1 beƹd mag neffeγ s γarsen, nreḥ gedged g leqbeleṯ n kuws. aḏ alača nuṣel al ljezireṯ n rudes. aḏ s yin nreḥ al lmers n batra. 2 lliy nufa diyes lbabur tatreḥ al finiyqiya. nerkeb diyes. 3 mniyn nusi g lbabur al suwrya teḍhereneγd qubruṣ af lisar. nfeṯiṯ, nuṣel al ṣuwr lliy tafrγen diyes lbabur. 4 lweqt ḏḏin, nurzu af tlamḏa. aḏ neqqim yiḏesen 7 d ussanaṯ. aḏ wsiyn neṣḥen g buwlus bac wiyetriḥc al uwrceliym mammeḵ yemmelesen rruwḥ lqudus. 5 beƹd mag tkeml ljumƹa, ceyeƹenneγ s tseḏnenesen aḏ ṭarwiwiṯesen al barra n tmura. aḏ nezwa af ifednneγ af cceṭ n iylel neẓẓul. 6 nsellem af beƹeḍna, nerkeb. amma nihnin ruḥen al tzaγwinesen.

7 aḏ seg ṣuwr nerzef g iylel al bitulimayes lliy neqqim diyes ijuwas yid aweṯen. 8 al ača nreḥ al lqeyṣeriya aḏ nezwa d leḍyuf g tzaqqa n filibbus lliy yetbeccer. aḏ netta d yjen seg 7 lliy wezenten g uwrceliym. 9 aḏ yusi γares 4 n tmeckenin tiqeyyarin ydugga rebbiy af imewnesneṯ.

10 neqqim γares ussan. mniyn nella diyn yuseneγd yjen seg indin lliy ydugga rebbiy af imewnesen ismis aγabuws. aḏ netta seg lyehuwdiya. 11 iqam leḥzam n buwlus. yeqqen ifesnis al idernis siyes. yuwa: «yemmal rruwḥ lqudus lliy bab n ayuh n leḥzam tatketfen wuḏeyen amyuh g uwrceliym, we atucen y lliy muc d wuḏeyen.» 12 mniyn nesla ayuh nuḏel neccin aḏ lliy ḥderren diyn nemmal y buwlus witreḥec al uwrceliym. 13 leken netta yuweyaneγ: «cbikum tetƹidem aḏ tseḥeqmiḏ g lufeḏiw? neči muc rliγ bac alketfen g uwrceliym akehaw, amma rliγ zada bac ametteγ diyes afelxaḍert n ysem n yesuwƹ siydneγ.»

14 mniyn winqudc asenbeddel rreyis, nsusem. aḏ nuwa: «adj ayeg rebbiy matta yexs.»

15 aḏ beƹd ussan, nejra imanneγ y terzeft. aḏ nreḥ al uwrceliym. 16 raḥen iḏenneγ tlamḏa seg lqeyṣeriya bac aγenuyen al tzaqqa n menasuwn qubruṣiy lliy netta d telmiḏ d qdim.

17 mniyn nuṣel al uwrceliym freḥḥen sineγ aweṯen. 18 al ača ireḥ iḏenneγ buwlus bac anleqa yeƹquwb. aḏ wsiyn izmimen n lmejmeƹ lkul ḥderren. 19 ysellem fellasen buwlus aḏ yuḏel yduggeyasen af mag yeggi rebbiy jar lliy muc d wuḏeyen af ifesnis. 20 mniyn slen lliy yuwa, ḥmeḏḏen rebbiy. aḏ uwanas: «tezriḏ cek ayya aweṯeneγ lliy umennen seg wuḏeyen d lelaf aḏ lkulhum neγren af cceriyƹeṯ n muwsa. 21 slen lliy cek temeleḏ y wuḏeyen lliy rzeffen: adjen cceriyƹeṯ n muwsa, aḏ maƹedc addehren ṭarwesen, we abeṭlen leƹweyeḏ tiqdimin.

