1 slen imersal aḏ aweṯen g lyehuwdiya lliy midden muc d wuḏeyen qbellen dwiy n rebbiy. 2 mniyn yuṣel buṭrus al uwrceliym, kacḥent indin lliy mmalen s dhur aḏ uwanas: 3 «mammeḵ tuḏeffeḏ al tzaqqa n midden widehrenc aḏ tečiḏ yiḏesen.»

4 yaxy yuwayasen buṭrus af mag iṣar lkul:

5 «feγeγ seg ayuh n ddunyeṯ mniyn usiγ tẓalliγ g yafa aḏ zriγ g tirjelt ḥaja am leqmac d meqqar leḍrafis qqennen izugga al γari seg ujenna. 6 mniyn ḥekreγ g amasis, zriγ lḥiwan n tammurt aḏ lḥuwc am tlefsiwin aḏ iciwciwen n ujenna. 7 aḏ sliγ mam yemmeliḏ: «ay buṭrus, kker aγres tečeḏ.»

8 rriγas: «ay rebbiy. rahiy neči ƹemris witciγ ḥaja ḥram naγ tenjes.»

9 yaxy yuweyiḏ ṣṣut: «lliy ysenedfi rebbiy witerrac cek yenjes.» 10 aḏ yemƹaweḏ ayuh n dwiy 3 merrat, wembeƹd yuli leqmac aḏ lliy diyes lkul al ujenna.

11 g lweqt ḏḏin, 3 lliy nkiyyenten seg lqeyṣeriya uṣellen al tzaqqa lliy neči usiγ diyes. 12 aḏ yuweyiḏ rruwḥ lqudus: «ureḥ yiḏesen man γiyr tiwdi aḏ uliḵ metheni.» yaxy reḥḥeγ aḏ iḏiy 6 seg aweṯen. nuḏef al tzaqqa n argaz diyn. 13 yuweyaneγ mammeḵ yezra lmleyka g tzaqqas. yemmalas: «nkiy irgazen al yafa tesγuyeḏ y simƹan lliy mmelnas buṭrus. 14 aḏ netta tafimel dwiy afisemneƹ cek aḏ nesniḵ lkul.»

15 mniyn uḏelleγ duggiγ yezwa fellasen rruwḥ lqudus mammeḵ yezwa fellenneγ tijekkelt temezwert. 16 yaxy smitiγd mag yuweyaneγ siydneγ: «rahiy yaḥya izizdi midden s aman amma kennim tattuzizedyem s rruwḥ lqudus.» 17 mala kan rebbiy yucasen ayuh n nnaƹmeṯ am nnaƹmeṯ lliy yuceneγtiḏ mniyn numen s siydneγ yesuwƹ lmesiyḥ, d mammun neči bac asenekseγ lliy yucesen rebbiy.»

18 mniyn slen ayuh n dwiy, susmen. aḏ sebḥen y rebbiy. aḏ uwan: «mala rebbiy yuca nnaƹmeṯ n ttubeṯ ḥetta y lliy muc d wuḏeyen bac alqan temeddurt.»

19 lmumnin lliy mferqen g tammurt beƹd temettent n istifanus afelxaḍert n ḍḍulem beƹdis, uṣellen al finiyqiya aḏ qubruṣ aḏ anṭakiya. aḏ wsiyn tbecren kan g wuḏeyen af mag iṣar y siydneγ yesuwƹ.

20 lekenti lbeƹḍ sisen, aḏ nihnin g leṣel seg qubruṣ aḏ lqirineya, uṣellen al anṭakiya uḏellen tbecren s siydneγ yesuwƹ ḥetta g midden lliy duggan s leγweṯ n lyuwnan. 21 aḏ tusi lquweṯ n rebbiy yiḏesen. yaxy umennen s siydneγ ggeṯ d midden. 22 slen lmejmeƹ n uwrceliym s aydin. yaxy nkiyyen bernaba al anṭakiya.

23 mniyn yuṣel aḏ yezra nnaƹmeṯ lliy yuciṯ rebbiy, yefreḥ aḏ yuwayasen aṣebren yid rebbiy s ulawen čuren d liyman. 24 aḏ yusi bernaba d argaz d ṣbiḥ aḏ yčur s rruwḥ lqudus aḏ s liyman. aḏ af ifesnis umennen ggeṯ d midden.

25 aḏ ireḥ bernaba al ṭersuws bac ayurzu af cawel. 26 mniyn yufi, yuγettiḏ al anṭakiya mani wsiyn temlaqan yid lmejmeƹ n lmuminin suggas kamel. seḥfaḍen g ggeṯ d midden. aḏ g anṭakiya d tijekkelt temezwert lliy ttusemman diyes tlamḏa d lmesiyḥiyin.

27 g ussan diyn, usend seg uwrceliym lbeƹḍ n lliy ydugga rebbiy af imewnesen al anṭakiya. 28 aḏ yiḏesen yjen ismis aγabuws. aḏ yusi rruwḥ yuḥayas lliy tayṣar llaz d meqqar g leblad lkul. aḏ iṣar ayuh n llaz nembelḥeq g lƹehd n lqeyṣer kuludiyus. 29 aḏ smuḏen tlamḏa bac ayuc kul yjen sisen lliy yetquddu we atnekyen d lemƹuneṯ y aweṯen g lyehuwdiya. 30 leymen aydin aḏ nkiyyent al izmimen n lmejmuƹ n lmuminin g lyehuwdiya yid bernaba aḏ cawel.