. 33 wiḍmiƹeγ ḥetta d ijuwas g lfejreṯ naγ g wureγ naγ g ṣireḍ s midden. 34 aḏ kennim tessennem lliy neči xdemmeγ s ifesniw inuh bac ačaγ we asečeγ lliy iḏiy. 35 aḏ siḵenγawem yeqƹeḏ mammeḵ aneg bac anƹawen lliy stehlen ƹewen. we adnesmita dwiy n yesuwƹ lliy yuwa: < lferḥ g uca iṭer n leqqu. > »

36 aḏ beƹd ayuh yezwa buwlus af ifednis yeqqim yetẓella yiḏesen. 37 aḏ ƹiden lkulhum ggeṯ. aḏ γemrent. aḏ beḥbent nyeƹdel.

38 ḥzennen ggeṯ afelxaḍert yuwayasen lliy maƹedc atezren. aḏ ceyƹent al lbabur.