22 mammeḵ taneg zeγ, aḏ nihnin labudda taslen lliy cek tusid al deh? 23 mala agg lliy tafenmel felles; rahiy γarneγ 4 n irgazen uƹeḏen rebbiy. 24 awyin treḥḥeḏ al lheykel. ƹuwum cek yiḏesen bac asebbeƹḏ. aḏ ḏfeƹ lḥeq n uγerreƹ n ixfewnesen, bac asennen midden lkul lliy dwiy lliy slent fellaḵ d tikerkas. aḏ lliy cekkin am nihnin debƹeḏ g abriyḏ n cceriyƹeṯ.

25 aḏ mammeḵ tesenneḏ nenkiy y lmumnin lliy muc d wuḏeyen lejwab. netweṣṣa disen bac abeṭlen uču n teγrest lliy y leṣnam, aḏ uču n iḏemmen, aḏ uču n yessum n lḥiwan lliy yexneq aḏ abeṭlen zna.»

26 al ača yewya buwlus aydin n 4 n irgazen. aḏ beƹd mag ƹewmen lkulhum, yuḏef al lheykel bac aymel lemmi takemlen ussan n sebbeƹ bac aḏucen teγrest n kul yjen sisen.

27 mniyn ḥeḍerbac takemlen 7 d ussanaṯ, zren lbeƹḍ n wuḏeyen seg asiya buwlus g lheykel. yaxy ḥercen diyes midden. aḏ ṭṭefent. 28 aḏ nihnin wsiyn tṣedƹen: «fezƹeṯ ayya aṯ israyil. rahiy d wuh d argaz lliy yetḍeyƹ g midden g imuḵan lkul s diyn d lexṭer af middenneγ aḏ cceriyƹteneγ aḏ af ayuh n mkan. aḏ iṭer n ayuh rahiy yseḏef iyuwnaniyen al lheykel aḏ ysenjes ayuh n mkan meqdus.» 29 afelxaḍert zren yiḏes g tmura trufimus lliy seg afsus, ḥsebent yseḏfi yiḏes al lheykel.

30 ƹlewleh kkeren midden n temura lkul hjemen af buwlus bac ateṭeṭefen. aḏ sefγent seg lheykel aḏ ṣleḥḥen lbiban. 31 mniyn ḥeḍrbac tatenγen, yesla lqayed n laf lliy lehrej g uwrceliym lkul. 32 yaxy yewya iƹesekriyen aḏ lquyyad n almiyyaṯ ireḥasen fiseƹ.

mniyn zrent midden am idin beṭlen iwat n buwlus. 33 ireḥḥas lqayed n lef. yeṭṭefi. aḏ yuwa y iƹesekriyen atnezγen s tseleslin. aḏ yeqqim yesestun: «d mam netta. aḏ matta yeggi.» 34 aḏ wsiyn kul yjen yemmalas ḥaja. mniyn wiqudc aysel we yefhem afelxaḍert diyes lehrej ggeṯ, yuwayasen atuyen al lmuƹesker. 35 mniyn uṣellen siyes al druj qament bac atsemenƹen seg iwat n midden lliy dduzun. 36 aḏ wsiyn debƹen disen aḏ tṣedƹen: «nγet.»

37 qebbel man ayeḏef buwlus al lmuƹesker, yuwa s leγweṯ n lyuwnan y lqayed n lef: «tqudduγ afemleγ ḥaja?»

yaxy yuwayas lqayed: «teddugiḏ leγweṯ n lyuwnan? 38 mala muc d cek d aydin n umiṣri lliy yeggi lehrej g tmura seg lemmi, aḏ yeffeγ al lexla s 4000 d lmujermin lliy neqen g midden.» 39 yaxy yuwa buwlus: «aha, neči d uḏay seg ṭersuws. aḏ nettaṯ d temura temeqqart g ljiheṯ n kilikiya. γari lḥeq am iruwmiyen. aggeḏ lemruweṯ, djiḏ aḏuflayeγ y midden.»

40 yaxy yedjiy. yebbed buwlus af druj ycala s fusis y midden bac asusmen. mniyn susmen yuḏel yduggeyasen s leγweṯ teƹebrenit, yemmal: